Esơra 4 - Sơ̆p Hlabơar Nơ̆r 'Bok Kei-Dei

Lu bơngai ayăt kơ kon pơlei Juđa pơgăn tơdrong pơm pơjing hnam akŭm

¹ kơplah lu bơngai ayăt kơ kon pơlei Juđa păng Bênjamin băt kơ lu bơngai mă đêl rôp pơm hơnă wih brŏk gơh pơm hnam akŭm kơkuh kơ Kră Yang Kră Yang 'Bok Kei-Dei Isơrael,

² lu sư năm tơ Serubabel păng lu kơdră adrĕch adrung na khan thoi âu: Lu nhôn kư̆m 'maih pơjing hnam akŭm hơdai hăm lu iĕm, yua kơ lu nhôn krao chă Kră Yang 'Bok Kei-Dei lu iĕm, kư̆m thoi lu iĕm mơ̆n, lu nhôn kư̆m đei soi kơkuh kơ Sư đơ̆ng chăl Êsarhađôn, pơtao Asiri, chĕp ba lu nhôn tơ âu.

³ Mă-lei Serubabel, Jêsua păng lu yŏng kơdră adrĕch adrung đe Isơrael, tơl khan: Iĕm ưh kơ gơh wang pơm hnam akŭm Kră Yang 'Bok Kei-Dei hăm lu nhôn ôh; mă-lei lăp hơdrô̆ lu nhôn đĕch, pơjing hnam akŭm Kră Yang Kră Yang 'Bok Kei-Dei lu bơngai Isơrael, nhen thoi Sirus, pơtao Phersi đei khan lê̆ boih kơ nhôn.

⁴ Kơplah noh kon pơlei kơtă tơhli kon pơlei Juđa tơrơ wă kơdŭn, kơplah lu sư pơjing hnam akŭm;

⁵ păng đĭ chăl Sirus, pơtao Phersia, truh tơ chăl Đarius, pơgơ̆r pơm pơtao Phersia, pơgơ̆r, lu sư apah jên kơ lu bơngai hơlĕnh pơdăr wă blah lu bơngai Juđa, wă pơrăm lê̆ tơdrong jang lu sư pơjing.

⁶ Trŏ chăl Asêrus, 'nao pơm pơtao, na lu sư chih roi sơlam kơ pơtao dôm tơdrong bơngai Juđa păng lu bơngai oei tơ pơlei Jêrusalem.

⁷ Hlôi kơ chăl Artaserses, na Bislam, Mitrêdat, Tabêl păng hơdai đĭ 'bok kuan lu sư, chih roi ăn kơ Artaserses, pơtao Phersia. Hla bơar đe chih ei chih hăm nơ̆r Aram păng ăn kơ pơtao.

⁸ Kŭm đei dơ̆ng Rêhum, yŏng linh păng Simsai, bơngai chih hla bơar kư̆m chih hla bơar ăn kơ pơtao Artaserses kêng blơ̆ lu bơngai oei tơ pơlei Jêrusalem thoi âu:

⁹ Rêhum, yŏng linh, Simsai, bơngai chih hla bơar păng đĭ-đăng lu sư bơngai bơ̆jang pơm kuan tih, lu kră sek tơlang lu sư bơngai Đinit, bơngai Aphatsathit, bơngai Tatbêlit, bơngai Aphatsit, bơngai Atkêwit, bơngai Babilôn, bơngai Suwan, bơngai Đêhawit, bơngai Êlam,

¹⁰ păng lu kon pơlei nai mă Ônapba bơngai yŏng mơng đe pơyom chông ba, wă ăn arih jang sa lăm pơlei Samari păng lăm tơring nai mă oei gah bơmơ̆t kơ đak krong.a

¹¹ 'Nâu hla bơar chih rok dơ̆ng đơ̆ng kơthơ lu sư đei gơih ăn kơ pơtao Artaserses. Kơkuh kơ pơtao Artaserses arih sot. Lu nhôn đĭch đam ih oei gah bơmơ̆t kơ đak krong.

¹² Kơkuh kơ ih pơtao wă roi kơ ih băt hơđăl lu bơngai Juđa đei brŏk đơ̆ng ih brŏk truh tơ nhôn tơ pơlei Jêrusalem, lu sư pơm pơjing ming pơlei noh pơlei mă juăt pơm kơnê̆ dêh lu sư man ming dur pơlei păng hơmet ming hơnă hnam akŭm boih.

¹³ Thoi noh, hơpơi kơ ih băt mă nhen, tơdah pơlei âu đei pơm ming dơ̆ng păng dur sư đei man hơtŏk ming, thoi noh đĭ kon pơlei noh ưh pă pơyơ̆r ăn kơ ih dôm tơmam, ưh pă ăn thuê̆ dah ăn jên, na đơ̆ng noh tơdrong răm gô truh kơ ih.

¹⁴ Yua kơ lu nhôn đei sa yua đơ̆ng hnam pơtao ih păng lu nhôn 'maih wă lăng hă tơdrong răm gô truh kơ ih thoi noh, lei na lu nhôn wơh bơngai năm roi ăn kơ ih băt,

¹⁵ ih lăng lăm hla bơar chih răk lu 'bok kră ih: Wă kơ băt lăm hla bơar hơ'mon noh roi băt kơ pơlei 'nâu, 'nâu pơlei mă juăt kơ blơ̆ blĕch pơm pơrăm pơtao, păng dêh char; đơ̆ng sơ̆ boih, đe juăt kơ tơblah băl tơ noh; yua kơ tơdrong ei boih na pơlei âu pơchah jing juơ ưh pă đei dơ̆ng.

¹⁶ Lu nhôn roi tơbăt kơ ih băt tơdah pơlei âu đei pơm ming dơ̆ng păng dur pơlei đe man ming dơ̆ng, tơdrong ei ưh kơ jor, ih gô hiong teh đak gah âu kơ đak krong.

¹⁷ Pơtao hloi chih hla bơar tơjur nơ̆r tơtă ăn kơ yŏng linh Rêhum, ăn kơ Simsai bơngai chih hla bơar păng ăn kơ đĭ-đăng lu bơngai bơ̆jang oei lăm Samari păng oei lăm dêh nai gah bơmơ̆t kơ đak krong, thoi âu: Hơpơi ăn kơ lu iĕm đei tơdrong hiôk-hian.

¹⁸ Kơthơ lu iĕm chih roi noh đei truh tơ inh đei đŏk tơblang rơđah nhen 'bơ̆t anăp inh boih.

¹⁹ Kiơ̆ dôm nơ̆r inh đei tơtă kơ lu iĕm, đe kư̆m đei lăng hơlen boih, đei 'bôh sơ̆ pơlei âu đei iung blah hăm lu pơtao păng lăm noh đei lơ tơdrong tơblơ̆ tơblĕnh păng tơdrong khŭl hơlĕnh.

²⁰ Tơ pơlei Jêrusalem kư̆m đei boih lu pơtao pran kơtang, wei-lăng pơgơ̆r đĭ jơ̆p kơ dêh char gah to đak krong păng lu đe tuh pơyơ̆r ăn tơmam, ăn jên thuê̆ păng ăn jên trong kơ lu pơtao noh.

²¹ Kơlih kơ thoi noh, lu iĕm athei roi tơbăt nơ̆r tơtă găn lu bơngai mă wă pơdơ̆ng pơjing pơlei âu, dĭng truh tơ layơ mă inh ăn pơm tơdrong noh na gơh pơm.

²² Kơchăng bĕ tơdrong âu, hli kơ đei tơdrong gleh hloh dơ̆ng kơ lu pơtao.

²³ Lăp wă lu sư đŏk hla bơar pơtao Artaserses chih noh 'bơ̆t anăp Rêhum, Simsai bơngai chih hla bơar păng đĭ-đăng lu bơngai bơ̆jang, na lu sư năm hăt hot hloi truh tơ kon pơlei Juđa tơ pơlei Jêrusalem, iŏk tơdrong gơh păng tơdrong pran kơtang pơm kơ kon pơlei Juđa khă ưh kơ ăn pơm.

²⁴ Thoi noh, tơdrong jang pơjing hnam akŭm kơkuh kơ Kră Yang 'Bok Kei-Dei tơ pơlei Jêrusalem pơdơh dĭng truh tơ sơnăm mă 'bar chăl Đarius pơm pơtao pơgơ̆r dêh char Phersia.