Esơra 3 - Sơ̆p Hlabơar Nơ̆r 'Bok Kei-Dei

Pơm ming chơnang soi akŭm

¹ Truh khei tơpơh, kơplah kon pơlei Isơrael hlôi oei lăm pơlei sư kơdih boih, na kon pơlei akŭm băl minh pôm đon nhen thoi minh 'nu bơngai lăm pơlei Jêrusalem.

² Kơplah noh, Jêsua, kon drŏ-nglo Jôsađăk păng lu 'bok soi hăm Serubabel, kon drŏ-nglo Sêathiel păng lu 'nhŏng oh sư, đĭ-đăng wang iung pơdơ̆ng chơnang soi Kră Yang 'Bok Kei-Dei đe Isơrael, wă pơyơ̆r tơmam soi 'buh tơ noh, kiơ̆ kơ đei chih lăm hla bơar khôi juăt Môis, bơngai Kră Yang 'Bok Kei-Dei.

³ Lu sư hli kơ kon pơlei kơtă, mă-lei pơm ming chơnang soi tơ hơnă so sư păng soi pơyơ̆r tơmam soi kơ Kră Yang tơ noh, wă khan tơmam soi 'buh gah pơgê păng kơsơ̆.

⁴ Lu sư kư̆m bơwei giĕng bơsŭn, kiơ̆ thoi đei chih păng soi pơyơ̆r lu tơmam soi 'buh, kiơ̆ kơ đei hơgăt kơ rim năr.

⁵ Đơ̆ng rŏng kơ noh, lu sư soi pơyơ̆r lu tơmam soi 'buh ling-lang, pơyơ̆r lu tơmam soi 'bơ̆t khei tơ'bang păng pơyơ̆r tơmam soi lăm lu năr giĕng tih 'măn năr 'lơ̆ng rơgoh kơ Kră Yang; kư̆m pơyơ̆r lu tơmam soi kiơ̆ kơ rim 'nu đei pơyơ̆r kơ Kră Yang.

⁶ Đơ̆ng năr mă mônh khei tơpơh, lu sư pơtơm soi pơyơ̆r lu tơmam soi 'buh ăn kơ Kră Yang; mă-lei ưh tam mă man hơnă hnam akŭm Kră Yang Pơm Hnam Akŭm.

⁷ Lu sư asong ăn jên kơ lu bơngai gơh blah tơmo man păng lu bơngai gơh jang 'long păng ăn lu tơmam sa, đak nhă păng đak rơmă ăn kơ kon pơlei Siđôn păng kon pơlei Tirơ wă wơh lu sư chă 'long hơngo đơ̆ng Liban dui trong đak dơsĭ truh tơ Jôpa, đơ̆ng chơ truh tơ pơlei Jêrusalem kiơ̆ kơ Sirus pơtao đe Phersia đei tơjur athei.

⁸ Sơnăm mă 'bar khei 'bar, đơ̆ng rŏng lu sư brŏk tơ hnam akŭm Kră Yang 'Bok Kei-Dei tơ pơlei Jêrusalem, Serubabel, kon drŏ-nglo Sêathiel păng Jêsua kon drŏ-nglo Jôsađăk, lu 'nhŏng oh, lu 'bok soi păng bơngai Lêwi, hăm đĭ-đăng lu bơngai mă đe rôp pơm bơnă 'nao wih brŏk tơ pơlei Jêrusalem, đĭ-đăng wang pơtơm pơm pơjing hnam akŭm; Lu sư ăn bơngai Lêwi đơ̆ng 'bar-jĭt sơnăm năm tơ kơpal, wă kơ wei-lăng tơdrong jang pơm pơjing hnam akŭm Kră Yang.

⁹ Kơplah noh, Jêsua, lu kon drŏ-nglo sư păng lu 'nhŏng oh sư Katmiêl păng lu kon drŏ-nglo sư, lu kon sâu Hađawia păng lu kon drŏ-nglo Hênadat, kon sâu păng 'nhŏng oh lu sư, đĭ-đăng lu sư bơngai Lêwi akŭm băl minh jơhngơ̆m đon nhen thoi minh 'nu bơngai, na wei-lăng lu bơngai bơ̆jang pơm hnam akŭm Kră Yang 'Bok Kei-Dei.

¹⁰ Kơplah lu bơngai man hơnă hnam akŭm Kră Yang, na đei lu 'bok soi dơ̆ng tơ noh hrŭk ao giĕng păng chĕp keng, na lu bơngai Lêwi, kon sâu Asap, đĭ-đăng chĕp chhar, wă ư-ang kơ Kră Yang kiơ̆ thoi khôi juăt Đawit, pơtao Isơrael, đei pơjing.

¹¹ Lu sư hơri bơyong dih băl na bơnê ư-ang kơ Kră Yang khan: Trŏ kơ bơnê ư-ang kơ Kră Yang, yua kơ Sư 'lơ̆ng rŏ, sư 'mêm kơ bơngai Isơrael ling-lang khŏm khŏm! Đĭ-đăng kon pơlei ôr jreo re, bơnê ư-ang kơ Kră Yang, yua kơ đe man hơnă hnam akŭm Kră Yang boih.

¹² Lơ 'bok soi, bơngai Lêwi, kơdră adrĕch adrung, wă khan lu đe kră mă 'bôh hnam akŭm adrol, lu sư nhơ̆m re kơplah đe man hơnă hnam akŭm 'nao 'bơ̆t anăp lu sư. Kŭm đei lơ bơngai nai đei nơ̆r ôr re hiôk chơt 'nă hal;

¹³ Thoi noh na đe hơnat kơ băt ayơ tơdrong hiôk chơt păng ayơ tơdrong nhơ̆m hmoi; yua kơ kon pơlei pơla ôr re păng nơ̆r re noh kơtơ̆ng jơ̆k truh tơ ataih.