Esơra 10 - Sơ̆p Hlabơar Nơ̆r 'Bok Kei-Dei

Kon pơlei tơbral yoch

¹ Lăm kơplah Esơra krao khan tơbral, nhơ̆m hmoi, roi tơbral yoch păng drap 'bơ̆t anăp hnam akŭm, na đei minh tơpôl kon pơlei Isơrael, bơngai drŏ-kăn drŏ-nglo hơ'lơ̆p lơ dêh, akŭm tăp dăr kơ sư; lu sư kư̆m nhơ̆m hmoi ơh ol.

² Sêkania kon drŏ-nglo Jêhiêl, lu kon sâu Êlam sư khan kơ Esơra thoi âu; lu nhôn đei pơm yoch hăm Kră Yang 'Bok Kei-Dei lu bơ̆n na iŏk oei boih kơ lu kon drŏ-kăn bơngai tơmoi adrĕch adrung lăm dêh 'nâu; mă khan lu nhôn đei pơm thoi noh ră, kư̆m oei đei tơdrong hơmĕng mă wă ăn kơ đe Isơrael.

³ Na dang ei, nhôn athei pơkăm pơkă hăm Kră Yang 'Bok Kei-Dei nhôn wă hrĕch achăng păng lê̆ đĭ lu drŏ-kăn noh păng đĭ-đăng lu kon hơ'lơ̆p lu sư, kiơ̆ ih păng lu bơngai băt hli yom pơm kiơ̆ khôi juăt Kră Yang 'Bok Kei-Dei bơtho khan; athei pơm kiơ̆ bĕ khôi juăt.

⁴ Ih athei iung bĕ, yua kơ tơdrong âu 'bơm hăm ih păng lu nhôn gô tơgŭm; ih athei đei jơhngơ̆m pơ̆n nuih na pơm tơdrong 'nâu.

⁵ Esơra sư iung, apinh lu 'bok soi păng bơngai Lêwi hăm đĭ-đăng Isơrael pơkăm pơkă pơm kiơ̆ thoi ei, lu sư pơkăm hloi.

⁶ Đơ̆ng noh Esơra iung weh đơ̆ng anih 'bơ̆t anăp lăm hnam Kră Yang 'Bok Kei-Dei, na mơ̆t lăm anih Jêhôhanan, kon drŏ-nglo Êliasip; sư mơ̆t 'bĭch kơmăng tơ noh ưh kơ đei sŏng sa păng nhă đak ôh, yua kơ sư ơh sơ'ngon, yua kơ tơdrong yoch đe kon pơlei mă đe đei rôp pơm bơnă mă đei wih brŏk.

⁷ Na đe ră roi kơ jơ̆p-jang kơ dêh Juđa păng pơlei Jêrusalem, krao đĭ-đăng lu kon pơlei đêl đe rôp pơm bơnă gơh wih brŏk, athei lu sư năm pơpôi akŭm tơ pơlei Jêrusalem.

⁸ Lăm pêng năr, bơngai bu ưh kơ năm kiơ̆ thoi 'bok kuan tih păng đe kră tơtă, na mŭk tơmam sư noh đe gô pơdrâu iŏk pơđĭ, bơngai noh đe gô puh tơweh, kiơ̆ thoi lu kră păng lu bơngai pơgơ̆r ưh kơ ăn kơ sư akŭm hơdai kon pơlei mă 'nao brŏk dơ̆ng đơ̆ng pơm bơnă.

⁹ Lăm pêng năr, đĭ-đăng bơngai drŏ-nglo Juđa, Bênjamin, đĭ-đăng năm akŭm tơ pơlei Jêrusalem, 'blep kơ năr 'bar-jĭt khei tơsĭn; đĭ-đăng kon bơngai hơ-oei cham să 'bơ̆t anăp lăm hnam Kră Yang 'Bok Kei-Dei, hli tơrơ yua kơ tơdrong 'nâu păng yua kơ tơdrong 'mi tih.

¹⁰ Đơ̆ng noh, Esơra, 'bok soi, sư iung păng khan kơ đĭ-đăng bơngai: Lu iĕm đei pơm yoch, iŏk oei kơ lu drŏ-kăn tơmoi, tơdrong yoch 'nâu pơthim lơ tơdrong yoch kơ bơngai Isơrael.

¹¹ Thoi noh dang ei, tơbral bĕ tơdrong yoch iĕm kơ Kră Yang Kră Yang 'Bok Kei-Dei 'bok lu iĕm păng pơm kiơ̆ kơ Sư lăp đon; athei weh bĕ đơ̆ng lu adrĕch tơmoi lăm dêh âu păng đơ̆ng lu bơngai tơmoi mă lu iĕm iŏk pơm akăn.

¹² Đĭ-đăng kon pơlei drơ̆ng nơ̆r re thoi âu: Nơ̆r ih khan trŏ tơpă, lu nhôn gô pơm kiơ̆; 'blep thoi noh.

¹³ Mă-lei kon pơlei lơlap lơlang; păng trŏ 'blep kơ bơyan 'mi tih, lu nhôn ưh kơ gơh dơ̆ng ngôi tơ 'nguaih. Păng mă loi đei lơ bơngai pơm tơdrong âu ưh kơ sĭ minh dah 'bar năr đĕch ôh, bơ̆n gơh pơma pơkeh đĭ.

¹⁴ Thoi noh, apinh lu 'bok kuan tih dơ̆ng tơ noh tơplih kơ lu nhôn wă pơma dŏng kon pơlei mă trŏ; mă bơngai bu lăm pơlei lu nhôn đei iŏk lu bơngai tơmoi pơm akăn, athei pơm kiơ̆ kơ năr đei hơgăt, hăm lu đe kră păng 'bok sek tơlang kơtă pơlei, wă hơmet tơdrong âu dĭng truh tơ layơ mă Kră Yang hil mĭl kơ nhôn gơh ngach rơngơp.

¹⁵ Lăp bre Jônathan, kon drŏ-nglo Asahel păng Jaseia kon drŏ-nglo Tikwa, bre sư đĕch pơ̆n pơjah plơ̆ tơdrong âu; păng Mêsulam hăm Sabêtai, bơngai Lêwi, tơgŭm ăn kơ lu sư.

¹⁶ Lu bơngai đe rôp pơm bơnă gơh wih brŏk dơ̆ng pơm kiơ̆ ngei nơ̆r âu, đe rơih iŏk Esơra, 'bok soi păng lu yŏng kơdră lăm adrĕch adrung, kiơ̆ kơ adrĕch adrung lu sư kơdih, đĭ-đăng krao kiơ̆ anăn rim lu sư kơdih. Năr mă mônh khei mơjĭt; lu sư wă lăng sek hơlen tơdrong âu.

¹⁷ Truh tơ năr mă mônh khei mônh, lu sư pơm keh kơ tơdrong sek hơlen kơ lu bơngai mă chă akăn bơngai tơmoi.

¹⁸ Păng 'nâu lu anăn lăm 'bok soi kư̆m đei chă akăn lu bơngai tơmoi, lăm lu kon sâu Jêsua, kon drŏ-nglo Jôsađac păng 'nhŏng oh sư: Maasêya, Êliêser, Jarip păng Gêđalia.

¹⁹ Lu sư pơkă wă hrĕch achăng lê̆ akăn lu sư kơdih păng pơyơ̆r minh pôm triu dăm pơm tơmam soi wă huai đơ̆ng yoch lu sư kơdih.

²⁰ Lăm kon sâu Imer đei Hanani păng Sêbađia.

²¹ Lăm kon sâu Harim đei Masêia, Êli, Sêmaia, Jêhiêl păng Usia.

²² Lăm kon sâu Phasur đei Êliôenai, Masêia, Ismael, Nethanel, Jôsabat păng Êlasa.

²³ Lăm bơngai Lêwi đei Jôsabat, Simêi, Kêlaia đe kư̆m krao sư Kêlita, Phêtahia, Juđa păng Êliêser.

²⁴ Lăm lu bơngai hơri đei Êliasip. Lăm lu bơngai wei 'măng jang đei Sallum, Têlem păng Uri.

²⁵ Lăm kon pơlei Isơrael; lăm kon sâu Pharôs đei: Ramia, Isia, Malkija, Mijamin, Êlêasar, Malkija păng Bênaja.

²⁶ Lăm kon sâu Êlam đei: Matania, Sachari, Jêhiêl, Apđi, Jêremôt păng Êli.

²⁷ Lăm kon sâu Satu đei: Êliôenai, Êliasip, Matania, Jêremôt, Sabat păng Asisa.

²⁸ Lăm kon sâu Bêbai đei: Jêhôhanan, Hanania, Sabai păng Atlai.

²⁹ Lăm kon sâu Bani đei: Mêsulam, Maluch, Ađaia, Jasup, Sêal păng Jêremôt.

³⁰ Lăm kon sâu Phahat Môap đei: Atna, Kêlai, Bênaia, Maseja, Matania, Bêsalel. Binnui păng Manase.

³¹ Lăm kon sâu Harim đei: Êliêser, Isija, Malkija, Sêmaya, Simêôn,

³² Bênjamin, Maluch păng Simaria.

³³ Lăm kon sâu Hasum đei: Matênai, Matata, Sabat, Êliphêlet, Jêrêmai, Manase păng Simêi.

³⁴ Lăm kon sâu Bani đei: Mađai, Amram, Uêl,

³⁵ Bênaia, Bêđie, Kêluhi,

³⁶ Wania, Mêrêmôt, Êliasip,

³⁷ Mattania, Matênai, Jasu.

³⁸ Lăm kon sâu Binnui đei: Simêi,

³⁹ Sêlêmia, Nathan, Ađaia,

⁴⁰ Maknadebai, Sasai, Sarai,

⁴¹ Asarel, Sêlêmia, Sêmaria,

⁴² Sallum, Amaria păng Jôsep.

⁴³ Lăm kon sâu Nêbô đei: Jêiêl, Matithia, Sabat, Sêbina, Jađai, Jôel păng Bênaia.

⁴⁴ Đĭ-đăng bơngai noh iŏk akăn bơngai tơmoi ngăl; lu sư achăng akăn noh păng kon hơ'lơ̆p lu sư. 25-Nov-2005@13:33, Backup Description=25-Nov-2005@13:30, Billy - 29-Nov-2005@10:12, Backup Description=25-Nov-2005@16:45, David Le vp - 29-Nov-2005@10:23, Backup Description=29-Nov-2005@10:21, Billy -