Êsêkiên 5 - Sơ̆p Hlabơar Nơ̆r 'Bok Kei-Dei

Tơdrong blah pơlei Jêrusalem

¹ Gah ih, ơ kon bơngai, iŏk bĕ đao han, yua sư pơm săng hơkôih, hơkôih bĕ sŏk kơ̆l păng sŏk kang ih, iŏk 'long kŏng, na kŏng klah asong sŏk ih.

² Lăm năr mă wang pơlei đĭ boih, ih soh minh lăm pêng sŏk noh lăm pơlei tih noh. Ih iŏk minh lăm pêng chơ̆ng hăm đao tơ tăp dăr kơ pơlei păng minh lăm pêng oei oei noh ih săi tơ kial yua kơ Inh gô iŏk đao gưm druh lu sư đơ̆ng rŏng.

³ Ih kư̆m iŏk minh 'bar ioi đơ̆ng sŏk noh chô̆ sư 'bơ̆t ao ih.

⁴ Đơ̆ng sŏk chô̆ 'bơ̆t ao ih noh, ih iŏk lu sŏk mơ'nah đơ̆ng lăm sŏk noh na soh lăm ŭnh. Na ŭnh gô sa pla khơ̆ng truh tơ đĭ dêh char Isơrael.

⁵ 'Nâu nơ̆r Kră Yang Tih Hloh khan: Âu pơlei Jêrusalem, Inh dan sư tŏk-bŏk lu dêh char păng lu teh đak jum dăr kơ sư.

⁶ Isơrael ưh kơ chu blah plơ̆ khôi juăt păng nơ̆r Inh tơtă pơm kơnê̆ hloh kơ lu bơngai nai păng lu dêh char jum dăr kơ sư. Sư sơngah kơ khôi juăt Inh păng ưh kơ pơm kiơ̆ nơ̆r Inh tơtă.”

⁷ Lei na, Kră Yang Tih Hloh khan: Ih pơm kơnê̆ hloh kơ lu dêh char jum dăr kơ ih, ưh kơ pơm kiơ̆ nơ̆r Inh tơtă, ưh kơ wei khôi juăt Inh. Ih kư̆m ưh kơ kĕ pơm kiơ̆ tơdrong juăt lu dêh char jum dăr kơ ih,

⁸ Na, Kră Yang Tih Hloh khan: “Âu, Inh kơdih akâu Inh blah ih păng Inh gô phak ih 'bơ̆t anăp lu dêh char.

⁹ Yua kơ tơdrong kơnê̆ krưp ih, na Inh gô pơm kơ ih minh tơdrong mă Inh ưh tam mă pơm đơ̆ng sơ̆ păng ning-mônh Inh ưh pă pơm dơ̆ng.

¹⁰ Na lăm ih mĕ 'bă gô 'buh sa kon lu sư păng lu kon sư gô 'buh sa mĕ 'bă lu sư. Inh gô sek tơlang ih păng lu bơngai mă oei oei, Inh gô ăn kơ lu sư tơklah tơklang tơ jơ̆p-jang kơ teh.

¹¹ Lei na Kră Yang Tih Hloh khan: Tơpă thoi Inh oei arih, yua kơ ih pơm kơnê̆ 'mê̆-'mach lăm anih rơgoh Inh hăm pơm kơnê̆ krưp, mă Inh areh dêh. Thoi noh na Inh pơrăm ih, măt Inh ưh kơ wă lăng păng ưh pă mơnat.

¹² Minh lăm pêng lăm lu khŭl ih gô lôch hơbuh păng gô lôch kơ pơngot rơwĕt minh lăm pêng gô pơ̆k lôch kơ đao hơlă tăp dăr kơ ih; mă minh lăm pêng dơ̆ng Inh gô pơm kơ lu sư tơklah tơklang tơ jơ̆p-jang kơ teh păng Inh gô toh đao druh 'moi lu sư.

¹³ Inh gô tuh tơdrong Inh hil păng Inh gô hil mĭl truh kơ lu sư, na tơdrong blĕk Inh hrăp; păng kơplah Inh pơm keh tơdrong hil kơ lu sư, lu sư gô băt Inh boih Kră Yang, hlôi khan kơ lu sư Inh gar. Lăm tơdrong inh hil mĭl kơ lu sư.

¹⁴ Inh gô pơm kơ ih pơchah pơchek păng đe che bơle lăm teh đak jum dăr păng 'bơ̆t anăp lu bơngai chă yak brih găn.

¹⁵ Ih gô jing tơmam đe pơjăm, đe che bơle hiĕk ăr, pơm kơ lu dêh char jum dăr kơ ih hli tơrơ, mưh Inh đei hil mĭl. Păng phak bơtho trăp tơpă. Inh boih Kră Yang mă đei khan thoi noh!

¹⁶ Layơ Inh prah 'brơ̆m tơdrong pơngot rơwĕt păng tơdrong lôch rŭng, wă prah pơrăm lu bơngai mă trŏ kơ pơlôch; Inh prah wă pơrăm ih, Inh gô pơthim tơdrong pơngot rơwĕt kơ ih păng gô pơrăm lê̆ trong tơmam sa ih.

¹⁷ Inh gô ăn tơdrong pơngot rơwĕt păng ăn sem bri wă pơrăm lu kon hơ'lơ̆p ih jing pă đei tơdrong lôch hơbuh păng tơdrong tơblah truh tơ pham gô ro truh tơ ih, Inh gô iŏk đao gưm pơrăm ih. Inh boih Kră Yang mă đei khan thoi noh!”