Êsêkiên 43 - Sơ̆p Hlabơar Nơ̆r 'Bok Kei-Dei

Tơdrong ư-ang rang mơnhal Kră Yang

¹ Na sư anhăk ba inh truh tơ 'măng jang gah hơlĕch.

² Inh 'bôh tơdrong ư-ang rang mơnhal Kră Yang 'Bok Kei-Dei Isơrael năm đơ̆ng gah hơlĕch đei jơwa nhen thoi đak ro tih, hơdah rang mơnhal ư-ang Kră Yang jơ̆p kơ teh.

³ Tơdrong mă inh 'bôh nhen thoi tơdrong mă tơ'bôh kơ inh kơplah Kră Yang pơrăm pơlei. Noh kư̆m nhen thoi tơdrong tơ'bôh kơ inh 'bơ̆t jih đak krong Kêbar, na inh drap bon tơ teh.

⁴ Tơdrong ư-ang rang mơnhal Kră Yang mơ̆t tơ lăm hnam akŭm trong 'măng jang gah hơlĕch.

⁵ Yang bơhngol hơtŏk inh păng chông ba inh mơ̆t tơ cham gah lăm; to tơdrong rang mơnhal Kră Yang 'Bok Kei-Dei 'bĕnh-'bang kơ hnam akŭm.

⁶ Kơplah đei bơngai noh dơ̆ng jê̆ inh, inh kơtơ̆ng đei nơ̆r pơma hăm inh đơ̆ng lăm hnam akŭm.

⁷ Sư pơma hăm inh khan: “Ơ kon bơngai, âu jing anih mă Inh dan tang-dŏ Inh, anih mă Inh dan jơ̆ng tơ âu Inh gô oei hơdai ling-lang hăm adrĕch adrung Isơrael. Adrĕch Isơrael ưh pă pơm kơnê̆ 'mê̆-'mach kơ anăn 'lơ̆ng rơgoh Inh dơ̆ng, lu sư dah pơtao lu sư lăm tơdrong pơm pơyô kư̆ kă lu sư păng đơ̆ng lu akâu pơtao lôch tơ anih kơjung;

⁸ Đơ̆ng lu sư dan kơtơ̆n 'măng hnam lu sư 'bơ̆t jê̆ kơtơ̆n 'măng hnam Inh, dan jrăng 'măng hnam lu sư jê̆ jrăng 'măng hnam Inh, đei tơnăr pĕng găn sơlam Inh păng lu sư đĕch, lu sư pơm kơnê̆ 'mê̆-'mach boih kơ anăn 'lơ̆ng rơgoh Inh. Kơplah lu sư pơm tơdrong kơnê̆ krưp noh, lei na Inh đei pơlôch pơrăm lê̆ lu sư lăm năr Inh hil mĭl.

⁹ Dang ei lu sư athei hŭt lê̆ tơdrong pơm pơyô kư̆ kă păng akâu lu pơtao lôch ataih đơ̆ng Inh, Inh gô oei hơdai lu sư ling-lang hlŏng hloi.

¹⁰ Gah ih, ơ kon bơngai athei roi tơ'bôh kơ adrĕch Isơrael băt kơ hnam akŭm âu, wă kơ lu sư mơlâu kơ tơdrong yoch mă lu sư đei pơm, wă kơ lu sư pơtŏ lăng kiơ̆ kơ tơdrong 'nâu.

¹¹ Tơdah lu sư mơlâu kơ tôm tơdrong lu sư hlôi pơm, tơ'bôh ăn bĕ kơ lu sư rup đe pơdơ̆ng hnam akŭm âu, trong lu 'măng mơ̆t 'măng lĕch, đĭ-đăng lu rup chhơ̆, đĭ-đăng tôm tơdrong juăt Sư, lu rup sư păng đĭ-đăng khôi juăt ăn kơ sư. Athei chih roi tôm tơdrong 'bơ̆t anăp măt lu sư, đĭ-đăng rup păng đĭ-đăng khôi juăt sư wă kơ lu sư wei răk păng pơm kiơ̆.

¹² Âu khôi juăt gah hnam akŭm: Đĭ-đăng anih tăp dăr kơ kơpal kông, noh anih 'lơ̆ng rơgoh. Noh boih khôi juăt hnam akŭm. Chơnang soi

¹³ Âu tơdrong pơtŏ chơnang soi, pơtŏ hăm tơlei pơtŏ kơjung minh hơgăt minh hơđa. Hơbong jum dăr kơ jơ̆ng chơnang soi jrŭ minh hơgăt, wơ̆l minh hơgăt, đei gor gơnăp jum dăr minh hơđa. Âu boih gah kơjung chơnang soi.

¹⁴ Hơbong hơnă đơ̆ng teh truh tơ không ala 'bar hơgăt, wơ̆l minh hơgăt. Đơ̆ng không iĕ truh tơ không tih đei puăn hlok, wơ̆l să minh hơgăt.

¹⁵ Chơnang soi kơjung puăn hlok păng kơpal chơnang soi đei puăn tŏ hơke pơdơ̆ng.

¹⁶ Anih chơnang soi tor să mơjĭt-'bar hơgăt, wơ̆l mơjĭt hơgăt, dơ'bŭng đei puăn pah mum.

¹⁷ Không tŏk-bŏk chơnang soi tor wơ̆l mơjĭt-puăn hlok puăn pah dơ'bŭng đei gơnăp jum dăr minh puăt hơgăt; đei hơbong jum dăr minh hơgăt, lu kơnao sư noh tơwih gah hơlĕch.

¹⁸ Sư pơma hăm inh: “Ơ kon bơngai, Kră Yang khan thoi âu: Âu boih khôi juăt gah chơnang soi mưh pơm keh yua wă pơyơ̆r tơmam soi 'buh păng tơtreh pham kơpal ei.

¹⁹ Kră Yang khan: Pơjao bĕ kơ 'bok soi adrĕch Lêwi lăm, adrĕch Sađôk noh, lu bơngai gô năm jê̆ wă bơ̆jang kơ Inh, minh pôm rơmo dăm bek wă pơm tơmam soi huai đơ̆ng yoch.

²⁰ Ih iŏk bĕ pham pik tơ puăn tŏ hơke chơnang soi, tơ puăn pah mum păng tơ gơnăp jum dăr, wă kơ ôp rơgoh chơnang soi păng huai đơ̆ng yoch.

²¹ Ih iŏk rơmo dăm pơyơ̆r pơm tơmam soi huai đơ̆ng yoch, chĕp 'buh pơkhôi tơ anih mă đei hơmet lê̆ boih kơ cham hnam akŭm tơ 'nguaih kơ anih 'lơ̆ng rơgoh.

²² Năr mă 'bar, ih athei pơyơ̆r bơbe tơno, ưh kơ đei rơka wă pơm tơmam soi huai đơ̆ng yoch chơnang soi athei ôp rơgoh kư̆m thoi pơyơ̆r rơmo dăm iŏk pham wă ôp rơgoh.

²³ Mưh đei ôp rơgoh boih chơnang soi, athei pơyơ̆r minh pôm rơmo dăm ưh kơ đei rơka păng minh pôm triu rôp đơ̆ng lu khŭl mă ưh kơ đei rơka.

²⁴ Ih athei năm ba 'bơ̆t anăp Kră Yang, lu 'bok soi prôi 'boh tơ kơpal păng pơyơ̆r pơm tơmam soi 'buh ăn kơ Kră Yang.

²⁵ Lăm tơpơh năr, rim năr ih athei pơyơ̆r minh pôm bơbe tơno, wă huai đơ̆ng yoch; păng kư̆m pơyơ̆r minh pôm rơmo dăm, minh pôm triu tơno mă rôp đơ̆ng lu khŭl ưh kơ đei rơka.

²⁶ Lăm tơpơh năr noh, đe pơm giĕng huai đơ̆ng yoch wă ôp rơgoh chơnang soi, păng thoi noh chơnang soi jing 'lơ̆ng rơgoh.

²⁷ Đơ̆ng rŏng năr kơ lu năr noh hlôi boih, đơ̆ng năr mă tơhngam tơ anăp, lu 'bok soi gô pơyơ̆r tơmam soi 'buh păng tơmam soi 'blŏk bơnê lu iĕm 'bơ̆t chơnang soi noh, thoi noh Inh gô iŏk dôm tơmam soi noh, Kră Yang khan.”