Êsêkiên 42 - Sơ̆p Hlabơar Nơ̆r 'Bok Kei-Dei

Lu anih 'lơ̆ng rơgoh lăm cham hnam akŭm

¹ Sư chông ba inh lĕch tơ cham 'nguaih, gah yă-nơ̆m, ba inh mơ̆t tơ lăm anih tơklă hăm cham hnam akŭm păng dur gah yă-nơ̆m.

² Anih hnam mă đei ‘măng mơ̆t gah yă-nơ̆m tor minh-hrĕng hơgăt, đei 'măng gah yă-nơ̆m, wơ̆l sư pơđăm-jĭt hơgăt.

³ Hơlam rơhơi să 'bar-jĭt hơgăt tơklă cham lăm păng, hơnă tơmo tơ cham 'nguaih, đei lu kơdeng pơtrơp băl pêng tăl.

⁴ 'Bơ̆t anăp lu anih đei trong wơ̆l mơjĭt hơgăt, tor kơjung đei minh-hrĕng hơgăt. Păng đei lu trong năm mơ̆t tơ gah yă-nơ̆m.

⁵ Lu anih tơ kơpal iĕ hloh kơ lu anih tơ ala păng lu anih tŏk-bŏk hnam, yua kơ lu kơdeng găn.

⁶ Rim anih đei pêng tăl mă-lei ưh kơ đei jrăng thoi jrăng cham yua kơ thoi noh na anih kơpal iĕ hloh kơ anih ala păng anih tŏk-bŏk.

⁷ Đei tơnăr gah 'nguaih pơrok kiơ̆ lu anih tơwih gah cham 'nguaih, tơklă lu anih mă să tor pơđăm-jĭt hơgăt.

⁸ Tor lu anih gah cham 'nguaih pơđăm-jĭt hơgăt, mă-lei lu anih tơklă hnam akŭm noh đei minh-hrĕng hơgăt.

⁹ Tơ gah hơlĕch kơ lu anih 'nâu tơ ala, gah hơlĕch đei minh trong mơ̆t, 'măn kơ lu bơngai đơ̆ng cham 'nguaih mơ̆t.

¹⁰ Tơm tơnăr cham lăm hnam akŭm gah gơal, tơklă 'bơ̆t sơlam hnam akŭm đei lu anih.

¹¹ Đei minh trong năm tơ anăp lu anih noh, kư̆m thoi trong năm rim lu anih gah yă-nơ̆m; lu anih noh tor wơ̆l să lei-lăi. Đĭ-đăng lu trong lĕch trong mơ̆t tơdrong hơmet păng 'măng kư̆m lei-lăi.

¹² Kơ lu 'măng anih gah gơal kư̆m lei-lăi; đei minh pôm 'măng 'bơ̆t tơm trong năm wă kơ đe mơ̆t lĕch, pơrok kiơ̆ tơnăr tơklă gah hơlĕch.

¹³ Na sư khan kơ inh: “Lu anih gah yă-nơ̆m păng anih gah gơal, tơklă hăm cham lăm noh boih anih rơgoh anih lu 'bok soi năm jê̆ Kră Yang gô sa tơmam soi 'lơ̆ng rơgoh hloh. Lu sư kư̆m dan lu tơmam soi 'lơ̆ng rơgoh hloh 'bơ̆t noh tơmam soi phe 'ba, tơmam soi huai đơ̆ng yoch, tơmam soi huai đơ̆ng glăi, yua kơ noh anih rơgoh.

¹⁴ Mưh lu 'bok soi hlôi mơ̆t tơ anih rơgoh boih, lu sư ưh kơ gơh lĕch đơ̆ng anih rơgoh noh na năm tơ cham 'nguaih, mă-lei athei plôh lê̆ ao 'bok soi mă lu sư hrŭk wă soi kơ Kră Yang yua kơ lu hơbĕn ao noh 'lơ̆ng rơgoh; lu sư athei iŏk hrŭk ao nai, na lu sư gơh lĕch tơ 'nguaih anih mă 'măn kơ lu kon pơlei.

¹⁵ Đang kơ pơtŏ keh lăm hnam akŭm sư anhăk ba inh lĕch trong 'măng gah hơlĕch tơ cham gah 'nguaih păng pơtŏ jum dăr cham gah 'nguaih kơ hnam akŭm.

¹⁶ Sư pơtŏ gah hơlĕch hăm tơlei pơtŏ, đei pơđăm-hrĕng hơgăt, kiơ̆ kơ tơlei pơtŏ.

¹⁷ Sư tơwih rŏng pơtŏ gah yă-nơ̆m tơlei pơtŏ lei-lăi, pơđăm-hrĕng hơgăt kiơ̆ kơ tơlei pơtŏ.

¹⁸ Sư tơwih rŏng pơtŏ gah gơal lei-lăi, kư̆m pơđăm-hrĕng hơgăt kiơ̆ kơ tơlei pơtŏ.

¹⁹ Sư weh pơtŏ gah bơmơ̆t, đei pơđăm hơgăt kiơ̆ kơ tơlei pơtŏ.

²⁰ Thoi noh sư pơtŏ puăn pah jum dăr kơ cham hnam akŭm tor pơđăm-hrĕng hơgăt, wơ̆l pơđăm-hrĕng hơgăt; tơnăr âu plah sơlam anih 'lơ̆ng rơgoh păng anih hmă.