Êsêkiên 40 - Sơ̆p Hlabơar Nơ̆r 'Bok Kei-DeiTơdrong tơ'bôh gah hnam akŭm 'nao 1 Lăm sơnăm mă 'bar-jĭt pơđăm đơ̆ng rŏng kơ lu nhôn pơm bơnă, sơnăm blŭng-a, năr mơjĭt lăm khei, noh trŏ mơjĭt-puăn sơnăm đơ̆ng rŏng kơ pơlei Jêrusalem đe blah iŏk, Lăm năr noh ti Kră Yang chro kơpal inh păng Kră Yang chông ba inh năm tơ noh. 2 Lăm tơdrong tơ'bôh đơ̆ng Kră Yang 'Bok Kei-Dei, Sư chông ba inh năm tơ char Isơrael păng dan inh 'bơ̆t kông kơjung, kơpal kông. Gah gơal kông noh 'bôh đei minh pôm pơlei. 3 Kră Yang chông ba inh năm tơ noh, inh 'bôh rup minh 'nu bơngai thoi kơthao kong. Bơngai noh chĕp minh dăng tơlei păng 'long pơtŏ dơ̆ng 'bơ̆t 'măng jang. 4 Bơngai noh khan kơ inh: Ơ kon bơngai athei lăng mă hơlen, athei mơ̆ng mă nhen tôm tơdrong mă inh gô tơ'bôh ăn kơ ih yua kơ ih năm tơ âu wă kơ lăng dôm tơdrong âu. Thoi noh tôm tơdrong ih 'bôh athei roi ăn kơ adrĕch Isơrael. 5 To, đei dur tơ 'nguaih jum dăr kơ anih hnam akŭm. Bơngai noh chĕp 'long pơtŏ kơjung tơdrâu hơgăt minh hơđa. Lăm rim hlok kơjung hloh kơ hlok hmă minh hơđa. Bơngai noh pơtŏ hơ'bơ̆l dur minh hlok, kơjung minh hlok. 6 Sư năm tơ măng jang gah hơlĕch, sư tŏk rim kơnao wă pơtŏ kơtơ̆n 'măng, wơ̆l minh hlok. 7 Lu anih gak tor minh hlok păng wơ̆l minh hlok, dur tŏk-bŏk lăm lu anih gak să pơđăm hlok; 'măng kơdeng lăm wơ̆l să minh hlok. 8 Sư pơtŏ kơdeng, gah lăm 'măng jang minh hlok. 9 Bơngai pơtŏ kơdeng 'măng jang đei tơhngam hơgăt păng lu jrăng tơjră 'bar hơgăt; kơdeng lăm 'măng jang tơklă gah hnam akŭm, 10 Lu anih gak 'bơ̆t 'măng jang tơ gah 'ngiĕo đei pêng tŏ anih gak păng tơ gah 'ma đei pêng. Lu anih noh lei-lăi păng lu jrăng tơ minh pah tŏ ăi lei-lăi. 11 Sư pơtŏ trong mơ̆t tơ 'măng jang wơ̆l đei mơjĭt hơgăt păng tor 'măng jang noh mơjĭt-pêng hơgăt. 12 'Bơ̆t anăp rim anih gak đei war găn să kơjung sư minh hơgăt; păng anih gak rim pah đei tơdrâu hơgăt. 13 Sư pơtŏ 'măng jang đơ̆ng pơbŭng anih gak âu, truh tơ pơbŭng anih gak pah to să 'bar-jĭt pơđăm hơgăt; lu trong mơ̆t tơklă băl. 14 Sư pơtŏ lu jrăng gah cheng đei tơdrâu-jĭt hơgăt. Puăn pah 'măng jang đei cham tăp dăr. 15 Đơ̆ng anăp 'măng jang iŏk đơ̆ng trong mơ̆t truh tơ tôch kơdeng lăm 'măng jang đei pơđăm-jĭt hơgăt. 16 Lu anih gak păng lu jrăng cheng đei 'măng-'mŏk tăp dăr gah lăm kơ 'măng jang jum dăr kơ kơdeng kư̆m đei 'măng-'mŏk tơ gah lăm păng lăp dăr kơ jrăng đei chhơ̆ rup 'long gol. 17 Sư chông ba inh năm tơ cham gah 'nguaih, tơ noh đei lăm lu anih, pơm hơnă păng tơmo jum dăr kơ cham; đei pêng-jĭt tŏ anih pơm tơklă hơnă păng tơmo. 18 Hơnă pơm hăm tơmo pơm pơroh rok kiơ̆ truh tơ lu măng jang, wơ̆l sư hơtŏ kơ tor 'măng jang. Noh hơnă tơmo cham ala. 19 Sư pơtŏ wơ̆l cham kơjung iŏk đơ̆ng anăp 'măng ala truh tơ anăp 'nguaih kơ cham lăm đei minh-hrĕng hơgăt, gah hơlĕch păng gah yă-nơ̆m lei-lăi. 20 Sư pơtŏ kơ tor păng wơ̆l 'măng jang mơ̆t tơ cham 'nguaih gah yă-nơ̆m. 21 Lu anih gak 'bar pah đei pêng tŏ anih, đei lu jrăng gah cheng păng kơdeng kơjung kơđeh kư̆m lei-lăi kơ 'măng jang mă minh, tor pơđăm-jĭt hơgăt păng wơ̆l sư 'bar-jĭt pơđăm hơgăt. 22 Lu 'măng-'mŏk, lu kơdeng, lu rup 'long gol să iĕ kư̆m lei-lăi kơ 'măng jang gah hơlĕch; đei tơpơh tŏ kơnao tŏk tơ noh păng đei kơdeng tơ anăp noh. 23 Đei minh pôm 'măng jang mơ̆t tơ cham gah lăm, noh tơklă 'măng jang yă-nơ̆m, kư̆m thoi đei ‘măng jang gah hơlĕch. Sư pơtŏ đơ̆ng 'măng jang âu truh tơ 'măng jang to minh-hrĕng hơgăt. 24 Kơplah noh sư chông ba inh năm tơ gah gơal. Tơ noh đei 'măng jang gah gơal. Sư pơtŏ lu jrăng 'măng jang tơ gah to, lu jrăng gah cheng păng kơdeng, să iĕ lu sư kư̆m lei-lăi thoi lu 'măng jang nai. 25 Lu măng jang păng kơdeng tă kơ đei 'măng-'mŏk jum dăr thoi lu 'măng-'mŏk 'măng jang gah to. Tor sư pơđăm-jĭt hơgăt wơ̆l sư 'bar-jĭt pơđăm hơgăt. 26 Kung đei tơpơh hơgăt wă tŏk păng đei kơdeng 'bơ̆t anăp. Rim kơ 'măng-'mŏk đei jrăng gah cheng tă kơ đei chhơ̆ rup 'long gol. 27 Cham gah kư̆m lăm đei 'măng gah gơal. Sư pơtŏ iŏk đơ̆ng 'măng âu truh tơ 'măng to, gah gơal minh-hrĕng hơgăt. 28 Sư anhăk ba inh mơ̆t tơ cham lăm hnam akŭm gah 'măng jang gơal. Sư pơtŏ 'măng gah gơal, să iĕ kư̆m lei-lăi kơ lu 'măng jang gah to. 29 Lu anih gak lu jrăng cheng kơdeng să iĕ kư̆m lei-lăi lu adrol. 'Măng jang păng kơdeng đei 'măng-'mŏk jum dăr; tor pơđăm-jĭt hơgăt, wơ̆l 'bar-jĭt pơđăm hơgăt. 30 Rim 'măng jang jum dăr kơ cham gam lăm đei kơdeng, tor 'bar-jĭt pơđăm hơgăt, wơ̆l pơđăm hơgăt. 31 Kơdeng tơklă gah cham 'nguaih; đei rup 'long gol tơ lu jrăng păng kung đei tơhngam kơnao wă tŏk. 32 Sư ba inh mơ̆t tơ cham lăm gah hơlĕch; sư pơtŏ 'măng jang. 'Măng jang să iĕ sư kư̆m lei-lăi kơ lu 'măng jang adrol. 33 Lu anih gak, lu jrăng gah cheng păng kơdeng să iĕ kư̆m lei-lăi kơ adrol. 'Măng jang hăm kơdeng đei 'măng-'mŏk jum dăr, kơjung tor pơđăm-jĭt hơgăt, wơ̆l 'bar-jĭt pơđăm hơgăt. 34 Kơdeng tơklă gah cham 'nguaih; rim pah jrăng cheng, đei chhơ̆ rup 'long gol păng kung đei tơhngam kơnao wă tŏk. 35 Sư anhăk ba inh mơ̆t tơ 'măng jang yă-nơ̆m; sư pơtŏ 'măng jang, 'măng jang să iĕ kư̆m lei-lăi kơ lu 'măng jang nai. 36 Lu anih gak, lu jrăng cheng păng kơdeng kư̆m lei-lăi kơ adrol. Đei lu 'măng-'mŏk jum dăr. Kơjung tor pơđăm-jĭt hơgăt, wơ̆l 'bar-jĭt pơđăm hơgăt. 37 Kơdeng tơklă gah cham 'nguaih; rim kơ jrăng tơ rim pah đei chhơ̆ rup 'long gol păng kung đei tơhngam kơnao wă tŏk. 38 Đei minh anih đei 'măng jih kơdeng 'măng jang, tơ noh đe ôp tơmam soi 'buh. 39 Lăm kơdeng 'măng jang 'bar pah đei 'bar tŏ gơ'bang, tơ noh đe pơlôch tơmam soi 'buh, tơmam soi huai đơ̆ng tơdrong yoch tơmam soi huai, hăm đơ̆ng pơm glăi. 40 Gah 'nguaih kơ kơdeng 'bơ̆t trong mơ̆t tơ 'măng jang gah yă-nơ̆m, đei 'bar tŏ gơ'bang păng gah to tơ 'măng jang kư̆m đei 'bar tŏ gơ'bang. 41 Puăn tŏ gơ'bang gah âu păng puăn tŏ gơ'bang gah to kơ 'măng jang, akŭm đĭ đei tơhngam tŏ gơ'bang đe yua wă pơlôch lu tơmam soi. 42 Kŭm đei puăn tŏ gơ'bang pơm hăm tơmo blah, wă yua dan hơmet tơmam soi 'buh, tor minh hơgăt minh puăt, wơ̆l minh hơgăt minh puăt, kơjung minh hơgăt, đe dan kơpal noh lu săng wă 'bet pơlôch tơmam soi 'buh păng lu tơmam soi nai. 43 Tơ đei 'long chơgăn să sư minh hơda pơ̆ng tăp dăr gah lăm. Lu 'nhĕm tơmam soi dan kơpal gơ'bang. 44 Tơ cham lăm đei 'bar anih, minh gah cheng kơ 'măng jang yă-nơ̆m, tơklă tơ gah gơal păng đei minh anih dơ̆ng gah 'măng jang hơlĕch, tơklă tơ gah yă-nơ̆m. 45 Sư khan kơ inh: “Anih mă tơklă gơal âu 'măn lê̆ kơ lu 'bok soi mă wei-lăng hnam akŭm. 46 Anih mă tơklă gah yă-nơ̆m 'măn lê̆ kơ lu 'bok soi wei chơnang soi. Noh lu kon drŏ-nglo Sađŏk, lăm lu adrĕch Lêwi gơh năm jê̆ wă bơ̆jang kơ Kră Yang.” 47 Sư pơtŏ cham lăm, tor đei minh-hrĕng hơgăt, wơ̆l đei minh-hrĕng hơgăt, cham dơ'bŭng wơ̆l tor tŏ ăi. Chơnang soi dan 'bơ̆t anăp hnam akŭm. 48 Sư anhăk ba inh mơ̆t tơ kơdeng hnam akŭm păng pơtŏ lu jrăng kơdeng, pơđăm hơgăt gah âu, pơđăm hlok gah to. 'Măng mơ̆t wơ̆l mơjĭt-puăn hơgăt păng tơnăr hơ'bơ̆l gah âu pêng hơgăt, gah to pêng hơgăt. 49 Kơdeng tor 'bar-jĭt hơgăt păng wơ̆l mơjĭt-mônh hơgăt; đei kơnao kung tŏk, cheng lu jrăng đei 'long gơ̆ng gah âu minh, gah to minh. |
©Bahnar Bible Association. All rights reserved.