Êsêkiên 39 - Sơ̆p Hlabơar Nơ̆r 'Bok Kei-Dei

Pơlôch đĭ linh Gôk

¹ Ơ kon bơngai, khan lê̆ adrol blah Gôk, khan bĕ kơ sư: “Kră Yang khan thoi âu: Ơ Gôk pơtao đe Rôs, Mêsêk păng Tubal, Inh blah ih.

² Inh gô pơm kơ ih wơ̆t dơ̆ng, Inh gô chông ih lĕch năm, na ih gô tŏk năm gah yă-nơ̆m, chông ba ih tŏk blah tơ kông groi Isơrael.

³ Inh gô gơ̆ lê̆ hră đơ̆ng ti 'ngiĕo ih păng tơhuŏng lê̆ 'brơ̆m đơ̆ng ti gah 'ma ih.

⁴ Ih păng lu linh ih, hăm đĭ-đăng kon pơlei mă kiơ̆ ih gô pơ̆k kơpal groi kông Isơrael. Inh gô ăn kơ lu sem păr păng lu sem bri kăp sa.

⁵ Ih gô pơ̆k lôch lăm bri, yua kơ Inh khan boih tơdrong noh, Kră Yang khan.

⁶ Inh gô ăn ŭnh soh Magôk, păng lu bơngai mă oei hiôk-hian tơ lu anih đak dơsĭ, na lu sư gô băt Inh boih Kră Yang.

⁷ Inh gô ăn anăn 'lơ̆ng rơgoh Inh tơbăt tơ lăm lu kon pơlei Isơrael Inh păng Inh ưh pă ăn lu sư pơma kơnê̆ kơ anăn 'lơ̆ng rơgoh Inh dơ̆ng. Kơplah noh lu adrĕch adrung gô băt Inh boih Kră Yang, Kră Yang 'Lơ̆ng Rơgoh lăm Isơrael.

⁸ Âu, tơdrong noh wă jê̆ truh sư gô truh, noh năr mă Inh đei khan boih, Kră Yang khan!

⁹ Kơplah noh lu kon pơlei Isơrael mă oei lăm lu pơlei gô lĕch năm iŏk soh lu tơmam tơblah yua wă tơkuh, lu khêl tih iĕ, lu hră păng 'brơ̆m, lu hơlă, tơju, lu sư yua pơm 'long ŭnh tơkuh soh lăm tơpơh sơnăm.

¹⁰ Lu sư ưh pă chă 'long ŭnh tơ chŭn, ưh pă chă 'long ŭnh tơ bri, yua tơmam tơblah wă tơkuh pơm 'long ŭnh, lu sư gô tơgar iŏk đơ̆ng lu bơngai tơgar iŏk đơ̆ng lu sư păng iŏk đơ̆ng lu bơngai mă iŏk đơ̆ng lu sư, Kră Yang khan.

¹¹ Lăm năr noh, Inh gô ăn kơ Gôk minh anih pơm bơsat 'bŭ tơ Isơrael, lăm thŭng mă lu bơngai năm rok wih wơ̆t gah hơlĕch kơ đak dơsĭ; tơ anih 'bŭ noh găn trong lu bơngai năm wih wơ̆t. Gŏt păng đĭ-đăng kon pơlei kiơ̆ sư, đe gô 'bŭ tơ lăm anih noh, đe gô krao thŭng Hamon Gôk.

¹² Lăm tơpơh khei bơngai Isơrael 'bŭ lu sư, wă hơmet rơgoh teh.

¹³ Đĭ-đăng kon pơlei oei lăm char noh gô 'bŭ lu sư, na lăm minh năr ning-mônh Inh pơang lăm kon pơlei noh, năr mă Inh gô pơdah tơdrong ư-ang Inh Kră Yang khan.

¹⁴ Lu sư gô wơh lu bơngai juăt kơ năm dăr trong noh gô chă hăm 'bŭ lu bơngai mă oei oei kơpal teh wă kơ hơmet rơgoh teh. Đơ̆ng rŏng kơ tơpơh khei lu sư pơm tơm năm chơchă.

¹⁵ Mưh lu sư chă dăr 'bôh lu kơting, 'măn lê̆ minh 'bôt, lu sư gô pơdơ̆ng minh tơmam kiơ wă tơdra dĭng truh lu bơngai 'bŭ lu kơting noh tơ lăm pŭng-lŭng thŭng Hamon Gôk.

¹⁶ Đei minh pơlei Hamôna tơ noh. Thoi noh lu sư hơmet rơgoh teh tơ noh.

¹⁷ Gah ih, ơ kon bơngai, Kră Yang khan: Khan bĕ kơ lu sem păr păng lu sem bri akŭm đơ̆ng puăn pah, athei năm akŭm đĭ tơ minh anih pơm phĕt mă inh đei hơmet boih kơ lu iĕm, noh anih pơm yang tih tơ kơpal kông groi Isơrael; lu iĕm gô sa 'nhĕm păng huch pham.

¹⁸ Lu iĕm gô sa sĕch lu bơngai nuih kơtang, huch pham lu yŏng pơgơ̆r tơ ala teh thoi sa sĕch lu triu tơno lu bơbe, rơmo, lu sem dơrong bek tơ char Basan.

¹⁹ Lu iĕm gô sa rơmă dĭng bơ̆l, huch pham dĭng suai, đơ̆ng lu tơmam soi mă Inh đei hơmet ăn kơ lu iĕm.

²⁰ Tơ kơpal gơ'bang Inh, lu iĕm gô sa phĭ lu 'nhĕm seh, lu bơngai chĕp gre aseh, lu linh nuih kơtang păng lu linh hmă, Kră Yang khan.

²¹ Inh gô tơ'bôh tơdrong ư-ang 'lơ̆ng rŏ Inh tơ lăm lu dêh char; đĭ-đăng lu dêh char gô 'bôh tơdrong Inh sek tơlang đei pơm bơih păng tơpang ti Inh dan kơpal lu sư.

²² Đơ̆ng âu tơ anăp, adrĕch Isơrael gô băt Inh boih Kră Yang 'Bok Kei-Dei lu sư.

²³ Đĭ-đăng lu teh đak gô băt adrĕch Isơrael đe chông ba pơm bơnă yua kơ tơdrong yoch lu sư yua kơ lu sư sơngah ưh kơ chu Inh. Yua kơ thoi noh Inh ôn muh măt Inh đơ̆ng lu sư, Inh pơjao lu sư lăm ti lu bơngai ayăt, lu sư gô lôch đĭ-đăng đơ̆ng đao gưm.

²⁴ Inh đei pơm kơ lu sư kiơ̆ kơ tơdrong yoch kơnê̆ 'mê̆-'mach păng tơdrong yoch lu sư pơm păng Inh ôn muh măt kơ lu sư.

²⁵ Na, Kră Yang khan thoi âu: Âu Inh gô ăn kơ lu adrĕch Jakôp wih brŏk; hiôk-hian păng 'mêm mơnat kơ đĭ-đăng lu adrĕch Isơrael, păng gô gar anăn 'lơ̆ng rơgoh Inh.

²⁶ Lu sư gô đei tơdrong mơlâu yua kơ đei pơm yoch hăm Inh, kơplah lu sư oei hiôk-hian lăm char noh ưh kơ đei bu tơhli lu sư.

²⁷ Kơplah Inh chông lu sư wih brŏk đơ̆ng lu kon pơlei, pơpôi akŭm đơ̆ng teh đak lu ayăt kơ lu sư Inh yua lu sư gô tơ'bôh tơdrong 'lơ̆ng rơgoh Inh 'bơ̆t anăp lơ lu dêh char.

²⁸ Lu sư gô băt Inh boih Kră Yang 'Bok Kei-Dei lu sư, mă khan Inh ăn lu sư jing bơnă kơ lu dêh char, mă-lei iŏk wih lu sư tơ char lu sư kơdih, ưh kơ đei lê̆ minh 'nu bơngai bu oei tơ noh.

²⁹ Inh ưh pă ôn muh măt Inh kơ lu sư dơ̆ng, yua kơ Inh gô ăn Yang Bơhngol 'Lơ̆ng Inh kơ adrĕch Isơrael, Kră Yang khan thoi noh.”