Êsêkiên 37 - Sơ̆p Hlabơar Nơ̆r 'Bok Kei-Dei

Thŭng kơting kro

¹ Ti Kră Yang dan kơpal inh; Yang Bơhngol Kră Yang chông ba inh na tơoei inh tŏk-bŏk thŭng dơnă 'bĕnh kơ kơting.

² Sư chông inh nơnăm juang jơ̆p kơ kơting noh; 'bôh tơ lăm thŭng dơnă noh đei kơting lơ păng kro krĕnh boih.

³ Kră Yang khan kơ inh: “Ơ kon bơngai, lu kơting âu hăm oei gơh arih dah ưh?” Inh tơl: “Ơ Kră Yang Ih đĕch băt tơdrong noh!”

⁴ Kră Yang khan kơ inh: “Athei khan lê̆ adrol bĕ kơ kơting 'nâu, khan kơ lu sư: “Ơ lu kơting kro, mơ̆ng bĕ nơ̆r Kră Yang.”

⁵ Kră Yang khan kơ lu kơting noh: “Âu, Inh ăn hơyuh kial jơhngơ̆m arih mơ̆t tơ lăm lu iĕm, na lu iĕm gô arih.”

⁶ Inh gô ăn huan, ăn sĕch tơ lu iĕm păng lom akâu iĕm hăm akar. Inh gô ăn hơyuh kial dui jơhngơ̆m tơ lăm iĕm, na lu iĕm gô arih; păng lu iĕm gô băt Inh boih Kră Yang.

⁷ Thoi noh inh khan lê̆ adrol thoi Kră Yang tơtă kơ inh; kơplah inh oei pơma khan lê̆ đei kơtơ̆ng jơwa re đei teh pơpơ̆; lu kơting tơ bưh băl tơduă kơting hăm kơting.

⁸ Kơplah noh Inh lăng 'bôh đei huan păng sĕch bluh đei akar lom kơting gah 'nguaih, mă-lei ưh kơ đei kial arih tơ lăm lu sư.

⁹ Kră Yang khan kơ inh: Athei khan lê̆ adrol kơ kial arih, ‘ơ kon bơngai, athei khan lê̆ adrol bĕ kơ kial arih khan: ‘Kră Yang khan thoi âu: Ơ kial arih năm bĕ đơ̆ng puăn pah kial mơ̆t dui jơhngơ̆m bĕ tơ akâu lu bơngai lôch wă kơ lu sư arih.’”

¹⁰ Thoi noh inh khan lê̆ adrol thoi Kră Yang tơtă kơ inh; hơyuh kial arih mơ̆t boih tơ lăm lu akâu lôch; lu sư iung arih boih păng dơ̆ng hăm jơ̆ng lu sư kơdih, jing kon bơngai lơlap lơlang thoi minh khŭl linh lơ.

¹¹ Kră Yang khan kơ inh: “Ơ kon bơngai, lu kơting âu boih đĭ kơ adrĕch Isơrael. To, lu sư khan: ‘Kơting lu bơ̆n kro boih, tơdrong hơmĕng lu bơ̆n hiong đĭ boih, lu bơ̆n lôch răm đĭ boih!’

¹² Na, khan lê̆ adrol bĕ, khan kơ lu sư: ‘Kră Yang khan thoi âu: Ơ kon pơlei Inh, Inh gô pơih bơsat lu iĕm, wă hơtŏk lu iĕm đơ̆ng lăm bơsat păng Inh anhăk ba lu iĕm brŏk tơ teh đak Isơrael.

¹³ Ơ kon pơlei Inh, lu iĕm gô băt Inh boih Kră Yang, mưh Inh pơih bơsat lu iĕm păng hơtŏk lu iĕm đơ̆ng lăm bơsat.

¹⁴ Inh gô ăn Yang Bơhngol Inh kơ lu iĕm na lu iĕm gô arih; Inh gô ăn kơ lu iĕm brŏk tơ teh iĕm kơdih na lu iĕm gô băt Inh boih Kră Yang, Inh khan pơkă boih, Inh gô pơm Kră Yang khan.

Dêh char Juđa hăm Isơrael pơgơ̆p

¹⁵ Kră Yang khan kơ inh:

¹⁶ “Ơ kon bơngai, ih athei iŏk minh pôm 'long jra păng chih tơ noh: Juđa păng adrĕch adrung Isơrael pơgơ̆p hăm sư. Athei iŏk minh pôm 'long jra nai dơ̆ng păng chih tơ noh: Jôsep, noh tơmam Êphraim hăm lu adrĕch Isơrael jing pơgơ̆p hơdai.

¹⁷ Iŏk 'bar tŏ 'long jra noh pơm jing minh, wă kơ sư jing minh pôm 'long jra lăm ti ih.

¹⁸ Tơdah lu adrĕch adrung ih đei jet: ‘Ih ưh kơ wă tơblang ăn kơ lu nhôn băt tơdrong noh wă khan kiơ hă?’

¹⁹ Khan bĕ kơ lu sư: ‘Kră Yang khan thoi âu: Âu Inh gô iŏk 'long jra Jôsep wă khan Êphraim hăm lu adrĕch Isơrael pơgơ̆p hăm sư păng gô akŭm tơ 'long jra Juđa jing minh pôm, na 'bar tŏ 'long jra jing minh lăm ti Inh.

²⁰ Chĕp bĕ 'long jra mă ih chih boih noh, tơ'bôh ăn kơ lu sư,

²¹ păng khan bĕ kơ lu sư: Kră Yang khan thoi âu: Inh gô chông ba adrĕch adrung Isơrael đơ̆ng lu char mă lu sư oei, Inh gô akŭm lu sư đơ̆ng jơ̆p kơ dêh char chông ba lu sư wih brŏk tơ char lu sư kơdih.

²² Inh gô akŭm lu sư jing minh adrĕch adrung lăm char noh, tơ kơpal groi kông Isơrael. Lu sư đei minh 'nu pơtao pơgơ̆r đĕch. Lu sư ưh pă đei 'bar adrĕch adrung păng ưh pă klah 'bar tŏ dêh char pơtao dơ̆ng.

²³ Lu sư ưh pă pơm 'mê̆ akâu kơkuh kơ rup yang, lu tơdrong kơnê̆ krưp păng dôm tơdrong yoch glăi. Inh gô dŏng pơklaih lu sư đơ̆ng tơdrong pơ̆k huŏng, mă lu sư hlôi pơm. Inh gô ôp hơrao lu sư, lu sư jing kon pơlei pơla Inh, Inh jing Kră Yang 'Bok Kei-Dei lu sư.

²⁴ Đĭch đam Inh Đawit pơtao lu sư. Lu sư gô đei minh 'nu bơngai wei; lu sư gô năm kiơ̆ nơ̆r Inh tơtă; lu sư gô wei răk păng pơm kiơ̆ khôi juăt Inh.

²⁵ Lu sư gô oei arih sa lăm char mă Inh ăn kơ Jakôp đĭch đam Inh char mă 'bok yă lu sư oei sơ̆. Lu sư, kon sâu lu sư, gô oei tơ noh ling-lang; đĭch đam Inh Đawit jing pơtao lu sư hlŏng hloi.

²⁶ Inh gô pơm tơdrong pơgơ̆p hiôk-hian hăm lu sư, noh pơgơ̆p ling-lang lu sư hăm Inh, Inh gô ăn kơ lu sư jing rai lơ. Inh gô 'măn anih rơgoh Inh tơ lăm lu sư ling-lang hlŏng hloi.

²⁷ Hnam rơgoh Inh gô oei tơ lăm lu sư, Inh jing Kră Yang 'Bok Kei-Dei lu sư, lu sư jing kon pơlei pơla Inh.

²⁸ Mưh Inh 'măn anih rơgoh Inh oei tơ lăm lu sư ling-lang hlŏng hloi, lu dêh char gô băt kơ Inh boih Kră Yang, Inh boih tơplih kon pơlei Isơrael jing rơgoh.’