Êsêkiên 32 - Sơ̆p Hlabơar Nơ̆r 'Bok Kei-Dei

Nhơ̆m hmoi kơ Pharaôn

¹ Sơnăm mơjĭt-'bar, năr minh khei mơjĭt-'bar, Kră Yang khan kơ inh:

² “Ơ kon bơngai, athei nhơ̆m hmoi kơ Pharaôn pơtao Êyiptơ, khan bĕ kơ sư: ‘Ih nhen thoi dăm-brang lăm lu dêh char, ih kư̆m thoi sem brem kơnê̆ lăm đak dơsĭ, pơm kơ lu đak glung tơprah, ih wơ̆r đak hăm jơ̆ng, pơm kơ lu đak glung jing gơsŏk.

³ Kră Yang khan thoi âu: Inh gô dăng hơnhuăl tơ ih, kơplah đei lu kon pơlei akŭm; lu sư gô dui ih tơ lăm hơnhuăl Inh.

⁴ Inh gô klơ̆m hŭt ih tơ teh păng hŭt lê̆ ih tơ bri na Inh gô ăn kơ lu sem păr kôp tơ ih păng lu sem bri gô sa ih phĭ hrăp.

⁵ Inh gô lê̆ sĕch ih tơ kơpal kông păng akâu ôm ih 'bŭ kơlơ̆p 'bĕnh kơ thŭng thong.

⁶ Inh gô ăn pham ih ro 'bĕnh kơ teh, truh tơ rim kông păng lu thong đak 'bĕnh kơ akâu ih.

⁷ Kơplah Inh pơlôch ih, Inh pĕng klơ̆p lê̆ plĕnh pơm kơ sơnglŏng măng mu. Inh gô pĕng klơ̆p lê̆ măt 'năr hăm hơmơ̆l păng măt khei kư̆m ưh kơ đei hơdah dơ̆ng.

⁸ Inh gô ăn kơ lu tơdrong hơdah kơpal plĕnh jing măng mu tơ ih; Inh gô ăn măng mu truh tơ lăm char ih Kră Yang khan thoi noh.

⁹ Inh gô pơm kơ jơhngơ̆m lơ kon pơlei gô rŭng răng kơplah Inh roi tơdrong wă pơrăm ih tơ lăm lu dêh char, truh tơ lu dêh char tam mă băt.

¹⁰ Inh gô ăn kơ kon pơlei lăng ih, chrêu kơ đon păng pơtao lu sư gô hli tơtơ̆ yua kơ ih; kơplah Inh yơ̆r đao 'bơ̆t anăp lu sư. Lăm năr mă ih pơchah răm lu sư hli tơtey, rim jơ rim 'nu tơtăm kơ tơdrong arih lu sư kơdih.”

¹¹ Kră Yang khan thoi âu: Đao lu pơtao Babilôn gô blah ih.

¹² Inh ăn kơ kon pơlei ih gô pơ̆k kơ đao lu bơngai nuih pran, lu bơngai mă kơnê̆ lăm dêh char. Lu sư gô blah pơrăm tơdrong pơang char Êyiptơ păng đĭ-đăng kon pơlei sư gô pơrăm đĭ.

¹³ Inh gô pơrăm đĭ lu sem dơrong chă sa jih đak glung ro tih, jơ̆ng kon pơlei păng jơ̆ng kơchôp lu sem bri ưh pă kôch pơm kơ đak gơsŏk dơ̆ng.

¹⁴ Kơplah noh Inh gô ăn kơ đak hlăng hơđơ̆ng, păng glung ro thoi đak rơmă Ôliwơ, Kră Yang khan thoi noh.

¹⁵ Mưh Inh ăn kơ char Êyiptơ jing juơ, hơpuih pơgoh đĭ lu tơmam sư đơ̆ng teh păng Inh teh pơlôch lu bơngai oei lăm char noh, kơplah noh lu sư gô băt Inh boih Kră Yang.

¹⁶ Âu boih tơdrong nhơ̆m hmoi; lu sư gô hơri pôk. Lu kon drŏ-kăn lăm jơ̆p kơ dêh char gô hơri 'bai nhơ̆m hmoi noh, lu sư gô hơri 'bai hơri nhơ̆m hmoi kơ char Êyiptơ. Păng ăn kơ đĭ-đăng kon pơlei lu sư, Kră Yang khan thoi noh.”

¹⁷ Lăm sơnăm mă mơjĭt-'bar, khei mônh năr mơjĭt Kră Yang khan kơ inh:

¹⁸ “Ơ, kon bơngai nhơ̆m hmoi bĕ, kơ lu kon pơlei lơlap lăm char Êyiptơ, puh tơlơ̆ bĕ sư hăm đĭ-đăng lu kon drŏ-kăn adrĕch adrung pơang huŏng tơ ala teh sŭng, hơdai hăm lu bơngai jur tơ hơlŭng jrŭ!

¹⁹ Khan bĕ kơ lu sư, ih 'lơ̆ng guăng hloh kơ bu? Jur bĕ năm 'bĭch hơdai hăm lu bơngai ưh kơ kăt tơdra akar.

²⁰ Lu sư gô pơ̆k lôch hơdai lu bơngai mă đe pơlôch hăm đao, dui ba sư hơdai hăm lu kon pơlei lơ lu sư.

²¹ Lu bơngai yŏng nuih kơtang hơdai hăm lu buăl sư đơ̆ng lăm dêh atâu sư khan: ‘Lu bơngai ưh kơ kăt tơdra akar, lu bơngai mă đe pơlôch hăm đao, lu sư jur boih tơ âu 'bĭch hreh tơthĕng.

²² Yŏng Asiri hăm đĭ-đăng kon pơlei sư oei tơ noh, bơsat lu sư jum dăr kơ sư, đĭ-đăng lu sư đe pơlôch hăm đao;

²³ Bơsat lu sư lê̆ tơ lăm sơlŭng jrŭ, lu kon pơlei oei jum dăr kơ bơsat noh, đĭ-đăng lu sư noh đe pơlôch hăm đao; lu bơngai noh boih bơngai mă pơm kơ teh đak lu bơngai arih hli.

²⁴ Elam hăm đĭ-đăng lu sư oei tơ noh, bơsat lu sư tăp dăr; đĭ-đăng lu sư pơ̆k lôch đe pơlôch hăm đao. Lu sư bơngai ưh kơ chu kăt tơdra akar jur lăm bơsat; lu sư bơngai mă hlôi pơm kơ lu char bơngai arih hli tơrơ. Lu sư pŭ iŏk mơlâu hơdai hăm lu bơngai jur lăm sơlŭng jrŭ.

²⁵ Đe pơm ăn boih minh pôm giơng 'bĭch tŏk-bŏk lu bơngai mă đe pơlôch hơdai hăm đĭ-đăng lơlap kon pơlei oei jum dăr kơ bơsat sư. Đĭ-đăng lu sư bơngai ưh kơ đei kăt tơdra akar, đe pơlôch hăm đao yua kơ lu sư pơm kơ char lu bơngai arih hli tơrơ. Lu sư pŭ iŏk mơlâu hơdai hăm lu bơngai jur lăm sơlŭng jrŭ; đe 'măn lu sư hơdai hăm lu bơngai mă đe pơlôch.

²⁶ Mesek hăm Tubal păng đĭ-đăng lu kon pơlei sư oei tơ noh; bơsat lu sư oei jum dăr kơ sư. Đĭ-đăng lu sư ưh kơ kăt tơdra akar ngăl, đe pơlôch hăm đao. Lu sư đei pơm kơ char lu bơngai arih hli tơrơ.

²⁷ Lu sư ưh kơ 'bĭch hơdai ôh hă hăm lu bơngai linh nuih kơtang sơ̆ mă pơ̆k lôch hơdai hăm bơngai ưh kơ đei kăt tơdra akar, lu bơngai mă jur tơ lăm sơlŭng jrŭ hơdai hăm lu tơmam tơblah păng đao tơ ala kơ̆l sư? Mă-lei tơdrong yoch lu sư gô dan tơ kơpal kơting lu sư. Lu linh nuih kơtang âu đei pơm kơ dêh char lu bơngai arih hli tơrơ

²⁸ Mă-lei ih đe gô teh pơrăm ih lôch 'bĭch hơdai hăm lu bơngai ưh kơ kăt tơdra akar, lu bơngai mă đe pơlôch hăm đao.

²⁹ Eđôm kư̆m oei tơ noh, lu pơtao hăm đĭ-đăng lu yŏng sư, mă khan lu sư nuih kơtang ră kư̆m jô̆ hơdai hăm lu bơngai mă lôch kơ đao; lu sư 'bĭch hơdai hăm lu bơngai ưh kơ kăt tơdra akar, lu bơngai mă jur lăm sơlŭng jrŭ.

³⁰ Đĭ-đăng lu yŏng char gah yă-nơ̆m, hơdai hăm đĭ-đăng lu kon pơlei Siđôn oei tơ noh, lu sư pŭ iŏk tơdrong mơlâu jur năm hơdai lu bơngai mă đe pơlôch, mă khan lu sư nuih kơtang pơm kơ đe hli tơrơ ră. Lu sư 'bĭch hơdai hăm lu bơngai ưh kơ kăt tơdra akar lu bơngai mă đe pơlôch hăm đao, lu bơngai mă pŭ tơdrong mơlâu jur tơ lăm sơlŭng jrŭ.

³¹ Pharaôn gô 'bôh lu đe noh, sư gô pơlung kơdih sư, yua kơ đĭ-đăng lơ kon pơlei sư, Pharaôn păng đĭ-đăng lu linh sư, đe pơlôch boih hăm đao, Kră Yang khan.

³² Mă khan Inh lê̆ sư pơm rai dêh tơhli lăm char bơngai arih, Pharaôn hăm đĭ-đăng kon pơlei sư gô tơ'bĭch hơdai hăm lu ưh kơ kăt tơdra akar, hơdai hăm lu bơngai đe pơlôch hăm đao, Kră Yang khan thoi noh.”