Êsêkiên 31 - Sơ̆p Hlabơar Nơ̆r 'Bok Kei-Dei1 Lăm sơnăm mă mơjĭt-mônh, khei pêng, năr mă mônh, Kră Yang khan kơ inh thoi âu: 2 “Ơ kon bơngai khan bĕ kơ Pharaôn pơtao Êyiptơ, păng đĭ kon pơlei sư Tơdrong tih krưp ih wă pơting hăm bu? 3 To, char Asiri thoi 'long hơngo lăm kông Liban, dơng tơ'bla hla hơdrih, yơ̆p să thoi bri, tơm tih kơjung, păng kơnhŏng sư kơjung truh tơ hơmơ̆l. 4 Đak rong wă kơ sư wơ̆, đak glung tih jrŭ pơm kơ sư kơjung; lu đak ro jum dăr kơ anih đe pơtăm sư, lu chơnglah krong ro ruh rim kơ tơnơm 'long tơ bri; 5 Đơ̆ng đak ruh hơiuh na 'long wơ̆ tih kơjung hloh kơ đĭ-đăng lu 'long lăm bri; dơng hla tơ'bla bluh jing, dơng tơ'bla bluh kơjung yua kơ đei đak lăm rơh sư. 6 Lu adrĕch sem păr tơ plĕnh pơm tơpu tơ tơ'bla sư; lu sem bri tuh tơ ala yơ̆p sư păng đĭ-đăng lu adrĕch adrung tih kon bơngai oei lăm yơ̆p sư. 7 Sư jing 'lơ̆ng rŏ yua kơ tơm sư tih kơjung; păng rơh sư sôr jrŭ lăm đak. 8 Lu 'long hơngo lăm pơgar Kră Yang 'Bok Kei-Dei ưh kơ gơh pơting hăm sư mă 'long hơngo hla iĕ nai kư̆m ưh kơ dang sư, ưh kơ đei 'long ayơ lăm pơgar Kră Yang 'Bok Kei-Dei 'lơ̆ng rŏ hơtŏ hăm sư. 9 Inh pơm ăn kơ 'long noh jing 'lơ̆ng rŏ, đei dơng tơ'bla trưp trap. Dĭng mah đĭ-đăng 'long lăm pơgar Êđen, pơgar Kră Yang 'Bok Kei-Dei mah 'ngeng kơ sư. 10 Na Kră Yang khan thoi âu: Yua kơ sư tih kơjung, kơnhŏng kơjung truh tơ hơmơ̆l hăm lu dơng tơ'bla hla trưp trap, lei na jơhngơ̆m sư pơang kơ akâu sư tih kơjung, 11 Inh pơjao sư lăm tơpang ti bơngai yŏng pran kơtang lăm dêh char nai wă kơ bơngai noh pơm kơ sư trŏ thoi tơdrong kơnê̆ sư pơm. Inh achăng lê̆ sư boih. 12 Lu bơngai tơmoi đơ̆ng dêh char pơm kơnê̆ nuih pran kơtang hloh, gô kăl tơpăk lê̆ sư. Lu dơng tơ'bla sư gô huŏng tơ kông hăm tơ lăm lu thŭng; lu dơng sư tơgơ̆ huŏng tơ lăm thong, lu kon pơlei weh ataih pă ngôi yơ̆p păng achăng tŭk lê̆ sư. 13 Lu sem păr gô kôp tơ tơm 'long păk noh, hăm lu sem bri gô oei tơ lăm hơmŭl hla sư noh. 14 Thoi ei na ưh kơ đei 'long ayơ jê̆ đak mă đei chăt kơjung, dah kơnhŏng sư kơjung truh tơ hơmơ̆l păng kư̆m ưh pă đei 'long ayơ mă đei đak ruh hơiuh lơ̆m chăt tih kơjung tih hloh thoi noh yua kơ lu sư đĭ-đăng pơjao kơ tơdrong lôch, jrŭ tơ hơla teh, hơdai hăm lu bơngai yoch mă lôch jur tơ lăm sơlŭng jrŭ. 15 Kră Yang khan thoi âu: Lăm năr mă sư huŏng lăm anih bơngai lôch, Inh ăn kơ lu bơngai nhơ̆m hmoi, Inh klơ̆p lê̆ sơlŭng jrŭ, găn lê̆ lu glung găn lê̆ lu đak ro jăng. Inh ăn kơ kông Liban sơ'ngon yua kơ sư păng đĭ-đăng lu 'long tơ bri jô kro yua kơ sư. 16 Inh ăn kơ lu adrĕch adrung hli tơrơ kơplah kơtơ̆ng tơdrong sư pơchah răm 'bơ̆t Inh tơhuŏng sư tơ anih lôch, hơdai hăm đĭ-đăng lu bơngai huŏng tơ sơlŭng jrŭ! Dang ei đĭ-đăng lu 'long tơ pơgar Êđen, lu 'long 'lơ̆ng đei rơih iŏk lu 'long 'lơ̆ng đơ̆ng kông Liban, đĭ-đăng lu 'long mă đei đak hơiuh lơ̆m, đĭ lu 'long noh đei tơdrong pơlung lăm hơlŭng jrŭ. 17 Lu sư kư̆m huŏng tơ dơnâu ŭnh hơdai hăm sư, hơdai hăm lu bơngai lôch kơ đao gưm lu bơngai tơpôl akŭm băl lăm dêh char lu sư ngôi ala yơ̆p sư. 18 Dôm lu 'long lăm pơgar Êđen, ih nhen thoi 'long ayơ mă tih-tin 'lơ̆ng rŏ? Inh kư̆m gô tơhuŏng ih tơ lăm dơnâu ŭnh hơdai hăm lu 'long lăm pơgar Êđen; ih gô 'bĭch hơdai hăm lu bơngai mă ưh kơ chu kăt tơdra hơkar, hăm lu bơngai lôch kơ đao gưm. Noh Pharaôn păng đĭ-đăng lu kon pơlei sư Kră Yang khan bơih.” |
©Bahnar Bible Association. All rights reserved.