Êsêkiên 30 - Sơ̆p Hlabơar Nơ̆r 'Bok Kei-Dei

Kră Yang sek tơlang char Êyiptơ

¹ Kră Yang khan kơ inh:

² Ơ kon bơngai, athei khan lê̆ adrol thoi âu: Kră Yang khan: Nhơ̆m hmoi bĕ; răm tơpă năr ei kơnh!

³ Yua kơ năr noh wă jê̆ boih, năr Kră Yang wă jê̆ boih. Năr noh năr măng mu năr noh năr đĭ-đăng lu adrĕch adrung lăm teh.

⁴ Đe iŏk đao gô năm blah char Êyiptơ; tơdrong ơh sơ'ngon gô truh lăm char Êthiôp. Lu bơngai mă đe pơlôch gô pơ̆k lăm char Êyiptơ; lu mŭk tơmam đe gô iŏk đĭ păng hơnă anih kơjăp sư đe pơrăm đĭ.

⁵ Bơngai Êthiôpi, bơngai Put bơngai Lut, đĭ-đăng lu bơngai Arabi păng lu bơngai Libi, lu dêh char mă pơgơ̆p hăm bơngai Êyiptơ gô pơ̆k lôch kơ đơ̆ng đao.”

⁶ Kră Yang khan thoi âu: “Lu bơngai mă tơgŭm Êyiptơ gô pơ̆k; jơhngơ̆m pran kơtang mă lu sư ư-ang gô huŏng. Lu sư gô pơ̆k huŏng yua kơ đao tơ noh, iŏk đơ̆ng Mikdôl truh tơ Aswan, Kră Yang khan thoi noh.

⁷ Lu sư gô jing juơ rơhiăng, lăm lu char jum dăr đĭ juơ rơhiăng păng pơlei lu sư gô pơchah răm tŏk-bŏk lăm lu pơlei pơchah răm.

⁸ Na lu sư gô băt Inh boih Kră Yang, kơplah Inh ăn ŭnh sa tơ char Êyiptơ păng lu bơngai mă tơgŭm lu sư kư̆m pơchah răm.

⁹ Lăm năr noh, đei lu bơngai lĕch đơ̆ng Inh tŏk duk năm roi tơhli tơdrong krưp kơ lu bơngai Êthiôpi kơplah oei hiôk-hian. Lu sư gô sơ'ngon tơtăm lăm năr răm truh tơ Êyiptơ; yua kơ năr noh jê̆ truh boih!”

¹⁰ Kră Yang khan thoi âu: Inh gô yua tơpang ti Nebukatnessar, pơtao Babilôn, wă pơlôch khŭl kon pơlei Êyiptơ.

¹¹ Sư hăm lu linh sư jing kơnê̆ dêh hloh kơ lu bơngai nai lu sư, gô truh wă pơrăm teh. Lu sư gô toh đao blah Êyiptơ, teh noh gô 'bĕnh kơ bơngai mă đe pơlôch.

¹² Inh gô ăn kơ đak krong hrơ̆ păng tĕch ăn teh đak kơ lu bơngai kơnê̆. Inh gô yua ti lu kon tơmoi pơm kơ teh noh hăm lu tơmam lăm noh jing răm pă đei. Inh boih Kră Yang khan nơ̆r 'nâu.

¹³ Kră Yang khan: “Inh gô pơrăm lu rup yang păng pơrăm pơđĭ pơgoh lu rup yang đơ̆ng pơlei Nôp. Lăm char Êyiptơ ưh pă đei yŏng pơgơ̆r dơ̆ng; Inh gô ăn tơdrong hli krưp kơ lu bơngai lăm char Êyiptơ.

¹⁴ Inh gô pơm ăn kơ tơring Phatrôs jing răm pă đei; ăn ŭnh sa tơ pơlei Sôan păng phak pơlei Thêbes.

¹⁵ Inh gô tuh hil kơ pơlei Sin, pơlei mă kơjăp lăm char Êyiptơ păng pơrăm kon pơlei Thêbes

¹⁶ Inh gô soh char Êyiptơ, pơlei Sin gô jĭ tơpă pă kĕ pơmat-tat; pơlei Na gô pơrăm pơchah đĭ, pơlei Thêbes gô tơ'bơ̆p tơdrong tơblah rim năr.

¹⁷ Lu kon tơdăm pơlei Heliôpolis păng pơlei Phibêsêt gô lôch răm kơ đao păng lu kon adruh gô pơm bơnă.

¹⁸ Tơ pơlei Tahpanhes, kơ'năr đei măng mu kơplah Inh gô pơrăm lê̆ 'long ăt char Êyiptơ; tơ noh jơhngơ̆m pran pơang lu sư gô pơrăm đĭ pă đei. Hơmơ̆l găm gô klơ̆p gom char noh, lu kon pơlei sư gô pơm bơnă.

¹⁹ Inh gô phak char Êyiptơ păng lu sư gô băt Inh boih Kră Yang.

²⁰ Sơnăm mơjĭt-mônh, năr tơpơh khei mônh, Kră Yang khan kơ inh:

²¹ “Ơ kon bơngai, Inh gơ̆ lê̆ boih ti Pharaôn, pơtao Êyiptơ. Âu, sư ưh pă gơh pơ̆n ming hơmet wă kơ klaih; wă kơ pran dơ̆ng wă kơ gơh chĕp đao.

²² Na Kră Yang khan thoi âu: Âu, Inh blah Pharaôn pơtao Êyiptơ gô gơ̆ lê̆ 'bar pah ti sư, đao đơ̆ng ti sư gô huŏng tơ teh.

²³ Inh gô ăn kon pơlei Êyiptơ gô tơklah tơklang oei tơ lăm adrĕch adrung nai păng tơ lăm lu char nai.

²⁴ Inh gô ăn kơ ti pơtao Babilôn pran păng ăn đao Inh lăm ti sư; Inh gô gơ̆ lê̆ ti Pharaôn, pơtao Êyiptơ na sư gô hmoi ôr 'bơ̆t anăp pơtao Babilôn thoi minh 'nu bơngai rơka ôr wă jê̆ lôch.

²⁵ Inh gô ăn kơ ti pơtao Babilôn jing pran kơtang. Mă-lei lu ti Pharaôn gô huŏng. Na lu sư gô băt Inh boih Kră Yang. Inh ăn boih đao lăm ti pơtao Babilôn păng sư yơ̆r đao blah char Êyiptơ.

²⁶ Inh gô ăn kơ kon pơlei Êyiptơ tơklah tơklang oei tơ lăm adrĕch adrung đe, ăn lu sư chă oei jơ̆p kơ teh đak. Na lu sư gô băt Inh boih Kră Yang.