Êsêkiên 26 - Sơ̆p Hlabơar Nơ̆r 'Bok Kei-Dei

Khan lê̆ adrol blah pơlei Tirơ

¹ Lăm sơnăm tăl mơjĭt-mônh, năr blŭng-a lăm khei, Kră Yang khan kơ inh:

² “Ơ kon bơngai, yua kơ pơlei Tirơ pơma 'bơm gah Jêrusalem: “Ah ha! 'Măng jang lu kon pơlei pơla pơchah đĭ boih! Sư pơih ăn kơ inh boih; inh gô rai tih să, na sư răm đĭ bơih.

³ Thoi noh, Kră Yang khan: Ơ Tirơ! Âu, Inh wă phak ih. Inh gô ăn lơ teh đak iung blah ih, nhen thoi đak dơsĭ poh-yă.

⁴ Lu sư gô pơrăm dur pơlei Tirơ păng teh pơchah lê̆ hnam gak kơjung. Inh gô hơpuih kôch pơgoh lu teh đơ̆ng lăm pơlei, lê̆ sư jing kông tơmo.

⁵ Sư gô jing anih đe sơ̆k hơnhuăl tŏk-bŏk đak dơsĭ; yua kơ Kră Yang khan: Inh khan boih sư jing tơmam lu dêh char đe blah tơgar iŏk.

⁶ Lu kon pơlei sư oei tơ chŭn mir đe gô pơlôch hăm đao; păng lu sư gô băt Inh boih Kră Yang.

⁷ Kră Yang khan thoi âu: Âu, Inh gô chông Nebukatnessar, pơtao Babilôn đơ̆ng gah yă-nơ̆m, pơtao kơ lu pơtao, hăm lu linh, lu linh hao aseh hăm lu linh hao gre aseh lơ, năm blah pơlei Tirơ.

⁸ Sư gô yua đao pơlôch lu kon pơlei ih tơ lăm chŭn mir, Sư gô bơ̆ bơnơ̆ ter dur păng hiŏng khêl blah ih.

⁹ Lu sư gô yua gơ'beng bơsei pơrăm dur pơlei păng yua mut teh pơchah lu hnam gak kơjung ih.

¹⁰ Aseh lu sư lơ tơpă dĭng mah 'mui teh đơ̆ng jơ̆ng sư yak klơ̆p đĭ ih thoi hơmơ̆l. Lu dur pơlei ih pơpơ̆ yua kơ đơ̆ng tơtơ̆ng jơ̆ng lu linh hao aseh, lu linh gre aseh lu sư gô mơ̆t rok 'măng jang ih, nhen thoi mơ̆t lăm pơlei dur đe pơrăm đĭ bơih.

¹¹ Kơchôp jơ̆ng aseh gô pơjuă pơrăm pơlei ih; lu sư gô pơlôch kon pơlei ih hăm đao, hăm lu jrăng kơjăp ih gô prưk păk tơ teh.

¹² Khŭl lu linh gô blah tơgar iŏk mŭk tơmam ih, iŏk đĭ dôm tơmam ih đei, pơrăm đĭ dur pơlei; lu sư gô pơrăm anih hnam 'lơ̆ng ih păng klơ̆m lê̆ lu tơmo, 'long păng teh ih tơ lăm đak dơsĭ.

¹³ Inh gô pơm kơ nơ̆r hơri ih kơtĕch, đe ưh pă kơtơ̆ng re brŏ dung ih dơ̆ng.

¹⁴ Inh gô pơm kơ ih jing tơmo ih gô jing anih đe sơ̆k hơnhuăl; ưh pă đei gơh man pơdơ̆ng ming dơ̆ng; yua kơ Inh boih Kră Yang hlôi khan, Kră Yang khan thoi noh.

¹⁵ Kră Yang khan kơ pơlei Tirơ thoi âu: Kơtơ̆ng tơdrong ih pơchah răm lu bơngai jĭ ôr tơngưih, kơplah đe oei pơlôch tơ lăm ih, lu bŏl đak kơtơ̆ng thoi noh lu sư gô ưh kơ hli tơtơ̆ hă?

¹⁶ Đĭ-đăng lu yŏng lăm dêh char jê̆ đak dơsĭ, gô jur đơ̆ng tang-dŏ lu sư. Plôh ao tai păng hơleh hŭt lu ao reng. Lu sư pŭ iŏk tơdrong hli tơrơ păng oei tơ ala teh tơtơ̆. Lu sư gô hli yua kơ tơdrong truh tơ ih.

¹⁷ Lu sư nhơ̆m hmoi kơ ih păng khan kơ ih: Ơ pơlei mă đei ư-ang liơ ih răm đĭ, pơlei lu bơngai mă oei tơ đak dơsĭ, ih păng lu kon pơlei ih oei kơjăp mơdrŏng lăm đak dơsĭ. Ih păng đĭ-đăng bơngai tơ noh pơm kơ đe hli.

¹⁸ Dang ei lu bơngai oei jih đak dơsĭ hli tơrơ lăm năr ih răm pơchah păng lu bŏl lăm đak dơsĭ tơtơ̆ tơtey yua kơ ih răm rai đĭ.

¹⁹ 'Nâu nơ̆r Kră Yang khan: Mưh Inh pơm kơ ih jing juơ tơtŭng, nhen thoi pơlei ưh kơ đei bơngai oei: Mưh Inh ba anih jrŭ păng đak tih lơ̆p ih,

²⁰ Kơplah noh Inh gô tơjur ih tơ lăm sơlŭng jrŭ hơdai hăm kon pơlei oei chăl sơ̆. Inh gô ăn kơ ih oei tơ anih jrŭ lăm teh sŭng hơdai hăm lu bơngai răm rai chăl sơ̆. Thoi noh, na kon pơlei ưh pă đei oei lăm ih dơ̆ng; ih kư̆m ưh kơ đei oei lăm teh lu bơngai arih mơ̆n.

²¹ Inh gô chông ih tơ anih đei tơdrong pơmat-tat, hli krưp. Ih gô ưh pă đei dơ̆ng; mă đe chă ih, pă 'bôh ih dơ̆ng. Kră Yang khan thoi noh.