Êsêkiên 24 - Sơ̆p Hlabơar Nơ̆r 'Bok Kei-Dei

Tơdrong pơrăm pơlei Jêrusalem

¹ Lăm sơnăm tăl mă tơsĭn, 'năr mơjĭt khei mơjĭt, đei nơ̆r Kră Yang khan kơ inh:

² “Ơ kon bơngai, chih bĕ năr âu, yua kơ trŏ kơ năr âu, pơtao Babilôn wang pơlei Jêrusalem.

³ Pơma bĕ nơ̆r pơtih gia kơ lu adrĕch arăng kơ̆l noh; Kră Yang khan thoi âu: Hơtŏk bĕ gŏ păng tuh đak.

⁴ Tah 'nhĕm sĕch lăm gŏ đĭ-đăng 'nhĕm 'lơ̆ng, sĕch blu păng sĕch hơngiĕng, tah 'bĕnh kơ gŏ lu kơting 'lơ̆ng.

⁵ Athei rôp iŏk sem dơrong ayơ mă 'lơ̆ng hloh lăm khŭl, dan kơting pơm 'long ŭnh ala kơ gŏ. Rơ̆ sư mă tŏ blôk kư̆m rơ̆ hơtŭk kơting lăm gŏ noh.’”

⁶ Na Kră Yang khan thoi âu: Răm-'băm kơ lu pơlei đei tuh pham, pơlei noh thoi gŏ đĭ gơsang sa, gơsang ôp pă tơkloh boih! Athei iŏk minh hlak minh hlak ưh pă ngĕ kơ rơih iŏk kiơ dơ̆ng.

⁷ Pham oei đom lăm pơlei noh, yua kơ lu sư pơlôch đe tuh pham tơ kơpal tơmo blat; ưh kơ tuh lê̆ pham lăm teh wă kơ 'mui teh klơ̆p lê̆ đĭ.

⁸ Inh lê̆ pham tuh tơ kơpal tơmo blat wă ưh kơ đei kiơ klơ̆p, wă kơ Inh 'bôh hil mĭl păng pơm mong.

⁹ Na Kră Yang khan: “Răm-'băm kơ pơlei đei tuh pham! Inh gô akŭm 'long ŭnh lơ hloh.

¹⁰ Iŏk bĕ 'long ŭnh mă lơ wă kơ tơkuh ŭnh, pai 'nhĕm mă klĭ bluch, tah thim tơmam wă 'băt păng lê̆ ŭnh sa đĭ kơting.

¹¹ Dan bĕ gŏ hoh kơpal ŭnh ngar wă kơ gŏ blôk tŏ, wă kơ mam kong ngur păng wă kơ sang-sa goh đĭ.

¹² Pih pang gleh hrat đĕch; gơsang sa hơ'bơ̆l oei ưh kơ tơkloh đĭ đơ̆ng lăm gŏ, mă dan 'buh lăm ŭnh ră!

¹³ Tơdrong 'mê̆-'mach ih pơm pơyô kư̆ kă, Inh wă ôp rơgoh ih, mă-lei ih ưh kơ wă tơdrong 'mê̆-'mach ih ôp rơgoh, lei ih ưh pă gơh ôp rơgoh bơih dĭng layơ tơdrong inh hil ngach 'mơ̆i.

¹⁴ Inh bơih Kră Yang, đei khan dôm tơdrong noh gô truh, Inh gô pơm. Inh ưh kơ gơ̆t lê̆ ti, ưh kơ hmach, ưh kơ tơplih. Inh gô sek kiơ̆ kơ trong ih năm păng kiơ̆ kơ tơdrong jang ih, Kră Yang khan thoi noh.

Akăn Êsêkiên lôch

¹⁵ Kră Yang khan kơ inh:

¹⁶ “Ơ kon bơngai, âu, Inh wă jê̆ iŏk lê̆ tơdrong chơt hiôk đơ̆ng măt ih; mă-lei ih 'nĕ kơ ơh sơ'ngon; 'nĕ pă nhơ̆m păng 'nĕ kơ lĕch đak măt.

¹⁷ Hmoi bĕ, mă-lei 'nĕ kơ ôr re, 'nĕ pă hmoi ơh kơ bơngai lôch; chô̆ bĕ che tơ kơ̆l, 'bot bĕ chơkhŏ ih. 'Nĕ kơ gom 'bơ̆r ih păng 'nĕ sa 'bĕng đơ̆ng lu bơngai năm hơpong pơlung.”

¹⁸ Na pơgê inh pơma hăm lu kon pơlei; truh kơsơ̆ akăn inh lôch. Pơgê năr đơ̆ng rŏng inh pơm kiơ̆ thoi nơ̆r khan boih kơ inh.

¹⁹ Kon pơlei khan kơ inh: “Ih ưh kơ roi tơbăt ăn kơ lu nhôn tơdrong mă ih pơm thoi noh wă khan kiơ?

²⁰ Inh khan kơ lu sư: “Đei nơ̆r Kră Yang khan kơ inh:

²¹ Khan bĕ kơ adrĕch Isơrael: 'Nâu nơ̆r Kră Yang khan: Âu, Inh gô pơm 'mê̆-'mach kơ anih 'lơ̆ng rơgoh Inh, noh anih kơđông kơjăp lu iĕm gơnang, tơdrong chơt hiôk kơ măt lu iĕm. Jơhngơ̆m lu iĕm 'maih wă. Kon drŏ-nglo kon drŏ-kăn lu iĕm mă lê̆ bơih gô pơ̆k lôch kơ đao.

²² Lu iĕm gô pơm thoi inh hlôi pơm; lu iĕm ưh kơ gom 'bơ̆r păng 'nĕ sa 'bĕng lu bơngai năm hơpong pơlung.

²³ Chô̆ bĕ che tơ kơ̆l, 'bot bĕ chơkhŏ; 'nĕ pă hmoi ơh, 'nĕ pă nhơ̆m; mă-lei gô ơh sơ'ngon jing hơkĕ kơ tơdrong yoch kơdih păng lu iĕm gô sơ'ngon hơdai.

²⁴ Êsêkiên jing tơdra kơ lu iĕm, tơdrong mă sư hlôi pơm boih, lu iĕm gô pơm thoi noh. Tơdah tơdrong 'nâu truh, kơplah noh lu iĕm gô băt Inh boih Kră Yang.

²⁵ Gah ih, ơ kon bơngai, lăm năr Inh gô iŏk lê̆ kơđông kơjăp lu sư, tơdrong chơt hiôk, tơdrong ư-ang, tơdrong chơt hiôk kơ măt lu sư, tơdrong jơhngơ̆m lu sư hơpơi wă hăm kon drŏ-nglo kon drŏ-kăn lu sư,

²⁶ lăm năr noh gô đei bơngai klaih hlôi năm roi tơbăt kơ ih.

²⁷ Năr noh, 'bơ̆r ih gô pơih pơma hăm bơngai mă kơdâu hlôi noh, ih ưh pă kơmlo dơ̆ng; ih jing pơm tơdra kơ lu sư păng lu sư gô băt Inh boih Kră Yang.”