Êsêkiên 23 - Sơ̆p Hlabơar Nơ̆r 'Bok Kei-Dei

'Bar 'nu Mai oh pơm yoch

¹ Kră Yang khan kơ inh:

² “Ơ kon bơngai, đei 'bar 'nu drŏ-kăn, đơ̆ng minh pôm mĕ. Pơjing.

³ Bre sư pơm đi lăm char Êyiptơ, bre sư pơm đi đơ̆ng oei 'lơ̆p tơ noh, toh bre sư đe chơpĕt, tơ noh tơdrong hơdruh 'lơ̆ng hơnĭl bre sư đe pơhiah lê̆.

⁴ Mŏ sư anăn Ôhôla păng oh sư anăn Ôhôliba. Lu sư gah Inh, đei pơjing kon drŏ-nglo kon drŏ-kăn. Ôhôla noh jơ̆ pơlei Samari, păng Ôhôliba noh jơ̆ pơlei Jêrusalem.

⁵ Ôhôla pơm đi kơplah mă sư oei gah Inh, sư hưch kơ pơyô sư bơngai Asiri, lu bơngai pơm linh.

⁶ Hrŭk ao dreng hơdrih, yŏng pơgơ̆r linh tơdăm 'lơ̆ng hơbŏ. Linh hao aseh.

⁷ Sư pơm pơyô kư̆ kă hăm lu bơngai noh, đĭ-đăng lu sư tơdăm 'lơ̆ng hơbŏ bơngai char Asiri; sư jao akâu sư kơdih jing 'mê̆-'mach hăm lu rup yang lu bơngai mă sư hưch wă.

⁸ Sư ưh kơ lê̆ tơdrong pơm pơyô kư̆ kă mă sư pơtơm lu bơngai Êyiptơ, đơ̆ng sư oei 'lơ̆p đe 'bĭch hơdai hăm sư boih, đe pơm pơhiah lê̆ hơdruh hơnĭl sư păng tuh tơdrong kơnê̆ 'mê̆ kơ sư.

⁹ Thoi noh Inh jao sư lăm ti lu bơngai sư hưch, noh lăm ti lu bơngai Asiri, lu bơngai mă sư hơyuh hưch dêh.

¹⁰ Lu sư plôh lê̆ hơbĕn ao sư, rôp lu kon drŏ-kăn kon drŏ-nglo sư, na iŏk đao pơlôch sư. Đe phak pơmat sư, sư boih lăm lu drŏ-kăn mă đe roi sa.

¹¹ Oh drŏ-kăn sư Ôhôliba 'bôh thoi noh boih na roi pơm đi kư̆ kă hloh kơ mŏ sư.

¹² Sư hưch kơ lu bơngai Asiri, lu yŏng pơgơ̆r, lu yŏng linh, lu linh hrŭk hơbĕn ao 'lơ̆ng, lu linh hao aseh, đĭ-đăng lu tơdăm 'lơ̆ng hơbŏ.

¹³ Inh 'bôh sư pơm pơ'mê̆ kơdih akâu, 'bar 'nu bre mŏ oh rok kiơ̆ minh trong.

¹⁴ Sư pơm pơyô rai hloh dơ̆ng sư 'bôh rup lu bơngai drŏ-nglo đe chhơ̆ tơ dur pơlei, rup lu yŏng pơgơ̆r char Kalđê đe chhơ̆ hăm đak 'brê;

¹⁵ tơ̆n tơlei tơ̆n tơ kơiĕng păng chô̆ che tơ kơ̆l hyôi hyai, đĭ-đăng lu sư lăng rŏ thoi yŏng linh gre aseh bơngai Babilôn, đơ̆ng char Kalđê

¹⁶ Lăp sư 'bôh lu linh noh, sư hưch dêh, athei bơngai năm truh tơ lu sư lăm char Kađê.

¹⁷ Lu bơngai Babilôn truh 'bĭch hơdai sư. Pơm kơ sư jing 'mê̆-'mach yua kơ pơm đi kơnê̆ hăm lu sư, sư kư̆m pơm pơ'mê̆ akâu kơdih, bơ̆l hăl boih sư weh tơ nai.

¹⁸ Kơplah sư pơdah ngôi kư̆ kă, tơ'bôh tơdrong koh hoh sư, na Inh achăng lê̆ sư, thoi Inh achăng lê̆ mŏ sư.

¹⁹ Mă-lei sư kư̆m rai pơm đi kơnê̆ hloh, 'blŏk kơplah sư oei adruh mơlôh pơm đi ngôi kư̆ kă lăm char Êyiptơ.

²⁰ Sư hưch wă kơ lu bơngai pơm pơyô hăm sư, lu bơngai noh pơm pơyô pran nhen thoi aseh iĕ tơno, pơm đi kơnê̆ thoi aseh tơno tih.

²¹ Sư 'blŏk rŏ kơ oei ngôi kư̆ kă thoi kơplah sư oei adruh mơlôh lăm char Êyiptơ. Đe ngôi pơyô kư̆ kă hăm sư păng chơpĕt toh sư oei adruh mơlôh.

²² Thoi noh, ơ Ôhôliba, Kră Yang khan thoi âu: “Âu, Inh pơtrŭt lu bơngai mă ih hưch, lu bơngai ih weh achăng lê̆ gô blah ih, Inh gô chông ba lu sư đơ̆ng jơ̆p kơ tơring năm tơ ih;

²³ Lu bơngai Babilôn, đĭ-đăng lu bơngai Kalđê, đơ̆ng lu pơlei Pêkôt, Soa păng Koa, păng đĭ-đăng lu bơngai Asiri, hơdai hăm lu sư, tơdăm 'lơ̆ng hơbŏ. Đei lu yŏng pơgơ̆r, yŏng lu linh, lu linh hao aseh, lu linh gre aseh, đĭ-đăng lu sư hao aseh.

²⁴ Lu sư đơ̆ng gah yă-nơ̆m chĕp ba gre aseh tơblah, gre chơ tơmam, hăm lu linh lơ năm blah ih. Lu sư yua khêl, yơ̆l môk kơlăm năm blah ih đơ̆ng rim tơring. Inh gô pơjao ăn kơ lu sư tơdrong gơh sek tơlang păng lu sư gô sek tơlang ih kiơ̆ kơ khôi juăt lu sư.

²⁵ Inh gô blĕk gar hil blah ih, lu sư gô pơm kơ ih hăm tơdrong hil dêh. Lu sư gô kăt muh păng đon ih; lu bơngai oei arih gô lôch kơ đao. Lu sư gô rôp kon drŏ-nglo kon drŏ-kăn ih; lu bơngai oei arih ŭnh gô sa đĭ.

²⁶ Lu sư gô plôh hơbĕn ao ih, lu sư gô iŏk đĭ tơmam pơguăng gĭt đơ̆ng ih.

²⁷ Thoi noh, Inh gô pơtôch lê̆ tơdrong ih pơm đi păng pơm pơyô kư̆ kă mă ih đei chĕp ba đơ̆ng char Êyiptơ, wă kơ ih ưh pă 'maih ngơk lăng păng ưh pă 'blŏk dơ̆ng kơ lu sư tơ char Êyiptơ.

²⁸ Na 'nâu Kră Yang khan: “Âu, Inh gô pơjao ih lăm ti lu bơngai mă ih areh, lăm ti lu bơngai mă jơhngơ̆m ih ơh klai.

²⁹ Lu sư gô iŏk tơdrong areh pơm kơ ih, tơgar iŏk đĭ dôm tơmam đơ̆ng ih jang, lê̆ ih koh hoh, đĭ tơdrong ih koh hoh, ngôi kư̆ kă gô tơ'bôh pơdah tơ 'nguaih.

³⁰ Tơdrong noh gô truh kơ ih, yua kơ ih pơm đi ngôi kư̆ kă hăm kon pơlei lăm lu dêh char. Ih pơm pơ'mê̆ kơdih akâu hăm rup yang lu sư.

³¹ Ih kiơ̆ bơih trong mŏ ih; thoi noh Inh gô ăn pơnhan sư nhă lăm ti ih.”

³² Kră Yang khan thoi âu: “Ih gô nhă pơnhan mŏ ih; pơnhan jrŭ păng să, ih gô jing bơngai đe hiĕk che bơle păng pơjăm yua kơ pơnhan noh mong lơ.

³³ Ih gô suai dêh păng sơ'ngon; pơnhan mŏ ih kon pơlei Samari, jing pơnhan mă hli păng krưp dêh.

³⁴ Ih gô huch pơnhan noh dĭng hrơ̆ đĭ teh pơchah pơnhan noh dĭng hĕch hoch păng iŏk chrek toh ih. Inh Kră Yang đei khan boih, thoi noh.

³⁵ Na Kră Yang khan: “Yua kơ ih hiơt kơ Inh, hŭt lê̆ Inh tơ rŏng, thoi noh ih chu pŭ tơdrong phak lăm tơdrong ih pơm đi, pơm pơyô kư̆ kă.”

³⁶ Kră Yang khan kơ inh: “Ơ kon bơngai, ih gô sek tơlang ưh kơ Ôhôla păng Ôhôliba? Athei roi pơdah kơ lu sư băt tơdrong kơnê̆ krưp lu sư.

³⁷ Lu sư pơm yoch pơm pơyô kư̆ kă păng ti lu sư 'bơm pham; lu sư pơm yoch ngôi pơyô kư̆ kă hăm lu rup yang; păng pơyơ̆r kon lu sư, kon mă lu sư tơpŭ ăn kơ Inh, pơm tơmam sa ăn kơ rup yang.

³⁸ Lu sư kư̆m oei đei pơm yoch tih hloh kơ noh hăm Inh lu sư pơm pơ'mê̆ kơ anih rơgoh Inh păng kư̆m pơm yoch lăm năr Sa'bat Inh.

³⁹ Lu sư pơlôch kon sư kơdih pơyơ̆r kơ rup yang; lăm năr noh lu sư kư̆m mơ̆t lăm anih 'lơ̆ng rơgoh Inh na pơm tơdrong 'mê̆-'mach. Noh tơdrong lu sư pơm boih kơ hnam Inh!

⁴⁰ Hloh kơ noh dơ̆ng lu sư chă krao lu drŏ-nglo đơ̆ng ataih, to lu sư truh boih; yua kơ sư noh na ih hum hơrao, pik muh măt păng pơhrôp pơguăng ih kơdih.

⁴¹ Ih ngôi kơpal giơng 'lơ̆ng rŏ, dan minh tŏ gơ'bang 'bơ̆t anăp đei đak pơgang 'bâu phu Inh noh.

⁴² Đei nơ̆r ôr jreo tơkĕch hiôk-hian đơ̆ng tơpôl bơngai lơ păng bơngai juăt kơ suai đơ̆ng char glă, hơdai hăm lu bơngai hmă. Lu sư tơ'bot kong 'bơ̆t ti lu bơngai drŏ-kăn păng pơyơ̆l môk pơtao 'lơ̆ng tơ kơpal kơ̆l.

⁴³ Na Inh pơma 'bơm bơngai drŏ-kăn kră boih pơm pơyô kư̆ kă noh: Dang ei lu sư oei pơm pơyô kư̆ kă hăm sư ưh?

⁴⁴ Lu sư năm tơ anih sư nhen thoi năm tơ anih pơm đi, na lu sư năm tơ Ôhôla păng Ôhôliba 'bar 'nu bơngai drŏ-kăn pơm pơyô kư̆ kă.

⁴⁵ Mă-lei dôm lu bơngai tơpăt gô sek tơlang tơdrong lu sư pơm pơyô kư̆ kă păng tuh pham pơlôch đe, tơpă lu sư pơm pơyô kư̆ kă păng tuh pham pơlôch đe.”

⁴⁶ 'Nâu nơ̆r Kră Yang khan: Chông lơ bơngai năm pơm kơ lu sư bĕ, pơjao lu sư ăn kơ tơdrong hli păng đe plah tơgar iŏk.

⁴⁷ Tơpôl lơ noh gô klơ̆m tơmo tơ lu sư păng iŏk đao 'bet lu sư, pơlôch kon drŏ-nglo kon drŏ-kăn lu sư, iŏk ŭnh soh hnam lu sư.

⁴⁸ Inh gô pơtôch lê̆ tơdrong pơm pơyô kư̆ kă lăm teh đak âu, wă kơ đĭ-đăng drŏ-kăn gơh băt ưh pă pơm kiơ̆ tơdrong pơm pơyô kư̆ kă thoi lu iĕm dơ̆ng.

⁴⁹ Iĕm gô pŭ tơdrong pơm pơyô kư̆ kă iĕm; lu iĕm gô pŭ tơdrong phak yua kơ kơkuh kơ rup yang, na lu iĕm gô băt Inh boih Kră Yang.