Êsêkiên 22 - Sơ̆p Hlabơar Nơ̆r 'Bok Kei-Dei

Tơdrong yoch pơlei Jêrusalem

¹ Đei nơ̆r Kră Yang khan kơ inh:

² “Ơ kon bơngai, hăm trŏ ih wă sek tơlang, sek tơlang pơlei pơlôch tuh pham noh ưh? Athei ăn kơ lu sư băt tôm yoch kơnê̆ krưp sư.

³ Khan bĕ kơ sư: Kră Yang khan thoi âu: Minh pôm pơlei pơm tuh pham lăm sư, Pơlei pơm lu rup yang pơ'mê̆ kơdih akâu; năr tôch sư truh bơih.

⁴ Ih pơm yoch boih tuh pham pơlôch đe păng pơm lu rup yang pơ'mê̆ kơdih akâu. Thoi noh năr ih wă truh boih păng sơnăm ih jê̆ tôch boih. Lei na Inh pơm kơ ih mơlâu kơ lu kon pơlei đe che bơle tơ jơ̆p dêh char.

⁵ Lu bơngai oei jê̆ păng oei ataih gô che bơle pơjăm ih, minh pôm pơlei đe roi sa dêh tơjrông tơjrang.

⁶ To, lu yŏng Pơgơ̆r Isơrael oei lăm ih, rim 'nu yua tơdrong pran kơtang kơdih pơm tuh pham pơlôch đe.

⁷ Tơ lăm ih đei bơngai, pơjăm mĕ 'bă; pơgŏ pơđep lu tơmoi; pơjuă lu kon mơti pơm kơnê̆ kơ lu bơngai adro.

⁸ Ih pơjăm tơmam rơgoh Inh păng pơm yoch kơnê̆ 'mê̆-'mach lăm năr Sa'bat Inh!

⁹ Lăm ih đei bơngai chă đon hơlĕnh chă pơlôch tuh pham, sa tơmam đe soi kơ yang tơ kơpal kông; arih sa pơm pơyô kư̆ kă.

¹⁰ Lăm ih đei bơngai 'bĭch hăm akăn 'bă sư; đei bơngai pơm kơnê̆ hăm drŏ-kăn kơplah oei 'bôh hơbĕn.

¹¹ Lăm ih đei bơngai pơm yoch ngôi kư̆ kă hăm akăn đe; lu bơngai nai pơm kư̆ kă hăm mŏ mai sư, đei mơ'nah ngôi hăm oh drŏ-kăn sư kon 'bă sư pơjing mĕ pha.

¹² Lăm ih đei bơngai iŏk sa pơgâm wă pơm tơdrong đei tuh pham, ăn đe tŏk iŏk đei iŏk lơi adrol păng iŏk jên kon lơ dêh; ih pơjuă sa lu bơngai jê̆ ih păng ih hiơt kơ Inh, Kră Yang khan thoi noh.

¹³ Inh gô tap ti hil, kơ tơdrong ih iŏk sa lơi dêh păng pơlôch lơ bơngai lăm lu iĕm.

¹⁴ Jơhngơ̆m ih hăm kơjăp, ti ih hăm pran ưh lăm năr Inh sek tơlang ih? Inh boih Kră Yang, Inh hlôi pơma boih Inh gô pơm.

¹⁵ Inh gô pơm kơ iĕm tơklah tơklang jơ̆p kơ teh đak păng Inh gô săi tơraih iĕm tơ jơ̆p lăm khŭl adrĕch adrung nai păng Inh gô pơgoh lê̆ tơdrong 'mê̆-'mach đơ̆ng iĕm.

¹⁶ Đe gô pơjăm ih 'bơ̆t anăp lu teh đak nai, kơplah noh ih gô băt Inh boih Kră Yang.

¹⁷ Kră Yang khan kơ inh:

¹⁸ “Ơ kon bơngai, hăm Inh adrĕch Isơrael noh jing iă đe tŭk đĭ-đăng lu sư jing kong, kem, bơsei, bơlơ̆k lăm ŭnh, jing iă hu đe tŭk.

¹⁹ Lei na Kră Yang khan thoi âu: Yua kơ lu iĕm đĭ-đăng jing iă lu kem, hu âu, Inh gô akŭm lu iĕm tơ lăm pơlei Jêrusalem.

²⁰ Nhen thoi đe akŭm lu hu, kong, bơsei, bơlơ̆k, kem rŭk lăm ŭnh 'buh rơ̆ wă kơ lek thoi yơ, na lăm tơdrong hil păng tơdrong Inh mil, Inh gô akŭm lu iĕm tah lăm ŭnh 'buh rơ̆ wă kơ lek thoi noh.

²¹ Inh gô akŭm pơpôi lu iĕm 'buh lăm ŭnh tơdrong Inh hil mĭl, na lu iĕm gô lek lăm noh.

²² Thoi hu lek lăm ŭnh thoi yơ, na lu iĕm kư̆m gô lek lăm noh thoi noh mơ̆n, na lu iĕm gô băt Inh boih Kră Yang mă tuh boih tơdrong Inh hil mĭl tơ lu iĕm.’ ”

²³ Kră Yang khan kơ inh:

²⁴ Ơ kon bơngai, khan bĕ kơ teh đak. ‘E jing teh đak ưh kơ goh, ưh kơ đei 'mi tih lăm năr Inh hil’.

²⁵ Lu 'bok khan lê̆ adrol lăm lu iĕm đei pơgơ̆p băl nhen thoi dăm-brang grĕnh hơrum sa tơmam đêl lu sư rôp. Lu sư châu sa bơngai, tơtông iŏk lu mŭk tơmam gĭt, pơm kơ lơ bơngai drŏ-kăn jing adro po lăm pơlei.

²⁶ Lu 'bok soi pơm glăi kơ khôi juăt Inh, pơm 'mê̆-'mach kơ tơmam rơgoh Inh. Lu sư ưh kơ băt lăng ayơ rơgoh, ayơ hmă, ưh kơ băt bơtho tơ'bôh ayơ 'mê̆-'mach, ayơ rơgoh. Lu sư tep măt ưh kơ kiơ̆ lu năr Sa'bat Inh, lei na pơm pơ'mê̆ kơ Inh boih lăm lu sư.

²⁷ Lu yŏng pơgơ̆r oei lăm lu sư nhen thoi kŏ-so kăp sa sem bri, pơm tuh pham pơlôch bơngai, wă tơgar iŏk tơmam.

²⁸ Lu 'bok khan lê̆ adrol lu sư ôn tơdrong pơm kơ đe pik kơ lu sư chŭr; 'bôh tơdrong 'bôh hơlĕnh păng hlang lăng hơlĕnh, lu sư khan: Kră Yang khan thoi noh. Mă-lei Kră Yang ưh kơ khan ôh.

²⁹ Kon pơlei oei lăm teh đak pơjuă sa băl, tơtông tơgar iŏk, pơjuă pơđep lu bơngai dơnuh hin pơmat-tat, păng pơjuă pơđep lu bơngai tơmoi ưh pă ăn kơ lu sư đei tơdrong tơpăt.

³⁰ Inh chă lăng minh 'nu bơngai lăm lu sư, wă man pơdơ̆ng ming dur, wă kơ tơplih kơ pơlei, lăm teh đak păng dơ̆ng chĭt bơlôh dur 'bơ̆t anăp Inh, wă kơ Inh huay kơ pơrăm teh đak lu sư; mă-lei Inh chă ưh kơ đei bu.

³¹ Na Inh tuh tơdrong hil mĭl tơ lu sư păng iŏk ŭnh Inh hil soh pơrăm lu sư; Inh gô pơm tơwih tuh tơ kơ̆l lu sư, kiơ̆ kơ trong lu sư pơm. Kră Yang khan thoi noh.