Êsêkiên 2 - Sơ̆p Hlabơar Nơ̆r 'Bok Kei-Dei

Kră Yang krao Êsêkiên

¹ Kră Yang khan kơ inh: “Ơ kon bơngai, dơ̆ng bĕ 'bơ̆t jơ̆ng ih, Inh gô khan kơ ih.

² Lăp Sư pơma hăm inh, Yang Bơhngol mơ̆t lăm inh tơiung inh dơ̆ng hăm jơ̆ng inh, inh kơtơ̆ng Sư khan kơ inh.”

³ Sư khan: “Ơ kon bơngai Inh wơh ih năm tơ adrĕch adrung Isơrael, truh tơ kon pơlei mă ayăt kơ Inh; lu sư păng lu yă 'bok lu sư pơm yoch ayăt hăm Inh mă truh dang ei;

⁴ noh adrĕch adrung kơchu păng arăng kơ̆l, Inh wơh ih năm tơ lu sư, khan kơ lu sư: ‘Kră Yang Tih Hloh khan thoi âu:’

⁵ Mă lu sư mơ̆ng dah ưh, yua kơ lu sư adrĕch adrung ayăt kơ Inh, lu sư kư̆m gô băt, lăm lu sư đei boih 'bok khan lê̆ adrol.

⁶ Gah ih, ơ kon bơngai, 'nĕ kơ hli kơ lu sư păng kư̆m 'nĕ kơ hli nơ̆r lu sư pơma; 'nĕ kơ hli mă khan lu sư thoi jơla suĕng tăp dăr kơ ih păng mă ih oei tŏk-bŏk lu sư thoi hơguăt. 'Nĕ hli kơ nơ̆r lu sư pơma, kư̆m 'nĕ kơ hli tơrơ kơ muh măt krưp lu sư yua kơ lu sư adrĕch adrung ayăt.

⁷ Ih athei khan nơ̆r Inh âu kơ lu sư, mă lu sư mơ̆ng dah ưh, yua kơ lu sư jing adrĕch adrung ayăt.

⁸ Mă-lei ih, ơ kon bơngai, mơ̆ng bĕ Inh khan kơ ih; 'nĕ kơ ayăt thoi lu adrĕch adrung noh, ha bĕ 'bơ̆r ih păng sa tơdrong kiơ mă Inh ăn kơ ih.”

⁹ Na inh lăng, inh 'bôh ti chro truh tơ inh; lăm ti đei minh sơnôm hla bơar.

¹⁰ Sơnôm hla bơar noh bơlang 'bơ̆t anăp inh, đei chih, lăm păng đaih, noh đei chih lu tơdrong nhơ̆m hmoi ơh sơ'ngon păng tơdrong pơmat-tat.