Êsêkiên 19 - Sơ̆p Hlabơar Nơ̆r 'Bok Kei-Dei

Nơ̆r nhơ̆m hmoi kơ lu Yŏng pơgơ̆r Isơrael

¹ Gah ih nhơ̆m hmoi bĕ kơ lu yŏng pơgơ̆r Isơrael

² păng khan: ‘Mĕ ih thoi dăm-brang akăn oei tŏk-bŏk lu dăm-brang; wei rong lu kon sư 'bĭch tŏk-bŏk lu dăm-brang kon.

³ Sư wei rong tơmŏm minh pôm lăm lu dăm-brang kon, noh jing dăm-brang mơlôh, pơjuăt chă rôp kon sem păng sa kon bơngai.

⁴ Đĭ-đăng teh đak kơtơ̆ng ang kơ sư, đe rôp sư, sư puh lăm sơlŭng, đe chô̆ sư hăm glang păng ba sư tơ char Êyiptơ.

⁵ Kơplah dăm-brang akăn băt kơ sư gô đunh, pă đei hơmĕng bơih sư iŏk rong minh pôm kon plơ̆ng dơ̆ng, rong dĭng truh dăm-brang mơlôh.

⁶ Sư chă yak năm hơdai hăm lu dăm-brang jing dăm-brang mơlôh, pơjuăt chă rôp kon sem păng sa bơngai.

⁷ Sư pơrăm lu pơlei kơjăp; păng pơm kơ lu pơlei lu sư jing juơ tơtŭng, teh đak păng kon pơlei oei lăm noh hli ngăl kơ nơ̆r sư ôr gơhuh.

⁸ Lu teh đak đơ̆ng tăp dăr kơ sư iung blah sư, dăng hơnhuăl kơ sư; sư hrơ̆p lăm hơnhuăl lu đe đăk.

⁹ Đe chô̆ sư hăm gơwŏk glang, tah sư lăm bai na năm ba sư tơ char Babilôn; chĭt sư lăm hnam bơnă na huay pă kơtơ̆ng nơ̆r sư ôr tơ kông Isơrael dơ̆ng.

¹⁰ Mĕ ih thoi tơm 'long hơmu lăm pơgar, pơtăm jê̆ đak, đei dơng hla tơ'bla chăt 'lơ̆ng păng đei plei trem yua kơ pơtăm jê̆ đak.

¹¹ Đei dơng sư tih, jing pơm 'long jra pơtao. Tơm sư kơjung, đei tơ'bla hla hơmŭl lơ, đe 'bôh sư kơjung yua kơ đei dơng kơjung hloh kơ lu dơng nai.

¹² Mă-lei sư buch đĭ lăm năr hil mĭl păng klơ̆m lê̆ tơ teh. Kial đơ̆ng hơlĕch tơthu pơm kơ tơm sư kro, plei sư hơlŭng, đĭ dơng tih kư̆m jô kro păng ŭnh sa đĭ.

¹³ Dang ei pơtăm sư tơ char glă lăm teh hrĕng kro ưh kơ đei đak.

¹⁴ Ŭnh lĕch đơ̆ng tơ'bla sư sa đĭ plei noh, thoi noh na ưh pă đei dơng 'lơ̆ng ayơ oei đei, wă yua pơm 'long jra pơtao. Noh tơdrong nhơ̆m hmoi, jing nơ̆r hơri nhơ̆m hmoi.’