Êsêkiên 18 - Sơ̆p Hlabơar Nơ̆r 'Bok Kei-Dei

Bơngai bu pơm yoch gô lôch

¹ Nơ̆r Kră Yang khan kơ inh:

² “Lu iĕm tơchĕng nơ̆r âu pơđơ̆k kơ teh đak Isơrael wă khan kiơ? ‘Chăl 'bă sư sa plei hơmu iŭ, chăl kon hơker hơnĕnh,’

³ Kră Yang khan: Tơpă thoi Inh mă arih, lu iĕm ưh pă yua bơih nơ̆r pơđơ̆k âu lăm Isơrael.

⁴ Yua kơ đĭ-đăng tơdrong arih lăm Inh, tơdrong arih 'bă kư̆m thoi tơdrong arih kon oei lăm Inh ngăl na Bơngai bu pơm yoch gô lôch.

⁵ Pơtih gia bơngai bu tơpăt, pơm tơdrong 'lơ̆ng trŏ tơpăt,

⁶ Sư ưh kơ sa 'nhĕm đe pơm yang tơ kơpal kông, ưh kơ wă lăng tơ rup yang adrĕch Isơrael. Ưh kơ pơm kư̆ kă hăm lu akăn đe, ưh kơ jê̆ lu drŏ-kăn oei 'bôh hơbĕn,

⁷ Ưh kơ pơjuă pơđep bu, pơdrâu tơmam kơ lu bơngai đêl iŏk hre, ưh kơ tơtông tơmam đe, ăn 'bĕng sa kơ lu bơngai pơngot, ăn ao hrŭk kơ lu bơngai koh hoh.

⁸ Ăn kơ đe tŏk iŏk ưh kơ iŏk lơi adrol ưh kơ iŏk lơi lơ, ưh kơ mơ̆t hơdai lu bơngai pơm ưh kơ 'lơ̆ng tơpăt, sek tơlang tơpăt lăm tơduă kon bơngai.

⁹ Chu kiơ̆ khôi juăt păng chu răk nơ̆r Inh tơtă. Bơngai âu arih sa tơpăt, noh jing bơngai tơpăt, sư gô đei tơdrong arih, Kră Yang khan thoi noh.

¹⁰ Tơdah sư đei minh 'nu kon hơ'lơ̆p kơchu pơm tơdrong kơnê̆ đei pơlôch đe tuh pham pơm dôm tơdrong kơnê̆ hăm đe.

¹¹ Mă khan 'bă sư noh ưh kơ đei pơm glăi minh tơdrong kiơ ră, mă-lei kon sư sa tơmam đe soi tơ kơpal kông păng pơm kư̆ kă hăm akăn đe,

¹² pơjuă pơđep bơngai dơnuh hin tơtông tơmam đe păng ưh kơ pơdrâu đêl tơmam đe, lăng tơ rup yang, pơm dôm tơdrong yoch kơnê̆ krưp,

¹³ ăn tŏk iŏk sa lơi adrol păng iŏk lơi lơ, kon sư noh hăm gơh arih ưh? Sư ưh kơ đei arih ôh! Yua kơ sư hlôi pơm yoch dôm tơdrong kơnê̆, tơpă sư gô lôch păng pham sư gô tuh kơ kơ̆l sư.

¹⁴ Mă-lei, tơdah bơngai mă yoch 'nâu sư đei kon drŏ-nglo dơ̆ng, kon sư 'bôh tôm tơdrong yoch 'bă sư hlôi pơm glăi, 'bôh noh sư ưh kơ pơm yoch thoi noh.

¹⁵ Ưh kơ sa 'nhĕm đe soi tơ kơpal kông, sư ưh kơ lăng tơ rup yang adrĕch Isơrael, ưh kơ pơm kơnê̆ hăm akăn đe,

¹⁶ Ưh kơ pơjuă pơđep đe, ưh kơ pơdrâu tơmam đe đêl hre păng ưh kơ tơtông tơmam đe, ăn tơmam sa kơ lu bơngai pơngot, ăn ao hrŭk kơ lu bơngai koh hoh;

¹⁷ Ti ưh kơ đei pơm kơnê̆ kơ lu bơngai dơnuh, ăn kơ đe tŏk iŏk ưh kơ đei iŏk lơi adrol dah iŏk lơi lơ, Chu wei răk nơ̆r Inh tơtă păng pơm kiơ̆ khôi juăt Inh, sư ưh kơ lôch ôh yua kơ tơdrong yoch kơnê̆ đơ̆ng 'bă sư, tơpă sư gô đei tơdrong arih.

¹⁸ Mă-lei 'bă sư pơm yoch pơjuă đe, tơtông tơmam lu 'nhŏng oh sư, pơm ưh kơ 'lơ̆ng lăm pơlei sư, sư gô lôch yua kơ tơdrong yoch kơnê̆ mă sư đei pơm.

¹⁹ Lu iĕm đei jet: “Liơ kon sư ưh kơ pŭ tơdrong yoch kơnê̆ 'bă sư? Dah đei bu pơm 'lơ̆ng tơpăt pơm kiơ̆ khôi juăt Inh, tơpă sư gô đei tơdrong arih.

²⁰ Bơngai bu pơm yoch bơngai noh kơdih sư gô lôch, kon sư ưh kơ đei pŭ tơdrong yoch 'bă sư păng 'bă sư kư̆m ưh kơ đei pŭ tơdrong yoch kơnê̆ kon sư. Tơdrong tơpăt lu bơngai 'lơ̆ng tơpăt gô 'măn kơ lu bơngai tơpăt, tơdrong kơnê̆ lu bơngai pơm kơnê̆ gô tơpŭ tơ lu bơngai pơm kơnê̆ noh.

²¹ Tơdah lu bơngai pơm kơnê̆ băt tơbral đĭ-đăng tơdrong yoch sư hlôi pơm, na wei răk dôm khôi juăt Inh păng pơm tơdrong 'lơ̆ng tơpăt, tơpă sư gô đei tơdrong arih, ưh kơ lôch ôh.

²² Dôm tơdrong yoch mă sư hlôi pơm ưh pă jô̆ boih; đơ̆ng tơdrong sư pơm 'lơ̆ng sư gô đei tơdrong arih.

²³ Kră Yang khan: Inh 'bôh lu bơngai pơm kơnê̆ lôch Inh hiôk hă? Ưh kơ hiôk ôh wă kơ lu sư tơbral tơdrong kơnê̆ lu sư pơm na đei arih.

²⁴ Mă-lei tơdah bơngai tơpăt hŭt lê̆ tơdrong tơpăt sư, na sư pơm yoch kơnê̆ krưp thoi lu bơngai kơnê̆ đei pơm, Sư hăm arih ưh? Dôm tơdrong tơpăt ayơ mă sư pơm boih Inh ưh pă 'blŏk dơ̆ng, sư gô lôch yua kơ tơdrong yoch kơnê̆ mă sư đei pơm.

²⁵ Mă-lei lu iĕm khan: ‘Trong Kră Yang pơm ưh kơ tơpăt!’ Ơ lu adrĕch Isơrael, mơ̆ng bĕ! Trong Inh ưh kơ tơpăt dah trong lu iĕm ưh kơ tơpăt?

²⁶ Tơdah bơngai tơpăt hŭt lê̆ tơdrong tơpăt, na pơm tơdrong kơnê̆, sư gô lôch, sư gô lôch yua kơ tơdrong yoch kơnê̆ sư hlôi pơm boih.

²⁷ Tơdah bơngai mă pơm kơnê̆ hŭt lê̆ tơdrong kơnê̆, tơdrong yoch mă sư pơm boih, na pơm kiơ̆ tơdrong tơpăt tơdrong trŏ, sư gô dŏng pơklaih bơhngol sư đei tơdrong arih ling-lang.

²⁸ Yua kơ sư 'bôh păng tơbral dôm tơdrong yoch kơnê̆ mă sư hlôi pơm, tơpă sư gô đei tơdrong arih păng ưh kơ đei lôch hiong.

²⁹ Adrĕch Isơrael đei khan: Trong Kră Yang ưh kơ tơpăt, Ơ adrĕch Isơrael, trong Inh ưh kơ tơpăt hă? Mă tơpă trong lu iĕm ưh kơ tơpăt.

³⁰ Thoi noh Kră Yang khan: “Ơ adrĕch Isơrael, Inh gô sek tơlang lu iĕm, rim 'nu kiơ̆ kơ tơdrong sư đei pơm. Athei wih tơbral bĕ păng hŭt lê̆ dôm tơdrong yoch kơnê̆ lu iĕm, wă kơ tơdrong kơnê̆ huay kơ pơgăn pơrăm lu iĕm.

³¹ Athei hŭt lê̆ bĕ tơdrong yoch kơnê̆ ataih đơ̆ng lu iĕm mă lu iĕm đei pơm boih, pơm ming bĕ kơ lu iĕm kơdih, jơhngơ̆m 'nao păng tơdrong arih 'nao, ơ adrĕch Isơrael, thoi yơ lu iĕm wă kơ lôch?

³² Kră Yang khan: Tơpă, Inh ưh kơ hiôk ôh kơ tơdrong lôch mă lu iĕm wă lôch, athei tơbral bĕ wă kơ đei tơdrong arih.