Êsêkiên 12 - Sơ̆p Hlabơar Nơ̆r 'Bok Kei-Dei

Tơdrong tơ'bôh gah pơtao Juđa đe rôp pơm bơnă

¹ Đei nơ̆r Kră Yang truh tơ inh:

² “Ơ kon bơngai, ih oei lăm kon pơlei juăt kơ iung blah plơ̆; lu sư đei măt mă ưh kơ 'bôh, đei đon mă ưh kơtơ̆ng, yua kơ lu sư kon pơlei juăt kơ iung blah plơ̆.

³ Thoi noh, ơ kon bơngai, ih athei hơmet tơmam chă jăk păng jăk weh yak kơ'năr 'bơ̆t anăp lu sư, ih athei jăk weh đơ̆ng anih ih oei na jăk tơ nai 'bơ̆t anăp lu sư. Lu sư gô 'bôh bưh. Rŏ lăng lu sư hlôh mă khan lu sư kon pơlei juăt kơ iung blah plơ̆.

⁴ Chĕp ba tơmam ih kơdih thoi đe pơpuh tơjăk kơ'năr 'bơ̆t anăp lu sư; wă kơ lu sư 'bôh; kơsơ̆ ih lĕch yak 'bơ̆t anăp lu sư wă lu sư lăng, ih lĕch yak nơnăm thoi lu bơngai đe pơpuh.

⁵ 'Bơ̆t anăp lu sư, oei lăng ih athei bŏk dur, chĕp tơmam ih lĕch yak rok bơlôh noh.

⁶ 'Bơ̆t lu sư oei lăng ih athei tôi tơmam ih kơpal hơngiĕng, na yak năm lăm kơsơ̆ măng. Athei gom lê̆ muh măt ih wă huay kơ 'bôh teh đak âu yua kơ Inh pơm kơ ih jing tơdra kơ lu adrĕch Isơrael.”

⁷ Inh pơm kiơ̆ thoi Sư pơkă. Inh chĕp tơmam yak tŏk-bŏk kơ'năr thoi lu bơngai weh jăk. Truh kơsơ̆ măng inh bŏk dur hăm ti. Inh tôi tơmam tơ hơngiĕng jăk yak kơsơ̆ măng 'bơ̆t anăp lu sư.

⁸ Kiơ̆ pơgê đei nơ̆r Kră Yang khan kơ inh:

⁹ “Ơ kon bơngai, adrĕch Isơrael jing adrĕch mă 'maih iung tơblah hăm đei jet ih: ‘Ih pơm kiơ thoi noh?’

¹⁰ Khan bĕ kơ lu sư: ‘'Nâu Kră Yang Tih Hloh khan: Nơ̆r tơjur âu pơma gah kon pơtao oei lăm pơlei Jêrusalem păng đĭ-đăng kơ adrĕch Isơrael mă oei tơ noh.’

¹¹ Khan bĕ kơ lu sư: ‘Inh boih jing tơdra kơ lu iĕm. Inh pơm thoi yơ boih, lu sư gô tơ'bơ̆p thoi noh. Đe gô rôp ba lu sư pơm bơnă.

¹² Kon pơtao lăm lu sư gô tôi tơmam tơ hơngiĕng kơdih yak kơmăng. Lu sư bŏk bơlôh dur, sư gô lĕch trong noh. Sư gô gom muh măt wă ưh kơ 'bôh teh đak âu.

¹³ Inh gô dăng hơnhuăl kơ sư, sư gô 'leh hơđong Inh, păng Inh gô chông ba sư tơ Babilôn, teh đak Kalđê. Mă-lei sư ưh kơ 'bôh teh đak noh ôh, sư gô lôch tơ noh.

¹⁴ Lu bơngai oei jum dăr kơ sư păng lu linh sư, inh gô pơm kơ lu sư tơklah tơklang jơ̆p kơ puăn pah, păng Inh gô chĕp đao druh 'moi lu sư.

¹⁵ Lu sư gô băt Inh boih Kră Yang kơplah Inh pơm kơ lu sư tơklah tơklang oei tơ lăm lu adrĕch adrung jơ̆p lăm tơring char păng jơ̆p kơ teh đak.

¹⁶ Mă-lei oei đei bơngai mă Inh ăn klaih đơ̆ng đao, đơ̆ng pơngot, đơ̆ng lôch hơbuh, wă kơ lu sư roi tôm tơdrong krưp kơnê̆ 'mê̆-'mach lu sư kơdih tơ lăm pơlei mă lu sư wă oei; păng lu sư gô băt Inh boih Kră Yang.

¹⁷ Đei nơ̆r Kră Yang khan kơ inh:

¹⁸ “Ơ kon bơngai, ih sa bĕ tơmam lăm tơdrong hli krưp, nhă đak lăm tơdrong hli tơrơ.

¹⁹ Athei khan kơ kon pơlei lăm noh: 'Nâu nơ̆r đơ̆ng Kră Yang Tih Hloh khan kơ kon pơlei Jêrusalem lăm teh đak Isơrael: Lu sư gô sŏng sa lăm tơdrong hli păng nhă đak lăm tơdrong tơrơ, yua kơ đe gô blah tơgar iŏk đĭ tơmam đơ̆ng lăm char lu sư yua kơ tơdrong kơnê̆ pơrăm lu kon pơlei mă oei lăm noh đei pơm.

²⁰ Lu pơlei gô đei lơ bơngai đe pơlôch pơrăm, na teh đak jing juơ rơhiăng, na lu sư gô băt inh boih Kră Yang.’ ”

²¹ Đei nơ̆r Kră Yang khan kơ inh:

²² “Ơ kon bơngai, đei nơ̆r pơđơ̆k lăm teh đak Isơrael thoi âu: “Khei 'năr đĭ hloh, thoi noh tơdrong tơ'bôh ưh pă sĭt! Nơ̆r noh wă khan kiơ?”

²³ Lei na, athei khan kơ lu sư: ‘Kră Yang Tih Hloh khan thoi âu: Inh gô tơhiong lê̆ tơdrong pơđơ̆k âu, ưh pă đei bu gơh yua nơ̆r pơđơ̆k dơ̆ng lăm teh đak Isơrael,’ khan kơ lu sư: ‘'Năr wă jê̆ truh, dôm tơdrong tơ'bôh gô pơsĭt.

²⁴ Tơpă ưh pă đei tơdrong tơ'bôh hơlĕnh, dah tơdrong tơwir ayơ mă đei dơ̆ng lăm adrĕch Isơrael.

²⁵ Yua kơ Inh boih Kră Yang, Inh gô pơma păng nơ̆r Inh pơma gô jing, ưh pă gơh lê̆ đunh. Ơ lu adrĕch ayăt 'maih tơblah plơ̆! Noh trŏ kơ năr lu iĕm, Inh khan hăm nơ̆r Inh sư gô pơsĭt, Kră Yang khan thoi noh.’ ”

²⁶ Đei nơ̆r Kră Yang khan kơ inh:

²⁷ Ơ kon bơngai, to adrĕch Isơrael đei pơma khan: ‘Tơdrong tơ'bôh mă sư đei 'bôh noh tơ'bôh lê̆ kơ đunh năr đơ̆ng rŏng ning-mônh; păng sư khan lê̆ adrol oei ataih tơ anăp kơnh.

²⁸ Thoi noh, athei khan kơ lu sư; 'Nâu nơ̆r Kră Yang Tih Hloh khan: Nơ̆r Inh pơma ưh pă lê̆ đunh boih, mă-lei nơ̆r Inh pơma gô pơsĭt, Kră Yang Tih Hloh đei khan thoi noh.’ ”