Êsêkiên 11 - Sơ̆p Hlabơar Nơ̆r 'Bok Kei-Dei

Tơdrong sek tơlang lu yŏng pơgơ̆r kon pơlei Isơrael

¹ Yang Bơhngol hơtŏk inh tơ kơpal păng 'nhăk ba inh tơ 'măng jang hnam Kră Yang gah hơlĕch. 'Bơ̆t trong mơ̆t tơ 'măng jang noh đei 'bar-jĭt pơđăm 'nu drŏ-nglo; lăm lu sư inh 'bôh Jaasania kon drŏ-nglo Asur, păng Phêlatia kon drŏ-nglo Bênaia, kră pơgơ̆r kon pơlei.

² Kră Yang khan kơ inh: “Ơ kon bơngai, noh lu bơngai pơđâu pơm tơdrong yoch, chă đon pơm kơnê̆ păng pơđâu kơnê̆ kơ bơngai lăm pơlei 'nâu.

³ Lu sư khan: ‘Dang ei trŏ kơ man hnam. Pơlei âu jing gŏ 'bŭng, lu bơ̆n jing thoi 'nhĕm sĕch.’

⁴ Thoi noh khan lê̆ adrol bĕ wă blah lu sư, ơ kon bơngai khan lê̆ adrol bĕ.”

⁵ Đei Yang Bơhngol Kră Yang jur tơ inh. Sư khan kơ inh; “'Nâu nơ̆r Kră Yang khan: 'Nâu tơdrong lu iĕm tơchĕng, ơ kon pơlei Isơrael, Inh băt tơdrong jơhngơ̆m đon lu iĕm tơchĕng.

⁶ Lu iĕm đei pơlôch lơ bơngai boih lăm pơlei âu, tơ rok trong lăm pơlei 'bĕnh lơ bơngai lôch.

⁷ Thoi ei na Kră Yang Tih Hloh khan thoi âu: Lu akâu bơngai lôch mă lu iĕm hŭt lê̆ lăm pơlei âu jing 'nhĕm păng pơlei jing gŏ 'bŭng; mă-lei lu iĕm Inh gô pơpuh lê̆ tơ 'nguaih kơ pơlei.

⁸ Lu iĕm hli kơ đao hơlă, na Inh gô ăn đao hơlă blah lu iĕm, Kră Yang Tih Hloh khan thoi noh.

⁹ Inh gô pơpuh lê̆ lu iĕm lĕch đơ̆ng pơlei âu, gô pơjao lu iĕm lăm tơpang ti lu bơngai tơmoi păng sek phak lu iĕm.

¹⁰ Lu iĕm gô pơ̆k lôch yua kơ đao; Inh gô sek tơlang phak lu iĕm tơ hơdral char Isơrael. Lu iĕm gô băt Inh boih Kră Yang.

¹¹ Pơlei âu ưh kơ sĭ kơ gŏ lu iĕm; lu iĕm kư̆m ưh kơ sĭ 'nhĕm lăm noh; Inh gô sek tơlang lu iĕm 'bơ̆t hơdral char Isơrael.

¹² Na lu iĕm gô băt Inh boih Kră Yang, yua kơ lu iĕm ưh kơ kiơ̆ khôi juăt Inh, ưh kơ wei răk tơdrong Inh tơtă, mă-lei pơm kiơ̆ tơdrong juăt teh đak jum dăr kơ iĕm.”

¹³ Kơplah inh khan lê̆ adrol, Phêlatia kon drŏ-nglo Bênaia lôch; inh drap muh măt tơ teh păng krao ôr re: “Ơ, Kră Yang Tih Hloh, Ih wă pơlôch đĭ bơngai Isơrael mă oei arih dah kiơ?”

¹⁴ Nơ̆r âu truh tơ inh đơ̆ng Kră Yang:

¹⁵ “Ơ kon bơngai, kon pơlei Jêrusalem khan boih gah lu 'nhŏng oh ih, noh 'nhŏng oh ih kơdih, adrĕch adrung ih păng đĭ-đăng lu adrĕch Isơrael mă oei bơnă đe: ‘Lu sư ataih đơ̆ng Kră Yang; teh âu Sư ăn boih kơ bơ̆n bơ̆jang sa.’

Pơkă gô brŏk tơ dêh char Isơrael

¹⁶ Thoi noh, khan bĕ kơ lu sư: ‘'Nâu Kră Yang Tih Hloh khan: Mă Inh đei ăn kơ lu sư năm tơ lu dêh char nai, tơklah tơklang tơ jơ̆p lăm lu teh đak, mă-lei Inh oei 'măn anih 'lơ̆ng rơgoh kơ lu sư tơ lăm lu char mă lu sư oei ưh kơ đunh tŏ noh.’

¹⁷ Thoi noh khan bĕ: ‘'Nâu nơ̆r Kră Yang Tih Hloh khan: Inh gô akŭm lu iĕm đơ̆ng lu pơlei tơmoi, păng Inh gô iŏk lu iĕm đơ̆ng lu teh đak mă lu iĕm oei tơklah tơklang păng gô ăn teh đak Isơrael kơ lu iĕm dơ̆ng.’

¹⁸ Lu sư gô brŏk truh tơ teh đak lu sư păng hŭt lê̆ dôm tơdrong mă Inh areh păng dôm tơdrong kơnê̆ 'mê̆-'mach krưp đơ̆ng anih noh.

¹⁹ Inh gô ăn kơ lu sư minh jơhngơ̆m, minh đon 'nao; Inh gô iŏk lê̆ jơhngơ̆m arăng thoi tơmo đơ̆ng akâu lu sư păng ăn kơ lu sư jơhngơ̆m rơmuăn wă chu kiơ̆ Kră Yang.

²⁰ Wă kơ lu sư chu kiơ̆ khôi juăt Inh, wei răk păng pơm kiơ̆ nơ̆r Inh tơtă, lu sư kon pơlei Inh păng Inh Kră Yang 'Bok Kei-Dei lu sư.

²¹ Mă-lei, lu mơ'nah đei jơhngơ̆m 'maih kiơ̆ tơdrong Inh areh păng tơdrong kơnê̆ krưp, Inh gô pơm tơwih tơdrong lu sư pơm tuh tơ kơ̆l lu sư, Kră Yang Tih Hloh khan thoi noh.”

²² Lu chêrubim hăm tang-wang gre 'bơ̆t cheng lu sư iung bơyar pơnăr. Tơdrong ư-ang rang mơnhal Kră Yang 'Bok Kei-Dei Isơrael oei kơpal lu sư.

²³ Tơdrong ư-ang rang mơnhal Kră Yang tŏk tơ kơpal đơ̆ng lăm pơlei tih păng dơ̆ng 'bơ̆t kơpal kông gah hơlĕch kơ pơlei.

²⁴ Lăm tơdrong tơ'bôh ăn kơ inh đơ̆ng Kră Yang 'Bok Kei-Dei, Yang Bơhngol hiŏng inh tơ kơpal, păng chông anhăk ba inh truh tơ anih lu bơngai mă đe pơpuh tơ Kalđê. Na tơdrong tơ'bôh weh đơ̆ng inh.

²⁵ Inh roi ăn kơ lu bơngai đe pơpuh tôm tơdrong đơ̆ng Kră Yang tơ'bôh tơbăt kơ inh.