Êsêkiên 10 - Sơ̆p Hlabơar Nơ̆r 'Bok Kei-Dei

Tơdrong rang mơnhal Kră Yang weh đơ̆ng hnam akŭm

¹ Inh 'bôh tơ rơwơ̆ng mă tơ kơpal kơ̆l chêrubim đei kiơ noh rang nhen thoi tơmo gĭt lăng hơbŏ thoi tang-dŏ pơtao.

² Kră Yang khan kơ bơngai hrŭk ao che 'bui: “Mơ̆t bĕ tơ sơlam tang-wang gre ala kơ chêrubim iŏk ngar ŭnh 'bĕnh kơ tơpang ti ih, đơ̆ng sơlam lu chêrubim na săi jơ̆p kơ pơlei noh”. Bơngai noh mơ̆t tơm măt inh.

³ Kơplah bơngai noh mơ̆t, lu chêrubim dơ̆ng gah gơal kơ hnam akŭm păng hơmơ̆l 'bĕnh kơ cham gah lăm.

⁴ Na tơdrong ư-ang rang mơnhal Kră Yang tŏk đơ̆ng chêrubim, tơ anăp 'măng hnam akŭm tơm. Na hnam akŭm tơm 'bĕnh kơ hơmơ̆l păng tơ cham hnam 'bĕnh kơ tơdrong hơdah ư-ang rang mơnhal Kră Yang.

⁵ Re jơwa đơ̆ng pơnăr chêrubim tơtuh đe kơtơ̆ng truh tơ cham 'nguaih, re thoi nơ̆r Kră Yang 'Bok Kei-Dei Tih Hloh pơma.

⁶ Kơplah Sư tơtă khan kơ bơngai hrŭk ao che 'bui: “Iŏk ŭnh đơ̆ng sơlam tang-wang gre lu chêrubim,” bơngai noh mơ̆t dơ̆ng 'bơ̆t cheng tang-wang gre.

⁷ Minh pôm chêrubim chro ti iŏk ŭnh đơ̆ng tŏk-bŏk lu chêrubim, dan 'bơ̆t ti bơngai hrŭk ao che 'bui; bơngai âu iŏk đơ̆ng noh lĕch năm hloi.

⁸ Ala kơ pơnăr chêrubim, đei yă kiơ noh nhen thoi ti bơngai.

⁹ Inh lăng, 'bôh đei puăn tŏ tang-wang gre dan cheng chêrubim, rim kơ minh pôm lăm lu tang-wang gre dan 'bơ̆t cheng rim kơ chêrubim; rup tang-wang gre noh hơbŏ rang thoi tơmo gĭt.

¹⁰ Rup tang-wang gre noh puăn tŏ lei-lăi, tang-wang gre âu tah tơ lăm tang-wang gre noh mă-lei dăr phara.

¹¹ Dah lu sư wă năm lu sư năm kiơ̆ kơ minh lăm puăn pah, dah năm ưh kơ gơh pơdăr pơkuĕch tơ 'ma 'ngiĕo. Kiơ̆ kơ tang-wang kơ̆l anăp gah yơ na lu chêrubim năm kiơ̆ gah noh, ưh kơ kăl dăr pơkuĕch 'ma 'ngiĕo

¹² Đĭ akâu lu chêrubim, rŏng, ti, pơnăr, tang-wang gre, lu tang-wang gre lăm puăn tŏ kon sem noh tă kơ đei măt tăp dăr.

¹³ Inh kơtơ̆ng đe krao. “Lu tang-wang gre pơdăr.”

¹⁴ Rim kơ chêrubim đei puăn tŏ muh măt; mă minh muh măt chêrubim, mă 'bar muh măt bơngai, mă pêng muh măt dăm-brang, mă puăn muh măt sem klang.

¹⁵ Lu chêrubim păr tŏk. Noh lu kon sem arih mă inh đei 'bôh 'bơ̆t krong Kêbar.

¹⁶ Mưh lu chêrubim năm, lu tang-wang gre kư̆m năm kiơ̆ cheng; mưh lu chêrubim bơyar pơnăr păr đơ̆ng teh tơ kơpal, lu tang-wang gre ưh kơ dăr weh đơ̆ng cheng lu sư ôh.

¹⁷ Tơdah kơplah lu chêrubim dơ̆ng, lu tang-wang gre kư̆m dơ̆ng; tơdah chêrubim iung păr, tang-wang gre kư̆m iung, yua kơ yang bơhngol kon sem arih noh oei lăm lu sư.

¹⁸ Tơdrong ư-ang rang mơnhal Kră Yang lĕch đơ̆ng anăp 'măng hnam akŭm na dơ̆ng tơ kơpal lu chêrubim.

¹⁹ Lu chêrubim bơyar pơnăr păr tơ kơpal hloi đơ̆ng teh 'bơ̆t anăp inh; lu tang-wang gre kư̆m năm hơdai 'bơ̆t cheng lu sư. Lu sư dơ̆ng 'bơ̆t anăp 'măng mơ̆t gah hơlĕch hnam Kră Yang, tơdrong ư-ang rang mơnhal Kră Yang 'Bok Kei-Dei Isơrael oei kơpal lu sư.

²⁰ 'Nâu lu kon sem arih mă inh 'bôh tơ ala kơ Kră Yang 'Bok Kei-Dei Isơrael tơ krong Kêbar, păng inh băt tơpă noh lu chêrubim.

²¹ Rim chêrubim đei puăn pah muh măt păng puăn pah pơnăr, ala kơ lu pơnăr đei hơbŏ thoi ti kon bơngai.

²² Muh măt lu sư noh jơ̆ muh măt mă inh đei 'bôh tơ krong Kêbar. Rim kơ kon sem arih noh năm tơpăt tơ anăp.