Êsêkiên 1 - Sơ̆p Hlabơar Nơ̆r 'Bok Kei-Dei

NƠ̆R KHAN LÊ̆ ADROL GAH KON PƠLEI ISƠRAEL Êsêkiên 'bôh tơdrong 'lơ̆ng rŏ rang mơnhal Kră Yang 'Bok Kei-Dei

¹ Lăm sơnăm pêng-jĭt, năr pơđăm khei puăn, kơplah inh oei hơdai hăm lu bơnă tơ krong Kêbar, lu plĕnh tơpơih păng inh lăng đei tơdrong tơ'bôh đơ̆ng Kră Yang 'Bok Kei-Dei.

² Năr pơđăm khei noh lăm sơnăm mă pơđăm, đơ̆ng năr pơtao Jêhôiachin đe rôp.

³ Kră Yang khan tơ'bôh kơ Êsêkiên, kon drŏ-nglo 'bok soi Busi, kơplah sư oei lăm char Kalđê jih đak krong Kêbar; tơ noh Kră Yang dan ti kơpal sư.

⁴ Inh lăng 'bôh kial hơbŭt lĕch đơ̆ng gah yă-nơ̆m, đei hơmơ̆l tih dêh đei ŭnh hơdah jum dăr, păng tŏk-bŏk sư, inh 'bôh nhen thoi đei bơsei rang hơdah lăm ŭnh.

⁵ Păng tŏk-bŏk ŭnh 'bôh puăn tŏ kon sem arih, hơbŏ rup thoi kon bơngai.

⁶ Rim kơ lu sư đei puăn tŏ muh măt păng puăn tŏ pơnăr.

⁷ Jơ̆ng lu sư tơpăt, tơpang jơ̆ng thoi kơchôp kon rơmo, hơdah 'brŭng thoi kong rang rơgoh.

⁸ Ala kơ pơnăr, puăn pah đei ti bơngai, rim tŏ kon sem đei puăn tŏ muh măt păng puăn tŏ pơnăr.

⁹ Pơnăr lu sư tơ'bưh dih băl. Rim kơ lu sư năm tơpăt anăp kiơ̆ kơ muh măt, akâu ưh kơ weh-woh.

¹⁰ Muh măt lu sư thoi âu: Rim kơ lăm puăn tŏ noh đei muh măt thoi kon bơngai, rim lăm puăn tŏ noh đei muh măt dăm-brang gah 'ma; rim lăm puăn tŏ noh đei muh măt rơmo gah 'ngiĕo; păng rim lăm puăn tŏ noh đei muh măt sem klang.

¹¹ Muh măt lu sư thoi noh. Pơnăr tưk kơjung rim lu sư đei 'bar 'bar hlak pơnăr lu sư bơyar tơ'bưh băl păng 'bar hlak pơnăr to pĕng akâu.

¹² Rim kơ lu sem arih năm tơpăt tơ anăp kiơ̆ kơ Yang Bơhngol năm, mưh wă năm ưh kơ weh-woh ôh.

¹³ Akâu lu kon sem arih noh nhen thoi ngar ŭnh khơ̆ng thoi hơchô̆ 'long ŭnh khơ̆ng năm rŏng anăp tŏk-bŏk lu kon sem arih noh; ŭnh hơdah păng đei kơmlat đơ̆ng ŭnh lĕch hơdah

¹⁴ Lu kon sem arih noh năm wơ̆t wih rŏng anăp thoi kơmlat.

¹⁵ Kơplah inh lăng lu kon sem arih noh, inh 'bôh đei tang-wang gre tơ teh cheng lu kon sem arih, tang-wang gre noh 'bơ̆t cheng rim kơ kon sem arih puăn tŏ muh măt.

¹⁶ Rup păng hơbŏ lu tang-wang gre nhen thoi tơmo rang; đĭ-đăng puăn tŏ tang-wang gre lei-lăi, rup păng hơbŏ thoi minh pôm tang-wang gre oei tơ lăm minh tang-wang gre nai.

¹⁷ Mưh lu sư năm, puăn pah lu tang-wang dăr năm minh trong tơpăt noh ưh kơ weh tơ 'ma, tơ 'ngiĕo.

¹⁸ Gơwang tang-wang gre kơjung krưp tơpă; păng puăn tŏ gơwang tang-wang gre đei 'bĕnh kơ măt tăp dăr.

¹⁹ Lăp lu kon sem arih noh năm, lu tang-wang gre kư̆m năm hơdai 'bơ̆t cheng. Na mưh lu kon sem arih hiŏng tŏk tơ kơpal lu tang-wang kư̆m hơdai hiŏng tŏk kiơ̆ thoi noh.

²⁰ Yang bơhngol wă năm tơ yơ, lu kon sem arih kư̆m năm tơ noh; păng lu tang-wang gre kư̆m hiŏng đơ̆ng teh năm kiơ̆ cheng, yua kơ yang bơhngol lu kon sem arih noh oei lăm tang-wang gre.

²¹ Lu kon sem arih năm, lu tang-wang gre kư̆m năm; lu kon sem arih dơ̆ng lu tang-wang gre kư̆m dơ̆ng păng lu kon sem arih hiŏng kơpal kơ teh lu tang-wang gre hiŏng hơdai, yua kơ yang bơhngol lu kon sem arih oei lăm tang-wang gre.

²² Kơpal kơ kơ̆l lu kon sem arih, 'bôh đei gơwang tơ rơwơ̆ng nhen thoi getchai rang krưp, 'bĕnh ‘bang kơpal kơ kơ̆l lu sư.

²³ Ala kơ gơwang noh, pơnăr lu sư bơyar tơpăt, lu pơnăr âu tơklă tơ pơnăr to, lu kon sem arih đei 'bar hlak pơnăr pĕng akâu gah âu păng gah to.

²⁴ Mưh lu kon sem arih wă năm, inh kơtơ̆ng pơnăr lu sư re thoi jơwa đak chơkơi, thoi nơ̆r đơ̆ng Kră Yang Tih Hloh; re ơ-ôs thoi lu linh lơ yak, Mưh pơdơh, lu sư tơjruh pơnăr.

²⁵ Đei nơ̆r pơma lĕch đơ̆ng kơpal gơwang tơ rơwơ̆ng kơpal kơ̆l lu kon sem arih. Mưh lu sư dơ̆ng pơnăr lu sư tơjruh.

²⁶ Kơpal gơwang tơ rơwơ̆ng kơpal kơ̆l lu kon sem arih đei rup kiơ noh nhen thoi tang-dŏ pơtao pơm păng tơmo rang; kơpal tang-dŏ noh đei rup hơbŏ thoi bơngai.

²⁷ Inh 'bôh đơ̆ng kơiĕng sư tơ kơpal hơdah thoi mam kong hlơ-hlŏng thoi ŭnh tăp dăr păng đơ̆ng kơiĕng tơ ala, inh 'bôh thoi ŭnh hơdah rang jum dăr kơ Sư.

²⁸ Inh 'bôh hơdah rang tăp dăr thoi plĕnh chro tơ hơmơ̆l wă 'mi. Tơdrong noh thoi 'lơ̆ng rŏ rang mơnhal Kră Yang. Lăp inh 'bôh inh kŭp muh măt tơ teh păng kơtơ̆ng nơ̆r minh 'nu pơma khan.