Êsai 8 - Sơ̆p Hlabơar Nơ̆r 'Bok Kei-Dei

¹ Kră Yang khan kơ inh: “Iŏk bĕ minh hlak gơ'bang să păng chih tơ noh hăm chư hmă kon bơngai gơh băt: Maher-Salal-Hasbas.

² Inh rơih kơ Inh lu bơngai pơm kơdranh tơnăp sĭt, noh Uria 'bok soi păng Sachari kon drŏ-nglo Jêbêrêkia.”

³ Klaih kơ noh inh năm oei tơ hnam drŏ-kăn bơngai khan lê̆ adrol, sư anăp păng tơpŭ kon drŏ-nglo, na Kră Yang khan kơ inh: Ih anăn sư noh Maher-Salal-Hasbas.

⁴ Yua kơ adrol kơ kon nge noh gơh pơma krao, 'Bă ơi! Mĕ ơi! Đe gô iŏk lê̆ mŭk tơmam gĭt đơ̆ng pơlei Đamas păng tơmam tơgar iŏk đơ̆ng Samari năm ba 'bơ̆t anăp pơtao Asiri.

⁵ Kră Yang khan dơ̆ng kơ inh:

⁶ “Yua kơ kon pơlei âu sơngah kơ krong đak Silôa ro 'lơ̆ng rơnang, mă-lei hiôk kơ Rêsin hăm kon drŏ-nglo Rêmalia.

⁷ Thoi noh, na âu, Kră Yang ăn đak lơ̆p krong ro jăng păng đak tih ro truh tơ lu sư, noh wă khan pơtao Asiri păng đĭ-đăng tơdrong 'lơ̆ng rŏ sư. Đak gô ro blai đĭ-đăng lu hơbong păng lơ̆p đĭ-đăng lu bơnơ̆.

⁸ Ro blai mơ̆t tơ char Juđa, dĭng lơ̆p truh tơ hơko. Ơ Êmanuel! Pơnăr Sư gô bơyar jơ̆p kơ dêh ih.”

⁹ Ơ kon pơlei Asiri ôr krao bĕ, ơh sơ'ngon bĕ! Ơ đĭ-đăng lu dêh ataih, pơđêng đon iĕm mơ̆ng bĕ! Gơhret bĕ tơlei tơ̆n mă-lei hli dêh.

¹⁰ Pơđâu chă đon bĕ tơduă iĕm, mă-lei ưh kơ yĕng jing, tơtĕch bĕ tơdrong iĕm chă đon mă-lei gô ưh kơ kĕ tơdơ̆ng kơjăp ôh, yua kơ Kră Yang 'Bok Kei-Dei oei hơdai hăm lu nhôn.

¹¹ Kră Yang yua ti pran kơtang Sư pơma hăm inh păng bơtho tơbăt khan kơ inh 'nĕ rok kiơ̆ trong lu kon pơlei 'nâu.

¹² Sư khan: “'Nĕ kơ pơma 'bơm wă blah, dôm lu tơdrong kon pơlei âu pơma 'bơm blah plơ̆. 'Nĕ kơ hli tơdrong lu sư hli păng 'nĕ kơ tơrơ ôh.

¹³ Pôk pơư pơang bĕ Kră Yang Tih Hloh 'lơ̆ng rơgoh, Kră Yang mă lu iĕm athei hli Sư bơih Kră Yang trŏ kơ iĕm hli yom.

¹⁴ Sư gô jing anih kơ'nơp kơjăp Mă Sư kư̆m thoi tơmo pơm kơ đe kơtơih pơ̆k păng tơmo tih pơm kơ Isơrael păng Juđa huŏng păng thoi hơđong hơnhuăl đăk kơ kon pơlei oei lăm pơlei Jêrusalem mơ̆n.

¹⁵ Đei lơ lăm lu sư gô kơtơih pơ̆k. Lu sư gô pơ̆k huŏng păng, pơchah pơchek, gô hrơ̆p hơnhuăl păng đe gô rôp.

¹⁶ Chô̆ kơjăp bĕ nơ̆r tơbăt âu păng pơklep mă kơjăp tơdrong juăt lăm lu đĭch đam Inh.

¹⁷ Inh gô gơnang kơ Kră Yang păng chang gô Sư, jơ̆ Kră Yang mă ôn muh măt Sư đơ̆ng adrĕch Jakôp.

¹⁸ Âu, inh hăm lu kon mă Kră Yang Sư ăn bơih kơ inh noh tơdra wă pơsĭt lăm Isơrael đơ̆ng Kră Yang Tih Hloh. Tơ'ngla oei kơpal kông Siôn.

¹⁹ Tơdah đei bu khan kơ iĕm Năm apinh jet bĕ lu pơjâu pơma hăm lu bơngai lôch, lu pơma bơlăm thoi sem păng pơma ưh kơ rơđah ôh khan bĕ kơ lu sư: Ưh kơ trŏ ôh hă kon pơlei năm apinh jet Kră Yang 'Bok Kei-Dei lu sư kơdih? Wă tơgŭm ăn kơ bơngai arih, liơ năm apinh jet bơngai lôch?

²⁰ Kiơ̆ kơ khôi juăt păng nơ̆r tơbăt âu! Tơdah kon pơlei ưh kơ pơma thoi noh lei lu sư ưh kơ đei tơdrong hơdah ôh.

²¹ Lu sư gô thông huang jơ̆p kơ lăm dêh char, pơmat-tat, đei pơngot rơwĕt, dah đei pơngot lu sư gô hil mĭl ngơk muh măt tơ kơpal hiap pơtao păng Kră Yang 'Bok Kei-Dei lu sư kơdih.

²² Đơ̆ng noh kŭp kơ̆l lăng tơ teh 'bôh tơdrong pơmat-tat măng mu, 'bôh tơdrong ơh sơ'ngon tơhuŏng lê̆ lu sư kơdih tơ anih măng mu gueo.

²³ Mă-lei ưh pă đei măng mu bơih kơ lu bơngai ơh sơ'ngon pơmat-tat, lăm chăl sơ̆ Kră Yang 'Bok Kei-Dei tơjur lê̆ bơih teh đak Neptali păng Sebulun; mă-lei lăm năr đơ̆ng rŏng kơnh Sư gô pơm ư-ang kơ tơring trong cheng đak dơsĭ, tơring pah to krong Jôrđăn, lăm dêh Galilê 'măn kơ lu bơngai tơmoi.