Êsai 7 - Sơ̆p Hlabơar Nơ̆r 'Bok Kei-Dei

Tơdra wă tơpŭ kơ Êmanuel

¹ Lăm chăl Ahas kon Jôtham, sâu Usia pơtao char Juđa, đei Rêsin, pơtao dêh char Siri păng Pêka kon Rômalia pơtao Isơrael, tŏk blah pơlei Jêrusalem mă-lei ưh kơ kĕ.

² Đei bơngai năm roi ăn kơ hnam Đawit khan: “Siri pơgơ̆p hăm Êphraim.” Na kơplah noh Ahas păng kon pơlei Juđa hli tơrơ hyĭng hyơ̆ng dang lĕ kial tơthu 'long lăm bri.

³ Kră Yang khan kơ Êsai: “Ih hăm kon drŏ-nglo ih Sêar Jasup năm sơng bĕ Ahas 'bơ̆t tôch kơ hơbong đak ro mơ̆t tơ Dơnâu Kơpơ̆ng, trong năm tơ dơnih đak bơngai tong brai.

⁴ Na khan kơ sư: ‘Ih kơchăng oei mă hơđơ̆ng bĕ, 'nĕ kơ hli, 'nĕ kơ rơdu ôh, yua kơ đei 'bar tŏ 'long ŭnh sa lĕch 'nhui noh wă khan tơdrong hil blĕk lĕch đơ̆ng Rêsin, Siri păng kon drŏ-nglo Rêmalia.

⁵ Kơlih yua kơ Siri hăm Êphraim păng kon drŏ-nglo Rêmalia chă đon wă pơrăm ih lu sư khan:

⁶ “Bĕ bơ̆n năm tŏk blah char Juđa, pơm kơ sư hli tơrơ blah iŏk char noh asong băl bơ̆n, pôk kon drŏ-nglo Tabel pơm pơtao lu sư tơ noh.”

⁷ Kră Yang khan thoi âu: “Tơdrong noh ưh kơ jing, ưh kơ đei truh ôh!”

⁸ Yua kơ kơ̆l char Siri jơ pơlei Đamas, kơ̆l pơlei Đamas jơ̆ Rêsin lăm tơdrâu-jĭt pơđăm sơnăm Êphraim gô răm đĭ ưh pă jing kon pơlei pơla dơ̆ng.

⁹ Kơ̆l kơ char Êphraim jơ̆ pơlei Samari, kơ̆l kơ pơlei Samari jơ̆ kon drŏ-nglo Rêmalia. Tơdah lu iĕm ưh kơ lui ngeh lei iĕm dơ̆ng ưh kơjăp ôh.”

¹⁰ Kră Yang khan dơ̆ng kơ Ahas:

¹¹ “Apinh bĕ Kră Yang 'Bok Kei-Dei ih, tơ'bôh kơ ih tơdra, tơ anih jrŭ dơnâu ŭnh sŭng dah tơ kơpal plei 'lơ̆ng tơ plĕnh ti.”

¹² Ahas tơl khan: “Inh ưh kơ apinh, inh kư̆m ưh kơ pơlong lăng Kră Yang.”

¹³ Na Êsai khan: “Ơ hnam Đawit mơ̆ng bĕ! Lu iĕm khan pơm pơơh kơ đe noh jơ̆ tơdrong iĕ đĕch, na lu iĕm kư̆m 'maih pơm kơ Kră Yang 'Bok Kei-Dei inh ơh dơ̆ng mơ̆n hă?

¹⁴ Yua kơ noh bơih Kră Yang gô tơ'bôh kơ lu iĕm tơdra: Minh 'nu adruh gô anăp tơpŭ kơ minh 'nu kon drŏ-nglo, đe anăn kon sư noh Êmanuel.

¹⁵ Hơ'lơ̆p ei gô sa đak toh krăl păng đak sut, dĭng truh sư băt hŭt tơdrong kơnê̆ păng rơih iŏk tơdrong 'lơ̆ng.

¹⁶ Na hơdrol kơ hơ'lơ̆p ei băt tŭk tơdrong kơnê̆ păng rơih iŏk tơdrong 'lơ̆ng, teh đak 'bar 'nu pơtao mă ih hli noh gô jing juơ.

¹⁷ Kră Yang gô ăn tơdrong truh kơ ih, kon pơlei ih păng hnam 'bă ih, đơ̆ng năr mă Êphraim tơklah đơ̆ng Juđa kư̆m tam mă đei 'bôh thoi noh wă khan sư gô chông ba pơtao Asiri truh.”

¹⁸ Lăm năr noh, Kră Yang gô hơhôch krao lu roi đơ̆ng tu đak glung Êyiptơ păng krao sut đơ̆ng dêh Asiri.

¹⁹ Sut păng roi gô truh kôp tơ lăm chhom kông, tơ lăm trôm tơmo, tơ tơm 'long jơla, tơ đak dơnâu.

²⁰ Lăm năr noh Kră Yang gô yua săng kôih mưng đơ̆ng pah to krong, noh wă khan pơtao Asiri na hơkôih đĭ sŏk kơ̆l, sŏk sop jơ̆ng păng sŏk kang lu iĕm dơ̆ng mơ̆n.

²¹ Lăm năr noh rim 'nu gô rong minh pôm rơmo adruh păng 'bar tŏ triu đĕch.

²² Yua kơ sư đei đak toh jrah jrai na sư gô sa đak toh krăl, yua kơ lu bơngai oei oei lăm dêh noh sư 'me akâu sư păng đak toh krăl hăm đak sut.

²³ Lăm năr noh, tơ anih đêl đei rơbâu tơnơm 'long hơmu. Kăp sư dang tơ rơbâu sêikơl jên gô chăt 'long jơla păng 'nhĕt jơla ngăl

²⁴ Đe gô chĕp ba hră hăm 'brơ̆m truh tơ noh yua kơ jơ̆p dêh noh 'bĕnh kơ 'long jơla 'nhĕt jơla ngăl.

²⁵ Kŭm ưh kơ đei bơngai bu năm tơ đêl anih sư choh jang noh dơ̆ng yua kơ hli kơ lu 'long jơla 'nhĕt jơla hro 'bĕnh-'bang, mă-lei gô ăn kơ rơmo sa păng triu pơjuă anih noh.