Êsai 66 - Sơ̆p Hlabơar Nơ̆r 'Bok Kei-Dei

Tơdrong sek tơlang păng chang hơmĕng

¹ Kră Yang khan thoi âu: “Plĕnh noh Tang-dŏ pơtao Inh, teh noh hơnă jơ̆ng Inh juă. Lu iĕm gô man ăn kơ Inh hnam tơ yơ? Anih ayơ pơm anih Inh pơdơh?

² Dôm tơmam 'nâu tă kơ đơ̆ng ti Inh pơm ngăl, thoi noh đĭ-đăng tơmam gơh đei.” Kră Yang khan thoi noh. “'Nâu đei bơngai mă Inh lăng gĭt: Bơngai iơ̆m dim, đei jơhngơ̆m băt tơbral, păng hli tơtey kơtơ̆ng nơ̆r inh pơma.

³ Mă-lei bơngai bu pơlôch minh pôm kon rơmo soi sơmah, kư̆m thoi pơlôch minh 'nu bơngai; bu soi sơmah hăm minh pôm kon triu kư̆m thoi gơ̆ hơko minh pôm kŏ bu pơyơ̆r tơmam soi phe 'ba kư̆m thoi pơyơ̆r pham nhŭng; bu soh tơmam 'bâu phu kư̆m thoi kơkuh kơ rup yang. Lu bơngai noh rơih bơih trong lu sư kơdih, jơhngơ̆m lu sư 'maih wă pơm tơdrong jang krưp kơnê̆,

⁴ Na Inh kư̆m gô rơih iŏk tơdrong pơmat ăn kơ lu sư, na tuh ăn tơdrong mă lu sư hli. Yua kơ mưh Inh krao ưh kơ đei bu tơl, Inh pơma lu sư ưh kơ wă mơ̆ng, Lu sư pơm bơih tơdrong kơnê̆ 'bơ̆t anăp Inh, păng rơih tơdrong mă Inh ưh kơ lăp đon.”

⁵ Ơ lu iĕm bơngai mơ̆ng nơ̆r Kră Yang pơma mă hli tơtey, mơ̆ng bĕ nơ̆r Kră Yang. “'Nhŏng oh lu iĕm bơngai mă hil areh kơ lu iĕm, hŭt lê̆ lu iĕm yua anăn Inh păng khan: ‘Hơpơi kơ Kră Yang đei ư-ang, wă kơ lu nhôn 'bôh tơdrong hiôk chơt lu iĕm.’ Mă-lei lu sư bơih gô mơlâu.

⁶ Đei re jơwa lăm pơlei tih; đei re jơwa đơ̆ng hnam akŭm noh re jơwa nơ̆r Kră Yang pơm tơwih kơ lu bơngai ayăt kơ Sư.

⁷ Adrol kơ jĭ anăp sư tơpŭ bơih; adrol kơ jĭ anăp truh, sư tơpŭ kơ minh 'nu kon drŏ-nglo bơih.

⁸ Hăm tam đei bu kơtơ̆ng minh tơdrong thoi noh? Hăm đei bu 'bôh bơih tơdrong thoi noh? Hăm đei dêh char ayơ tơpŭ pơjing lăm minh năr? Dah hăm đei teh đak ayơ tơpŭ pơjing băl lăm minh wơ̆t hơdai? Mă-lei Siôn 'nao wă jĭ anăp tơpŭ pơjing hloi kơ lu kon hơ'lơ̆p bơih.”

⁹ Kră Yang khan: “Inh bơih Tơ'ngla ăn jơ 'năr tơpŭ kon na khan ưh kơ ăn tơpŭ hă? Inh bơih ăn đei anăp na ưh kơ ăn hơiơch hă?” Kră Yang 'Bok Kei-Dei khan thoi noh.

¹⁰ “Hiôk chơt bĕ hơdai hăm pơlei Jêrusalem ơ lu bơngai mă 'mêm kơ pơlei Jêrusalem. Hiôk chơt bĕ yua kơ sư, ơ lu bơngai mă nhơ̆m hmoi kơ Jêrusalem, athei đĭ jơhngơ̆m chơt hiôk 'nă hal hơdai hăm sư.

¹¹ Wă kơ lu iĕm gô chơt hiôk lăm tơdrong ư-ang Sư thoi kon hơ'lơ̆p phĭ hrăp rơkah rơkai đơ̆ng mŏm toh mĕ sư.”

¹² Kră Yang khan thoi âu: “'Nâu, Inh gô ba ăn tơdrong hiôk-hian ro thoi đak krong, ba tơmam gĭt lu teh đak thoi đak glung 'bĕnh blai; lu iĕm gô mŏm păng pôk kơ'mĭn tơ kơtơh, păng tơoei hơ-on kơpal kŭl-tăng.

¹³ Inh gô pơlung lu iĕm thoi noh. Nhen thoi mĕ pơlung kon, lu iĕm gô đei tơdrong pơlung tơ lăm Jêrusalem.

¹⁴ Lu iĕm gô 'bôh dôm tơdrong noh, na lăm jơhngơ̆m hiôk-hian, kơting lu iĕm gô bluh thoi 'nhĕt. Đe gô băt ti Kră Yang gô tơgŭm lu đĭch đam Sư, mă-lei tơdrong Sư hil mĭl gô phak lu bơngai ayăt kơ Sư.

¹⁵ Lăng to, Kră Yang gô truh hăm ŭnh păng gre aseh Sư nhen thoi kial hơbŭt, wă pơm tơwih tơdrong ơh blĕk Sư hăm tơdrong hil mĭl, păng tơdrong Sư chrih nhen thoi pla ŭnh khơ̆ng.

¹⁶ Kră Yang gô iŏk ŭnh păng đao gưm wă phak lu bơngai pơm yoch. Đei lơ bơngai Kră Yang pơlôch.

¹⁷ “Lu bơngai mă hơmet akâu sư kơdih, wă năm mơ̆t tơ lu pơgar, kiơ̆ minh 'nu bơngai dơ̆ng tŏk-bŏk noh, sa 'nhĕm nhŭng, 'nhĕm kơne, lu tơmam sa kơnê̆ krưp.” Kră Yang khan: “Lu sư gô tơ'bơ̆p tơdrong tôch hiong răm pơđĭ.

¹⁸ Gah Inh, Inh băt tơdrong jang păng đon lu sư tơchĕng, Inh gô năm wă krao đĭ-đăng lu dêh char păng rim nơ̆r pơma: Lu sư gô truh păng 'bôh tơdrong ư-ang Inh.

¹⁹ Inh gô dan minh tơdrong tơdra tơ lăm lu sư; lu bơngai mă lăm lu sư oei arih đơ̆ng tơdrong truh pơmat na inh gô wơh lu sư năm truh tơ jơ̆p-jang teh đak, wă khan truh tơ Tarsis, lu bơngai Phun, Lut, lu kon pơlei gơh hơgei kơ prah hră, lu bơngai Tubal păng Jawan, truh tơ lăm lu bŏl đak dơsĭ ataih, lu anih ưh tam mă kơtơ̆ng anăn Inh păng ưh tam mă 'bôh tơdrong ư-ang Inh, lu sư gô bơtho tơdrong ư-ang Inh tơ jơ̆p kơ teh đak.”

²⁰ Kră Yang khan: “Lu sư gô chông ba đĭ-đăng 'nhŏng oh lu iĕm đơ̆ng jơ̆p-jang kơ dêh char thoi tơmam pơyơ̆r soi sơmah kơ Kră Yang ba lu sư hăm aseh, gre aseh, gre tŭn hơnhŭn hơbang, aseh iĕ, aseh lăk-đa truh tơ kông rơgoh Inh tơ pơlei Jêrusalem.” Lu sư chông ba lu sư hăm gre tŭn, gre aseh, aseh, aseh iĕ lăk-đa: ‘Kŭm thoi kon pơlei Isơrael chĕp tơmam soi phe 'ba lăm ge mong tơmam rơgoh lăm hnam akŭm Kră Yang.

²¹ Kră Yang khan: “Inh gô rơih iŏk mơ'nah đơ̆ng lăm lu sư pơm 'bok soi păng bơngai Lêwi.”

²² Kră Yang khan: “Nhen thoi plĕnh 'nao teh 'nao mă inh pơjing gô oei kơjăp ling-lang 'bơ̆t anăp Inh thoi noh mơ̆n lu kon sâu iĕm păng anăn lu iĕm kư̆m oei kơjăp.

²³ Kră Yang khan: “Đĭ-đăng kon bơngai gô năm kơkuh 'bơ̆t anăp Inh. Đơ̆ng Khei 'Nao Tơ'bang 'nâu truh tơ khei tơ'bang to, đơ̆ng năr Sa'bat 'nâu truh tơ năr Sa'bat nai.

²⁴ Wă lu sư lĕch năm 'bôh akâu lu bơngai mă ayăt hăm Inh lôch; yua kơ hrai sa lu sư ưh kơ đei layơ lôch, ŭnh sa lu sư kư̆m ưh kơ đei layơ păt, lu sư gô jing tơdrong krưp kơnê̆ pơm ăn kơ rim kon bơngai.”