Êsai 64 - Sơ̆p Hlabơar Nơ̆r 'Bok Kei-Dei

Nơ̆r kon pơlei Kră Yang krao khan

¹ Ơ! Kuă kơ kiơ Kră Yang hek plĕnh na jur tơ teh, wă pơm kơ kông pơpơ̆ 'bơ̆t anăp Ih.

² Nhen ŭnh sa 'long ŭnh kro, nhen ŭnh pơm kơ đak blôk, wă kơ lu bơngai ayăt băt kơ anăn Ih. Đĭ kơ teh đak tơtey 'bơ̆t anăp Ih.

³ Kơplah Ih pơm lu tơdrong trŏ kơ hli krưp mă lu nhôn ưh kơ đei tơchĕng 'bơm. Na Ih jur păng lu kông tơdrŏ pơpơ̆ 'bơ̆t anăp Ih.

⁴ Đơ̆ng sơ̆ đe ưh tam mă băt, đon ưh tam mă kơtơ̆ng, măt ưh tam mă 'bôh Kră Yang nai 'nguaih kơ Sư. Tơ'ngla mă đei pơm ăn bơih kơ lu bơngai mă chang gô Sư noh.

⁵ Ih sơng iŏk lu bơngai jơhngơ̆m hiôk pơm tơdrong tơpăt, păng lu bơngai 'blŏk kơ Ih năm kiơ̆ trong Ih. Ih hil bơih yua kơ lu nhôn pơm yoch. Đunh bơih lu nhôn oei lăm yoch noh, na wă gơh klaih liơ?

⁶ Lu nhôn đĭ-đăng jing nhen thoi bơngai 'mê̆-'mach bơih, dôm tơdrong tơpăt lu nhôn, nhen thoi ao mơgrĭ. Lu nhôn đĭ-đăng tă kơ nhen hla jô, păng tơdrong kơnê̆ lu nhôn nhen thoi kial pơđông đĭ lu nhôn.

⁷ Ưh kơ đei bu krao chă anăn Ih, kư̆m ưh kơ đei bu 'blŏk wă rôp kơjăp kiơ̆ Ih, yua kơ Ih ôn bơih muh măt Ih kơ lu nhôn, lê̆ lu nhôn răm lăm tơdrong yoch lu nhôn kơdih.

⁸ Ơ Kră Yang, mă khan thoi noh, Ih oei 'Bă lu nhôn, lu nhôn jơ̆ teh lơ̆n, Ih jơ̆ thơ̆ man lu nhôn; đĭ-đăng lu nhôn jơ̆ tơdrong jang đơ̆ng ti Ih.

⁹ Ơ Kră Yang, apinh Ih 'nĕ kơ hil dêh hnang 'nĕ pă 'blŏk tơdrong yoch kơnê̆ lu nhôn ling-lang! 'Nâu apinh Ih lăng lu nhôn thoi kon pơlei Ih ngăl!

¹⁰ Lu pơlei rơgoh Kră Yang đĭ jing char glă; Siôn đĭ jing char glă, Jêrusalem đĭ jing bri juơ.

¹¹ Hnam Akŭm 'lơ̆ng rơgoh lu nhôn ư-ang, anih mă 'bok lu nhôn hơri bơnê ư-ang kơ Ih, ŭnh sa đĭ bơih. Đĭ-đăng dôm tơmam kiơ mă lu nhôn gĭt răm đĭ bơih.

¹² Ơ Kră Yang đei tơdrong truh thoi âu, Ih oei gơh lê̆ hă? Ih oei hreh đĕch, pơm kơ lu nhôn pơmat-tat dêh hă?