Êsai 6 - Sơ̆p Hlabơar Nơ̆r 'Bok Kei-Dei

Kră Yang 'Bok Kei-Dei krao

¹ Sơnăm pơtao Usia lôch, inh 'bôh Kră Yang tơoei kơpal tang-dŏ pơtao kơjung hloh kơ đĭ-đăng păng pơyom ao tai sư 'bĕnh kơ lăm hnam akŭm.

² Tơ kơpal Kră Yang; đei lu Seraphim rim Sêraphim đei tơdrâu hlak pơnăr, 'bar pah pơnăr sư pĕng muh măt, 'bar pah pơnăr pĕng jơ̆ng păng 'bar pah pơnăr dơ̆ng yua wă păr.

³ Lu Sêraphim ôr krao tơduă lu sư khan: “'Lơ̆ng rơgoh dêh, 'lơ̆ng rơgoh dêh, 'lơ̆ng rơgoh dêh Kră Yang Tih Hloh; jơ̆p kơ teh đak 'bĕnh-'bang kơ tơdrong ư-ang Sư!”

⁴ Yua kơ re jơwa ôr noh na đĭ-đăng lu jrăng 'măng tơdrŏ păng hnam akŭm 'bĕnh kơ 'nhui.

⁵ Inh ôr khan: “Răm-'băm dêh kơ inh! Inh đĭ răm bơih! Yua kơ inh jơ̆ minh 'nu bơngai đei 'bơ̆r kơnê̆ 'mê̆-'mach, oei hơdai hăm kon pơlei đei 'bơ̆r kơnê̆ 'mê̆ mach, yua kơ măt inh lăng 'bôh bơih pơtao, noh bơih Kră Yang Tih Hloh!”

⁶ Kơplah noh đei minh pôm lăm lu Sêraphim păr năm tơ inh, ti sư chĕp ngar ŭnh ngŭr kep iŏk đơ̆ng anih chơnang soi hăm mam kep.

⁷ Sêraphim kep ngar noh 'bơm tơ 'bơ̆r inh, na khan: “Lăng âu tơmam âu hơtŭt 'bơm hơkŭng ih bơih, tơdrong kơnê̆ ih tŭk lê̆ bơih, tơdrong yoch ih mơnat ăn bơih.”

⁸ Păng inh kơtơ̆ng nơ̆r Kră Yang khan: “Inh gô wơh bu năm? Bu gô năm kơ lu bơ̆n?” Inh tơl: “Đei inh tơ âu, apinh ih wơh inh năm.”

⁹ Kră Yang khan: “Năm bĕ! Khan kơ kon pơlei 'nâu: ‘Mơ̆ng, mă-lei ưh kơ hlôh kiơ: Lăng 'bôh mă-lei ưh kơ băt kiơ.’

¹⁰ Pơm bĕ kơ kon pơlei 'nâu jơhngơ̆m lu sư arăng, đon tơngơl, măt lu sư bơbôl, Hli kơ măt lu sư gơh 'bôh đon lu sư kơtơ̆ng jơhngơ̆m lu sư hlôh kơnh lu sư wơ̆t brŏk păng gơh klaih.”

¹¹ Na inh jet: “Ơ Kră Yang dĭng truh tơ layơ?” Na Kră Yang tơl: “Gô dĭng lu pơlei noh jing juơ, ưh kơ đei kon pơlei oei lăm noh, hnam ưh kơ đei bơngai oei, teh mir đĭ răm jing bri đĭ;

¹² dĭng truh tơ Kră Yang puh lê̆ kon pơlei năm tơ ataih păng lăm dêh noh jing juơ tơtŭng.

¹³ Mă khan minh lăm mơjĭt 'nu kon pơlei oei đei tơ noh, lu sư đe kư̆m gô pơrăm đĭ, thoi đe kăl 'long hơngo, 'long kôih, sư kư̆m oei đei tơm, na gô đei adrĕch rơgoh 'lơ̆ng tơpăt thoi tơm lăm teh đak noh.