Êsai 57 - Sơ̆p Hlabơar Nơ̆r 'Bok Kei-Dei

¹ Bơngai 'lơ̆ng tơpăt lôch đĭ. Ưh kơ đei bơngai bu 'blŏk hơdơ̆r. Bơngai đei jơhngơ̆m đon 'mêm mơnat đĭ hiong. Ưh kơ đei bơngai bu băt tơchĕng khan. Bơngai 'lơ̆ng tơpăt Kră Yang iŏk sư wă kơ sư huay kơ 'bơm tơdrong truh răm.

² Sư mơ̆t lăm tơdrong hiôk-hian. Lu bơngai arih 'lơ̆ng tơpăt, gô lôch pơdơh tơ anih sư kơdih.

³ Mă-lei lu iĕm ơ lu kon drŏ-nglo yă pơjâu, adrĕch adrung lu bơngai ngôi pơyô kư̆ kă păng drŏ-kăn đi, năm jê̆ tơ âu bĕ.

⁴ Lu iĕm hiĕk che bơle kơ bơngai bu? Lu iĕm ha 'bơ̆r să. Liĕl hơpiĕt iĕm pơpơm kơnê̆ pơjăm bu? Lu iĕm ưh kơ băt iĕm kon sâu bơngai kơnê̆ pơma hơlĕnh hă?

⁵ Lu iĕm tơhưch băl 'bơ̆t tơm 'long kôih. Ala kơ yơ̆p hơmŭl 'long hơdrih; pơlôch kon sâu pơm tơmam soi tơ lăm thŭng thong, tơ lăm trôm tơmo tih.

⁶ Lu tơmo iel rang tơ lăm thŭng noh jing rup Yang iĕm. Tơ lu tơmo noh lu iĕm tuh đak rơmă păng pơyơ̆r tơmam huch, păng phe 'ba pơm tơmam soi kơ lu tơmo 'noh. Liơ mă inh gơh ngach ưh kơ blĕk kơ tơdrong 'noh?

⁷ Tơ kơpal kông kơjung lu iĕm dan giơng tep, păng tŏk tơ noh wă pơyơ̆r tơmam soi.

⁸ Lu iĕm dan tơmam wă kơ 'blŏk gah rŏng kơ 'măng păng gah rŏng kơ lu jrăng 'măng. Lu iĕm achăng lê̆ Inh păng pơih pơdah bơih, giơng lu iĕm pơm kư̆ kă. Tŏk tơ kơpal giơng pơm kơ giơng iĕm rai să. Lu iĕm pơjing tơdrong pơgơ̆p hăm lu sư, iĕm lăng 'mêm kơ giơng, păng hưch kơ tơdrong lu sư jơ̆ng jôch.

⁹ Iĕm chĕp ba đak rơmă ôliwơ pơgang 'bâu phu pơyơ̆r ăn kơ yang Molek păng wơh lu bơngai jang năm tơ dêh ataih; jur truh tơ pơlei bơngai lôch!

¹⁰ Iĕm gleh lap bơih yua kơ trong ataih; mă-lei lu iĕm ưh kơ đei khan, noh jơ̆ tơdrong kơ đei. Lu iĕm chă 'bôh bơih jơhngơ̆m pran kơ iĕm kơdih, na iĕm ưh kơ đei rơdu tơrăn.

¹¹ Gơneh gơnơm kơ bu iĕm hli yom kơ bu, na iĕm mah pơma hơlĕnh kơ Inh. Ưh pă 'blŏk kơ Inh. Ưh pă 'măn Inh lăm jơhngơ̆m iĕm, hăm trŏ yua kơ Inh oei ngăn đunh dêh, na iĕm ưh kơ hli kơ Inh?

¹² Inh gô tơ'bôh pơdah tơdrong 'lơ̆ng iĕm tơdrong iĕm jang. Păng tơdrong noh tă ưh kơ đei yua kơ iĕm ngăl.

¹³ Mưh iĕm krao ôr wă kơ dŏng, gô lê̆ kơ lu rup yang 'noh dŏng pơklaih iĕm. Lăp minh hơyuh kial gô dơhlu pơđông lu rup yang iĕm 'noh. Lăm minh 'măng hơyuh kial tơthu đĕch gô hiong đĭ-đăng, mă-lei bơngai bu kơ'nơp lăm Inh, gô đei yua teh 'nâu păng đei iŏk kông rơgoh Inh.

Kră Yang pơlung bơngai băt tơbral

¹⁴ Sư gô khan: “Man bĕ, pơdơ̆ng bĕ, hơmet bĕ trong! Bơ'nguơih bĕ lu tơdrong găn kon pơlei Inh.”

¹⁵ Yua kơ Tơ'ngla Tih Hloh kơ đĭ-đăng, Tơ'ngla oei đei ling-lang. Anăn Sư Kră Yang 'Lơ̆ng Rơgoh, đei khan thoi âu: “Inh oei tơ anih kơpal hloh păng 'Lơ̆ng Rơgoh. Mă-lei kư̆m oei hơdai hăm bơngai đei jơhngơ̆m sơ'ngon tơbral tơdrong yoch, wă tơiung ming jơhngơ̆m lu bơngai băt tơjur akâu, wă pơlung jơhngơ̆m lu bơngai băt sơ'ngon kơdih yoch.

¹⁶ Inh ưh kơ wă jô̆ yoch ling-lang ôh, kư̆m ưh kơ hil mĭl ling-lang mơ̆n, hli kơ kơnh gô rơdu bơhngol păng kial dui jơhngơ̆m kon bơngai mă Inh đei pơjing bơih kư̆m hiong,

¹⁷ Yua kơ yoch lu sư hưch ham chă lơi kơdih, na Inh hil mĭl păng teh sư. Lăm kơplah Inh blĕk, Inh ôn bơih muh măt Inh hil, mă-lei lu sư oei wih kiơ̆ trong lăm jơhngơ̆m sư kơdih.

¹⁸ Inh 'bôh trong lu sư, mă-lei Inh gô pơklaih gô dui ba hăm nơ̆r pơlung,

¹⁹ wă khan: Ăn nơ̆r hơri bơnê tơ 'bơ̆r lu bơngai nhơ̆m hmoi lăm lu bơngai Isơrael. Kră Yang khan: Hiôk-hian, hiôk-hian bĕ kơ bơngai oei ataih păng lu bơngai oei jê̆, Inh gô pơklaih lu sư.

²⁰ Mă-lei lu bơngai kơnê̆ nhen thoi đak dơsĭ poh-yă ưh kơ gơh pơdơh hreh, đak dơsĭ tơdrŏ, teh trôk đông tŏk.

²¹ Kră Yang 'Bok Kei-Dei inh khan: “Lu bơngai kơnê̆ ưh kơ đei hiôk-hian.”