Êsai 56 - Sơ̆p Hlabơar Nơ̆r 'Bok Kei-Dei

Kră Yang krao đĭ-đăng rim adrĕch adrung

¹ Kră Yang khan thoi âu: Athei wei bĕ tơdrong 'lơ̆ng tơpăt. Păng pơm bĕ tơdrong trŏ 'lơ̆ng; yua kơ tơdrong dŏng pơklaih Inh wă jê̆ truh păng tơdrong 'lơ̆ng tơpăt Inh wă jê̆ pơdah bơih.

² Pŭn dêh kơ bơngai bu pơm tơdrong noh! Păng pŭn dêh kơ kon sâu đe bu wei kơjăp tơdrong trŏ; wă khan wei răk ưh kơ pơm glăi năr pơdơh Sa'bat păng wei ti ưh kơ pơm minh tơdrong kơnê̆ ayơ.”

³ Bơngai tơmoi pơgơ̆p hăm Kră Yang bơih 'nĕ kơ pơma khan: “Kră Yang sĭt gô lăng inh pha kơ kon pơlei Sư.” 'Nĕ ăn bơngai krĕo kư̆m pơma khan: “Inh jơ̆ tơnơm 'long kro.”

⁴ Kră Yang khan thoi âu: Lu bơngai krĕo wei năr pơdơh Sa'bat Inh. Rơih iŏk dôm tơdrong Inh lăp đon, chĕp kơjăp nơ̆r pơgơ̆p Inh,

⁵ Inh gô ăn kơ lu sư hơdai tơ lăm hnam Inh wă khan lăm dur Inh. Minh anih 'blŏk hơdơ̆r păng minh anăn gĭt hloh kơ kon drŏ-nglo, kon drŏ-kăn; Inh gô ăn dơ̆ng kơ lu sư minh anăn mă oei oei ling-lang ưh kơ đei layơ tôch.

⁶ Dôm Lu bơngai tơmoi mă đei pơgơ̆p hăm Kră Yang bơih, wă chu kiơ̆ kơ Sư 'mêm kơ anăn Kră Yang păng wă pơm đĭch đam Sư; lu bơngai noh wei răk năr pơdơh Sa'bat huay kơ pơm glăi, păng chĕp kơjăp nơ̆r pơgơ̆p Inh.

⁷ Na Inh gô anhăk lu sư tŏk tơ kơpal kông rơgoh Inh ngăl, Ăn kơ lu sư hiôk chơt lăm hnam Inh krao khan. Tơmam soi 'buh păng tơmam soi nai lu sư pơyơ̆r, tơ kơpal chơnang soi Inh gô sơng iŏk; yua kơ hnam Inh gô krao hnam krao khan ăn kơ đĭ-đăng adrĕch adrung kon pơlei.

⁸ Kră Yang Tih Hloh, Tơ'ngla krao akŭm kon pơlei Isơrael đơ̆ng tơklah tơklang khan thoi âu: Kon pơlei mă lu sư akŭm bơih, Inh gô wă krao akŭm dơ̆ng lu kon pơlei nai brŏk hăm sư.

Chrih hil kơ Isơrael pơm yoch

⁹ Ơ khŭl sem dơrong tơ anih tơmăn glă, Khŭl lu sem bri, đĭ-đăng năm sa bĕ.

¹⁰ Lu bơngai Isơrael gak tă kơ măt tol, ưh kơ băt tơdrong kiơ. Đĭ-đăng lu sư thoi kŏ kơmlo, ưh kơ băt kơ kuăl, 'maih 'bĭch ling-lang păng tep blêk apo kư̆ kă đĕch;

¹¹ Lu sư jơ̆ kŏ sa dư, ưh kơ băt phĭ. Noh bơih lu bơngai wei triu ưh kơ hlôh wao: Chă wơ̆t kiơ̆ trong kơdih lu sư; rim 'nu lu sư chă tơdrong pơyua kơdih, đơ̆ng blŭng truh tơ tôch.

¹² Lu sư khan: “Năm bĕ, inh gô iŏk tơdrô, bĕ bơ̆n et tơdrô kơtang mơ̆ng kơ wă; Năr dơning kư̆m gô lei-lăi thoi năr 'nâu, et sa rai tih hloh dơ̆ng.