Êsai 54 - Sơ̆p Hlabơar Nơ̆r 'Bok Kei-Dei

Tơdrong ư-ang kơ Siôn tơ anăp kơnh

¹ Ơ bơngai drŏ-kăn hơwŏng, bơngai ưh kơ đei hơiơch hơri bĕ. Ơ bơngai tam mă jĭ rơneh, hơri jreo hiôk chơt bĕ, yua kơ kon hơ'lơ̆p bơngai drŏ-kăn tŭk gô đei lơ hloh kơ kon hơ'lơ̆p bơngai drŏ-kăn mă đei klo, Kră Yang khan thoi 'noh.

² Pơih mă să bĕ hnam khăn ih. Pơih lang mă să bĕ anih ih oei; 'nĕ kơ rôp pơjăng; dăng tơlei mă kơjung rơdăng, pơ̆ng 'long hơdrơ̆ng mă kơjăp!

³ Yua kơ iĕm gô rai lơ năm tơ gah 'ma păng gah 'ngiĕo; adrĕch adrung iĕm gô đei iŏk lu teh đak, păng gô oei tơ lu pơlei mă đĭ lê̆ bri juơ boih.

⁴ 'Nĕ kơ hli; yua kơ iĕm gô ưh kơ đei mơlâu ôh. 'Nĕ kơ bơngơ̆t; yua kơ đe ưh pă pơm kơ iĕm mơlâu dơ̆ng bơih. Ih gô hiơt tơdrong mơlâu kơplah iĕm oei mơlôh sơ̆, păng ưh pă 'blŏk dơ̆ng tơdrong mơlâu kơplah iĕm adro.

⁵ Yua kơ Tơ'ngla pơjing iĕm noh klo iĕm. Anăn Sư Kră Yang Tih Hloh. Tơ'ngla huai iŏk iĕm noh mă Tơ'ngla Rơgoh Isơrael; Sư noh boih Kră Yang 'Bok Kei-Dei kơ đĭ plĕnh teh.

⁶ Kră Yang krao iŏk iĕm thoi drŏ-kăn klo achăng lê̆ păng ơh sơ'ngon lăm jơhngơ̆m, nhen thoi akăn iŏk oei kơplah oei mơlôh, Kră Yang 'Bok Kei-Dei iĕm khan thoi noh.

⁷ Inh achăng hŭt iĕm lăp minh kơchon; mă-lei hăm tơdrong 'mêm mơnat tih Inh gô sơng iŏk iĕm brŏk.

⁸ Lăm jơhngơ̆m Inh oei hil mĭl dêh. Inh ôn muh măt Inh ưh kơ đei lăng iĕm minh rơwưh minh bruh minh 'biơ̆. Mă-lei yua kơ jơhngơ̆m đon 'mêm mơnat tih ling-lang. Inh gô mơnat kơ iĕm.” Kră Yang, Tơ'ngla dŏng pơklaih iĕm khan thoi noh.

⁹ Inh lăng tơdrong noh thoi đak lơ̆p jơhnơr Nôê sơ̆. Thoi Inh pơkă khan đak ưh kơ đei layơ wă lơ̆p pơđĭ kơpal teh đơ̆ng; na Inh kư̆m pơkă khan Inh ưh pă hil kơ iĕm dơ̆ng bơih păng kư̆m ưh kơ wă chrih phak iĕm dơ̆ng.

¹⁰ Mă đơ̆ng kông hiŏng tơ nai, mă đơ̆ng groi rĭ tơplih, mă-lei jơhngơ̆m đon Inh 'mêm mơnat hăm iĕm ưh kơ đei tơplih. Nơ̆r pơgơ̆p hiôk-hian Inh ưh kơ đei tơplih Kră Yang, jơ̆ Tơ'ngla 'mêm mơnat kơ iĕm pơma thoi noh.

¹¹ Ơ lu bơngai oei pơmat-tat, đơ̆ng kial hơbŭt huơ̆r ưh kơ đei bu pơlung. 'Nâu Inh gô man ih hăm tơmo gĭt, lơ̆k hơnă ih păng tơmo gĭt Saphir.

¹² Inh gô iŏk tơmo gôh gĭt pơm hnam thôt, iŏk tơmo gĭt rang pơm rim 'măng jang ih păng đĭ-đăng dur ih tă pơm păng tơmo gĭt ngăl.

¹³ Đĭ-đăng kon ih gô đei Kră Yang bơtho tơ'bôh, păng tơdrong hiôk-hian kon hơ'lơ̆p ih gô tih tơpă.

¹⁴ Tơdrong 'lơ̆ng tơpăt hơnơ̆ng gô pơm kơ ih kơjăp Tơdrong đe pơjuă pơđep gô weh ataih đơ̆ng ih yua kơ ưh kơ đei hli tơdrong kiơ ôh. Ih gô klaih đơ̆ng tơdrong hli tơrơ, yua kơ tơdrong noh ưh kơ đei layơ truh jê̆ ih.

¹⁵ Tơdah đe chă đon wă pơrăm ih, noh ưh kơ trŏ đơ̆ng Inh. Bơngai bu chă đon wă pơrăm ih sư gô pơ̆k huŏng yua kơ đơ̆ng ih.

¹⁶ 'Nâu, Inh bơih pơjing bơngai hơjơ̆m dơhlu ŭnh soh ngar păng hơjơ̆m tơmam tơblah wă yua; păng kư̆m đơ̆ng Inh bơih pơjing lu bơngai chă pơrăm. Wă chă pơm tơdrong pơrăm.

¹⁷ Mă dôm tơmam tơblah sư pơm wă pơrăm Ih gô ưh kơ kĕ păng dôm nơ̆r lu bơngai pơma jâu ih gô glăi đĭ. Noh bơih tơdrong Inh ăn kơ lu đĭch đam Kră Yang, păng tơdrong lăng pơsĭt đơ̆ng Inh ăn, Kră Yang khan thoi noh.