Êsai 5 - Sơ̆p Hlabơar Nơ̆r 'Bok Kei-Dei

Tơdrong hơri pơđơ̆k kơ pơgar Hơmu

¹ Inh gô hơri ăn kơ bơngai mă inh 'mêm, minh 'bai hơri gah pơgar hơmu sư, buăl mă inh 'mêm đei minh hlak pơgar hơmu tơ kơpal groi hơdrih 'lơ̆ng.

² Sư choh teh preh dônh lê̆ tơmo đĭ, sư pơtăm rơih iŏk tơm hơmu bluh 'lơ̆ng, sư pơdơ̆ng minh pôm hnam thôt tŏk-bŏk pơgar păng sir minh pôm sơlŭng wă hmĕt iŏk đak hơmu sư. Sư hơmĕng hơmu sư đei plei 'lơ̆ng mă-lei tă kơ plei đĭ wir.

³ “Ơ kon pơlei oei lăm pơlei Jêrusalem păng lu bơngai oei lăm char Juđa. Apinh sek tơlang bĕ kơ Inh păng pơgar hơmu Inh.

⁴ Hăm đei tơdrong kiơ gơh pơm dơ̆ng kơ pơgar hơmu Inh. Mă Inh tam mă pơm ăn kiơ kơ sư? Kơplah Inh hơmĕng kơ đei plei 'lơ̆ng mă-lei tă tơ plei wir kơnê̆?

⁵ 'Nâu, Inh roi kơ lu iĕm. Tơdrong Inh wă pơm kơ pơgar hơmu Inh. Inh gô yuih lê̆ dur war, na đe gô phĕ sa plei sư đĭ, Inh gô tơlơ̆ lê̆ dur noh na đe gô pơjuă pơrăm sư.

⁶ Inh gô lê̆ sư Jing bri, ưh kơ đei hơleh dơng seh hơmet sư; na 'nhĕt jơla gô chăt krênh tơm sư. Inh gô khan kơ hơmơ̆l 'nĕ pă 'mi jruh tơ pơgar noh.

⁷ Pơgar hơmu Kră Yang Tih Hloh noh jơ̆ adrĕch Isơrael, păng lu bơngai Juđa noh bơih tơm 'long pơtăm mă sư lăp đon. Hơmĕng wă kơ sư 'lơ̆ng tơpăt mă tă kơ pham lĕch sĕch huŏng, hơmĕng kơ sư tơpăt hơnơ̆ng mă tă đei tơdrong ôr krao.

⁸ Răm-'băm dêh kơ lu iĕm bơngai mă pơm hnam thim hnam nai dơ̆ng, păng choh chŭn thim chŭn nai dơ̆ng, na jing pă đei teh 'bơ̆t yơ rơhơi dơ̆ng, păng lu iĕm jing oei adrô̆ lăm dêh char.”

⁹ Kră Yang Tih Hloh khan 'bơ̆t đon inh: “Sĭt tơpă gô đei lơ hnam gô lê̆ jing juơ, lu hnam tih kơjung păng 'lơ̆ng mă-lei ưh kơ đei bu oei lăm noh!

¹⁰ Mơjĭt Hekta mir hơmu hmĕt iŏk đak sư lăp minh ge đĕch, mơjĭt kơđŏng pŭng adrĕch, kĕch iŏk lăp minh kơdŏng pŭng đĕch.”

¹¹ Răm-'băm dêh kơ bơngai bu mă đơ̆ng hrôih, drôih chơchă tơdrô, pơgŏk kơ tơdrô dĭng măng, dĭng tơdrô soh chhông lu sư!

¹² Lăm năr et sa lu sư reh brŏ, hlôm lillul teh hơgơ̆r hăm et tơdrô, mă-lei lu sư ưh kơ tơchĕng tơdrong Kră Yang pơm; lu sư kư̆m ưh kơ 'bôh đêl dôm tơdrong đơ̆ng ti Kră Yang pơjing.

¹³ Yua ưh kơhlôh kơwao na kon pơlei pơla Inh jing pơm đĭch đe, lu bơngai yŏng mơng jing lôch kơ pơngot rơwĕt, kon pơlei lu sư jing ol ăk yua kơ rơhing kơ đak.

¹⁴ Noh bơih na jing dêh hơtâu pơih 'măng sư rai să ha 'bơ̆r wă 'maih luăn sư ưh kơ pơdơh ôh, lu bơngai đe ư-ang păng kon pơlei pơla sư đĭ-đăng lu bơngai chơt hiôk oei lăm pơlei, tă kơ huŏng tơ lăm noh ngăl.

¹⁵ Lu bơngai hmă gô kŭp kơ̆l, kon bơngai gô tơjur, lu bơngai pơang gô lê̆ tơ ala.

¹⁶ Mă-lei Kră Yang Tih Hloh, gô pôk hơtŏk tơ kơpal hloh hăm tơdrong sek tơlang tơpăt hơnơ̆ng, păng Kră Yang 'Bok Kei-Dei 'lơ̆ng Rơgoh gô pơdah Sư 'lơ̆ng rơgoh lăm tơdrong 'lơ̆ng tơpăt.

¹⁷ Kơplah noh lu triu kon gô sa 'nhĕt, nhen thoi tơ tơmăn 'nhĕt sư kơdih, gah triu gô đei sa đêl đơ̆ng chŭn lu bơngai mơdrŏng lê̆ bri.

¹⁸ Răm-'băm dêh kơ bơngai bu đui tơdrong yoch hăm tơlei hơlĕnh; păng dui ba tơdrong yoch thoi tơlei dui gre.

¹⁹ Lu sư khan: “Apinh Ih jah pơm pơkeh tơdrong jang Ih, wă kơ lu nhôn 'bôh! Apinh tơdrong tơdă đơ̆ng Yang 'Lơ̆ng Rơgoh Isơrael jah truh, jing keh. Wă kơ lu nhôn băt.”

²⁰ Răm-'băm dêh kơ bơngai bu khan pơm kơnê̆ noh 'lơ̆ng, khan pơm 'lơ̆ng noh kơnê̆; khan măng mu noh hơdah, hơdah noh khan măng mu; tơmam tăng khan 'ngam, tơmam 'ngam khan tăng.

²¹ Răm-'băm dêh kơ bơngai bu lăng kơdih akâu sư khan hơgei, pôk kơdih akâu sư khan bơngai hlôh wao!

²² Răm-'băm dêh kơ bơngai bu khan nuih mưh et tơdrô, đei jơhngơ̆m pran hrâu đơ̆ng tơdrô.

²³ Lu sư achăng lê̆ lu bơngai pơm kơnê̆ yua kơ đei iŏk pơgâm sa tơmam đe răt, sơngah ưh kơ pơm tơdrong 'lơ̆ng tơpăt kơ bơngai ưh kơ đei yoch.

²⁴ Lei na nhen thoi pla ŭnh sa tơm hơnong 'ba, thoi 'nhĕt kro mơ̆t lăm pla ŭnh. Na rơh lu sư kư̆m bŭk hĕch păng pơkao plei lu sư đông thoi 'mui teh; yua kơ lu sư sơngah tŭk lê̆ khôi juăt Kră Yang Tih Hloh păng pơjăm nơ̆r Kră Yang 'Lơ̆ng Rơgoh Isơrael.

²⁵ Thoi noh bơih na Kră Yang hil mĭl kơ kon pơlei Sư; Kră Yang hiŏng ti teh lu sư, kông tơdrŏ, akâu bơngai lôch 'bĕnh-'bang kơ trong. Mă-lei tơdrong Kră Yang hil oei ưh kơ ngach oei hiŏng ti hil kơ lu sư 'mơ̆i.

²⁶ Kră Yang Sư pơdơ̆ng hla-kơ ăn kơ lu bơngai oei tơ dêh ataih, păng hơhôch krao lu sư đơ̆ng jơ̆p-jang tôch kơ teh đak, na lu sư hăt hot wă kơ jah truh tĕnh.

²⁷ Lăm lu sư ưh kơ đei minh 'nu bơngai bu gleh lap, kơtơih pơ̆k, ưh kơ đei bơngai bu tep kơkôi păng tep blêk; ưh kơ đei bơngai bu tơlei tơ̆n sư tơyaih dah tơlei chơkhŏ sư kơtĕch.

²⁸ 'Brơ̆m hră lu sư suĕng dêh, hră lu sư hơ'năk lê̆ bơih, kơchôp aseh lu sư thoi tơmo tơneh. Jơ̆ng gre thoi phŭt huơ̆r.

²⁹ Lu sư ôr jơwa thoi dăm-brang akăn, gơhuh nhen dăm-brang mơlôh, lu sư grĕnh chă rôp sa sem bri păng hor ba, ưh kơ đei bu kĕ dŏng pơklaih ôh.

³⁰ Lăm năr noh lu sư ôr thoi jơwa đak dơsĭ poh-yă, tơdah đe tơmang lăng tơ teh noh măng mu păng răm rai ngăl, mă lu tơdrong hơdah hơmơ̆l găm klơ̆p lê̆ đĭ.