Êsai 45 - Sơ̆p Hlabơar Nơ̆r 'Bok Kei-Dei

Kră Yang 'Bok Kei-Dei yua pơtao Sirus

¹ Kră Yang khan kơ Sirus bơngai Sư rơih tuh đak pơgang 'bâu phu. Inh rôp ti 'ma sư bơih wă pơm kơ lu dêh char chu kơ sư, na Inh iŏk lê̆ tơmam tơblah lu pơtao, wă pơih 'măng Jang pơlei, 'bơ̆t anăp sư, na đe ưh kơ gơh tang dơ̆ng!

² Inh gô năm adrol kơ ih, Inh gô pơm kơ lu kông groi dơnă, teh pơchah lê̆ lu 'măng Jang kong, gơ̆ lê̆ chơkăl bơsei.

³ Inh gô ăn kơ ih tơmam gĭt tah ôn lăm anih măng mu, Ăn kơ ih mŭk tơmam gĭt lăm anih hlơp, wă kơ ih băt kơ Inh bơih Kră Yang, 'Bok Kei-Dei đe Isơrael. Tơ'ngla krao ih hăm anăn ih.

⁴ Yua kơ Jakôp jơ̆ đĭch đam Inh păng Isơrael lu bơngai mă inh rơih iŏk. Na Inh krao ih hăm anăn ih păng ăn anăn ih đe gô pơyom, mă khan ih ưh kơ băt kơ Inh ră.

⁵ Inh bơih Kră Yang, ưh kơ đei yang nai dơ̆ng ôh, 'nguaih kơ Inh ưh kơ đei Yang nai dơ̆ng. Mă đơ̆ng ih ưh kơ băt kơ inh, Inh gô ăn kơ ih pran kơtang.

⁶ Wă kơ đĭ lu bơngai dơ̆ng anih măt 'năr lĕch. Truh tơ anih măt 'năr mơ̆t, wă kơ lu sư băt ưh kơ đei Yang nai ôh 'nguaih kơ Inh. Inh bơih Kră Yang, ưh kơ đei yang nai dơ̆ng ôh.

⁷ Inh bơih Tơ'ngla pơm đei tơdrong hơdah păng pơjing tơdrong măng mu, pơm đei tơdrong hiôk-hian păng kư̆m ăn đei tơdrong pơrăm, Inh bơih Kră Yang Tơ'ngla pơm dôm tơdrong noh.

⁸ Ơ lu plĕnh tơ kơpal ti, ăn bĕ hơmơ̆l tuh tơdrong 'lơ̆ng tơpăt thoi 'mi. Ơ teh pơih bĕ mă să, wă kơ găr tơdrong dŏng pơklaih, păng găr tơdrong 'lơ̆ng tơpăt chăt bluh tơmơ̆ng! Inh bơih Kră Yang Tơ'ngla pơjing tơdrong noh.

⁹ Răm-'băm dêh kơ lu bơngai pơjah pơjăng hăm Tơ'ngla pơjing sư! Minh pôm bô̆i hơdai hăm bô̆i nai 'bơ̆t teh! Teh lơ̆n hăm gơh pơma kơ bơngai man sư khan: Ih pơm kiơ noh? Dah mă tơmam pơma kơ bơngai pơm sư khan: Sư ưh kơ đei đon wă chĕp.

¹⁰ Răm-'băm dêh kơ lu bơngai bu pơma kơ 'bă sư khan: ‘Ih pơjing kơ bu?’ Dah mă pơma kơ mĕ sư khan: ‘Ih jĭ anăp tơpŭ kơ kiơ?’

¹¹ Kră Yang Tơ'ngla 'lơ̆ng rơgoh đe Isơrael Tơ'ngla Pơjing khan thoi âu: “Yua kơ lu iĕm jet Inh, gah tơdrong gô truh kơ kon pơlei Inh, gah tơdrong jang đơ̆ng ti Inh.

¹² Inh bơih Tơ'ngla pơjing teh đak păng pơjing kon bơngai oei kơpal teh. Đơ̆ng ti Inh kơdih pơm, bơlang lu plĕnh păng pơjing lu sơnglŏng.

¹³ Inh gô tơiung sirus pơm tơdrong 'lơ̆ng tơpăt Inh, păng gô pơm ăn kơ trong sư tơpăt, sư gô pơm ming pơlei tih Inh păng tơlĕch lu kon pơlei Inh đơ̆ng đe puh ba pơm bơnă ưh kơ kăl kơ huai iŏk hăm tơmam apah ôh.” Kră Yang Tih Hloh khan thoi noh.

¹⁴ Kră Yang khan thoi âu: “Lu iĕm gô iŏk đĭ Tơmam teh đak Êyiptơ, mŭk tơmam teh đak Kus păng bơngai Sabê, lu bơngai tih kơjung, lu sư gô năm tơ iĕm păng kiơ̆ gah lu iĕm. Lu sư gô yak kiơ̆ rŏng lu iĕm, lu sư gô năm tơ iĕm hăm glang oei chô̆ lu sư truh bon kơkuh 'bơ̆t anăp lu iĕm, lu sư adrĭ apinh khan: ‘Tơpă Kră Yang 'Bok Kei-Dei oei hơdai lu iĕm, ưh kơ đei yang nai ôh, ưh kơ đei Yang nai dơ̆ng.’ ”

¹⁵ Sĭt tơpă Ih Kră Yang 'Bok Kei-Dei ôn akâu Ih, Ơ Kră Yang 'Bok Kei-Dei Ih, jơ̆ Kră Yang dŏng pơklaih đe Isơrael.

¹⁶ Đĭ-đăng lu bơngai pơm man rup yang lu sư gô mơlâu păng rŭng răng, lu sư mơlâu dêh kơdâu weh đĭ.

¹⁷ Mă-lei bơngai Isơrael, Kră Yang gô dŏng pơklaih. Hăm tơdrong dŏng pơklaih ling-lang ưh kơ đei layơ tôch. Lu iĕm huay pă mơlâu dah rŭng răng dơ̆ng bơih truh tơ đĭ chăl khŏm khŏm.

¹⁸ 'Nâu Kră Yang khan: Inh bơih Tơ'ngla pơjing lu plĕnh, Sư bơih Kră Yang 'Bok Kei-Dei sư pơjing plei teh. Sư pơjing plei teh ưh kơ lê̆ hoh bơbông đĕch ôh, sư pơjing wă kơ đei kon pơlei oei, Kră Yang pơma thoi âu: Inh bơih Kră Yang, ưh kơ đei yang nai ôh.

¹⁹ Inh ưh kơ đei pơma hăm lu iĕm lăm tơdrong hlơp ôh păng kư̆m ưh kơ pơma đơ̆ng lăm char măng mu, Inh ưh tam đei pơma kơ adrĕch adrung Jakôp khan: ‘Lu iĕm chă Inh tơdrong ưh kơ đei Inh jơ̆ Kră Yang pơma tơpăt, roi tơdrong trŏ sĭt.’

²⁰ Ơ lu kon pơlei klaih đơ̆ng anat anot đơ̆ng jơ̆p kơ dêh char. Năm tơ âu akŭm băl bĕ, đĭ-đăng wang năm jê̆. Lu bơngai tung rup yang pơm păng 'long. Lu sư ưh kơ hlôh krao khan kơ yang mă ưh kơ gơh dŏng pơklaih lu sư.

²¹ Lê̆ lu sư năm pơđâu băl Ră roi bĕ, pơdah bĕ khan bĕ. Đơ̆ng chăl adrol sơ̆ bu ră roi pơdah tơdrong âu? Bu pơdah tơdrong âu đơ̆ng blŭng-a sơ̆? Hăm trŏ kơ Inh Kră Yang ưh? 'Nguaih kơ Inh ưh kơ đei 'Bok Kei-Dei nai ôh! Ưh kơ đei 'Bok Kei-Dei 'lơ̆ng tơpăt nai păng ưh kơ đei Kră Yang dŏng pơklaih nai yua kơ Inh bơih Kră Yang 'Bok Kei-Dei, ưh kơ đei yang nai dơ̆ng.

²² Ơ đĭ-đăng lu bơngai oei jơ̆p anih tôch kơ teh. Wih brŏk bĕ tơ Inh na lu iĕm gơh klaih! Yua kơ Inh bơih Kră Yang 'Bok Kei-Dei, ưh kơ đei yang nai ôh.

²³ Kơdih kâu Inh pơkă bơih: Lăm nơ̆r tơpăt sĭt, nơ̆r lĕch bơih đơ̆ng 'bơ̆r Inh. Nơ̆r pơma noh ưh kơ gơh wih pơdrâu dơ̆ng: Đĭ-đăng kŭl-tăng gô sơtơ̆p 'bơ̆t anăp inh, rim 'bơ̆r gô pơkă 'bơ̆t anăp Inh.

²⁴ Đe gô pơma pơđâu gah Inh khan: Lăm Kră Yang đĕch bơ̆n đei tơdrong 'lơ̆ng tơpăt păng pran kơtang. Đĭ-đăng lu bơngai hil kơ sư gô năm tơ sư na mơlâu.

²⁵ Lăm Kră Yang đĭ-đăng kon sâu Isơrael gô đei 'lơ̆ng tơpăt păng bơnê ư-ang kơ Kră Yang.