Êsai 42 - Sơ̆p Hlabơar Nơ̆r 'Bok Kei-Dei

Đam Kră Yang

¹ 'Nâu bơih đam Inh bơngai mă Inh dŏng tơgŭm, bơngai mă Inh rơih iŏk, bơngai mă Inh lăp đon. Inh gô dan yang Bơhngol Inh lăm sư, sư gô ba ăn tơdrong tơpăt hơnơ̆ng kơ lu teh đak.

² Sư ưh kơ ôr pơret, kư̆m ưh kơ pơma re, ưh kơ ăn kơ đe kơtơ̆ng nơ̆r sư tơ rok trong pơlei.

³ Sư ưh kơ gơ̆ lê̆ 'long gơlăr wă tơgơ̆ bơih păng ưh kơ pĭt lê̆ ŭnh oei khơ̆ng kơplah brai wă jê̆ tôch. Sư gô ba tơdrong tơpăt hơnơ̆ng hăm tơdrong sĭt.

⁴ Sư ưh kơ gleh lap, ưh kơ bơ̆l hăl ôh, dĭng truh kơ pơjing tơdrong tơpăt hơnơ̆ng tơ teh đak âu, lu bŏl đak dơsĭ chang gô hơmĕng kơ khôi juăt sư.

⁵ Kră Yang Tơ'ngla pơjing lu plĕnh păng bơlang plĕnh, Sư Tơ'ngla lơ̆k bơlang bơih teh hăm dôm tơmam lĕch đơ̆ng noh. Tơ'ngla ăn kial dui jơhngơ̆m kơ kon bơngai păng ăn tơdrong arih lu bơngai yak năm kơpal teh. 'Nâu Kră Yang 'Bok Kei-Dei khan kơ đam Sư.

⁶ Inh Kră Yang krao ih wă tơ'bôh tơdrong 'lơ̆ng tơpăt Inh, Inh gô rôp kơjăp ti ih păng wei-lăng ih, Inh gô jao ăn kơ ih pơm tơdrong pơgơ̆p Inh hăm kon pơlei ih tơm tơdrong hơdah ăn kơ lu teh đak.

⁷ Wă pơih ăn măt lu bơngai tol, tơlĕch lu bơngai đe chĭt lăm hnam phak păng đơ̆ng anih măng mu.

⁸ “Inh bơih Kră Yang, Noh jơ̆ Anăn Inh. Inh ưh kơ asong tơdrong ư-ang 'lơ̆ng rŏ Inh kơ minh 'nu bu nai, kư̆m ưh kơ ăn tơdrong pơư bơnê Inh kơ lu rup man!”

⁹ 'Nâu tơdrong adrol đei truh 'blep trŏ bơih, dang ei Inh roi ăn kơ iĕm tơdrong 'nao dơ̆ng; adrol kơ Sư wă truh, Inh roi ăn kơ iĕm băt adrol.

Hơri bơnê

¹⁰ Hơri bơnê bĕ kơ Kră Yang 'bai hơri 'nao. Hơri bơnê bĕ kơ Sư đơ̆ng anih tôch kơ teh đak. Ơ Lu bơngai năm tơ đak dơsĭ, hăm lu sem brem arih lăm noh, ơ lu bŏl đak dơsĭ păng đĭ-đăng lu bơngai oei lăm noh.

¹¹ Ơ lu char glă hăm lu pơlei tih jreo tơkĕch bĕ, lu kon pơlei Kêdar oei kư̆m hiôk thoi noh mơ̆n; ơ kon pơlei Sêla hơri bĕ, krao ôr chơt hiôk bĕ dơ̆ng kơpal kông ti!

¹² Pơyơ̆r bĕ tơdrong ư-ang kơ Kră Yang păng roi tơdrong bơnê kơ Kră Yang tơ lăm jơ̆p-jang bŏl dơsĭ.

¹³ Kră Yang năm tơ anăp thoi minh 'nu bơngai pran kơtang, Sư pơtrŭt jơhngơ̆m hưch hal nhen thoi linh tơblah, Sư ôr pơret re, Sư nuih tơblah hăm ayăt jei Sư.

¹⁴ “Inh oei hreh đunh bơih, Inh ngăn hrĕng ĕnh kơdih akâu. Mă-lei dang ei inh tơngưih re, dui jơhngơ̆m gleh nhen drŏ-kăn tơpŭ.

¹⁵ Inh wă pơrăm lê̆ kông groi Inh pơm kơ lu 'nhĕt 'long jô kro, Inh gô pơm kơ glung krong jing teh hrĕng đak dơnâu gô hrơ̆.

¹⁶ Inh gô chông lu bơngai măt tol rok trong lu sư ưh kơ biơh năm, dui lu sư rok trong iĕ mă lu sư ưh tam juăt; inh gô tơplih măng mu jing hơdah 'bơ̆t anăp lu sư, Inh gô pơm kơ teh jrŭ đơng jing dơnă. Tơpă inh gô pơm lu tơdrong noh păng ưh kơ achăng tŭk lu sư ôh.

¹⁷ Mă-lei lu bơngai gơnang kơ rup yang lu sư traih lu bơngai khan kơ lu rup lu sư man: Lu iĕm bơih yang lu nhôn, tă kơ gô kơdŭn tơ rŏng păng mơlâu.

Isơrael tol păng klĭk

¹⁸ Ơ lu bơngai klĭk, mơ̆ng bĕ, ơ lu bơngai măt tol lar măt iĕm lăng bĕ;

¹⁹ Bu măt tol, thoi đam Inh? Bu klĭk nhen bơngai mă Inh wơh năm bơih? Bu măt tol nhen bơngai jao Sư đĭ kơ Inh? Bu măt tol nhen đam Kră Yang?

²⁰ Iĕm 'bôh ră lơ tơdrong mă ưh kơ wă lăng hơlen, iĕm đei ră hla đon mă ưh kơ wă mơ̆ng.

²¹ Kơ tơdrong 'lơ̆ng tơpăt Sư kơdih Kră Yang lăp đon, Sư gô pơm kơ khôi juăt Sư hơdah păng ư-ang.

²² Mă-lei kon pơlei Sư đe tơtông, đe tơgar iŏk, Đĭ-đăng lu sư huŏng lăm sơlŭng păng đe chĭt ôn lăm sơlŭng jrŭ, lu sư jing tơmam đe tơtông iŏk. Mă ưh kơ đei bu dŏng pơklaih lu sư, mă ưh kơ đei bu khan: “Pơdrâu kơ Inh wă!”

²³ Bu lăm lu iĕm gô pơđêng đon mơ̆ng tơdrong 'nâu, bu kơchăm mơ̆ng đơ̆ng âu tơ anăp?

²⁴ Bu jao lê̆ Jakôp ăn đe plah iŏk, păng lê̆ lu bơngai Isơrael ăn kơ đe tơtông? Ưh kơ trŏ Kră Yang Tơ'ngla mă lu bơ̆n pơm yoch hăm Sư hă? Lu sư ưh kơ wă yak kiơ̆ trong Kră Yang păng ưh kơ wei răk khôi juăt Sư?

²⁵ Na Kră Yang tuh tơdrong Sư hil, tơdrong tơblah wang tih dêh tơ lu sư, thoi ŭnh sa jum dăr mă lu sư ưh kơ hlôh, ŭnh sa lu sư mă-lei kư̆m ưh kơ bơngơ̆t.