Êsai 41 - Sơ̆p Hlabơar Nơ̆r 'Bok Kei-Dei

Kră Yang tơgŭm Isơrael

¹ Ơ lu bŏl đak dơsĭ oei hreh bĕ 'bơ̆t anăp Inh, wă kơ lu teh đak iŏk jơhngơ̆m pran 'nao lê̆ lu sư năm jê̆ Inh na pơma: Bĕ lu bơ̆n akŭm hơdai wă sek tơlang!

² Bu râu tơiung bơngai đơ̆ng gah hơlĕch? Kră Yang Krao sư năm bơ̆jang lăm tơdrong 'lơ̆ng tơpăt. Kră Yang jao đĭ teh đak ăn kơ sư, pơjuă lu pơtao tơ ala jơ̆ng sư, sư pơm kơ lu pơtao nhen 'bruih teh hăm đao gưm sư, jao lu pơtao hră sư pơm kơ lu sư thoi hơkam 'ba kial bơbơ̆t pơđông đĭ.

³ Sư druh lu sư ưh kơ đei tơdrong kiơ̆ 'bơm Sư, Na Sư rok trong mă jơ̆ng sư ưh tam mă biơh rok.

⁴ Bu đei pơm bơih tơdrong âu? Bu krao iŏk jơhnơr kon bơngai đơ̆ng blŭng-a? Noh Inh bơih Kră Yang blŭng-a, mă kư̆m oei dang ei truh kơ tôch. Inh bơih Kră Yang noh.

⁵ Lu bŏl đak dơsĭ 'bôh păng hli tơrơ, tôch kơ teh đak tơtơ̆ đĭ. Lu sư năm păng năm jê̆.

⁶ Rim 'nu tơgŭm băl, păng khan kơ 'nhŏng oh sư: Mă nuih bĕ!

⁷ Bơngai traih 'long pơtrŭt bơngai hling maih, bơngai tơtang hăm mut pơtrŭt lu bơngai hơjơ̆m, khan kơ bơngai hang: “Noh 'lơ̆ng bơih” đơ̆ng noh Sư iŏk kơđĭnh pơ̆ng wă kơ rup 'long noh huay kơ păk.

⁸ Mă-lei iĕm, ơ bơngai Isơrael, đĭch đam Inh, păng iĕm ơ adrĕch Jakôp bơngai mă Inh đei rơih iŏk bơih, adrĕch adrung Abraham buăl Inh.

⁹ Inh iŏk iĕm đơ̆ng tôch kơ teh đak, krao iŏk iĕm đơ̆ng puăn pah mum teh; Inh khan kơ iĕm: Iĕm bơih đam Inh, Inh rơih iŏk iĕm bơih, ưh kơ đei layơ achăng lê̆ ih.

¹⁰ 'Nĕ hli yua kơ Inh oei hơdai iĕm, 'nĕ tơrơ dêh, yua kơ Inh bơih Kră Yang 'Bok Kei-Dei iĕm! Inh gô ăn kơ iĕm pran; tơpă inh tơgŭm iĕm, Inh gô wei-lăng iĕm hăm ti gah 'ma 'Lơ̆ng Tơpăt Inh.

¹¹ 'Nâu lu bơngai mă hil kơ iĕm, lu sư gô mơlâu păng hlơ̆l. Lu bơngai iung blah iĕm lu sư gô răm păng lôch hiong.

¹² Lu iĕm gô chă lu bơngai pơm kơnê̆ kơ iĕm, mă-lei ưh kơ 'bôh. Lu bơngai tơblah plơ̆ hăm iĕm gô lôch răm đĭ thoi ưh kơ đei.

¹³ Yua kơ Inh bơih Kră Yang 'Bok Kei-Dei lu iĕm: Tơ'ngla rôp ti 'ma lu iĕm, păng khan kơ lu iĕm, 'nĕ kơ hli ôh Inh gô tơgŭm lu iĕm;

¹⁴ Ơ adrĕch Jakôp thoi hơdrông, ơ lu kon pơlei Isơrael, 'nĕ kơ hli kơ kiơ, Inh gô tơgŭm iĕm, Kră Yang pơma thoi noh, Tơ'ngla 'Lơ̆ng tơpăt đe Isơrael păng Tơ'ngla huai iŏk lu iĕm.

¹⁵ Âu, inh gô pơm kơ lu iĕm nhen thoi minh pôm tơmam preh 'ba 'nao hơnĕnh sư lơ păng han dêh, lu iĕm gô preh lu kông pơhĕch lê̆ lu Sư, lu groi jing thoi hơkam 'ba.

¹⁶ Lu iĕm gô um sư na gô tơthu pơđông lu sư, phŭt gô huơ̆r lu sư tơklah hiong đĭ, mă-lei gah lu iĕm gô chơt hiôk lăm Kră Yang gô ư-ang kơ Tơ'ngla 'Lơ̆ng Rơgoh Isơrael.

¹⁷ Lu bơngai dơnuh păng lu bơngai kơ'bah tơmam chơchă đak. Mă-lei ưh kơ đei, hơpiĕt đĭ kro yua kơ rơhing dêh, Inh bơih Kră Yang gô tơl nơ̆r lu sư, Inh bơih Kră Yang 'Bok Kei-Dei Isơrael ưh kơ achăng tŭk lu sư ôh.

¹⁸ Inh gô pơm kơ đak krong lĕch ro tơ kông groi mơ-mlưch păng tu đak glung gô ro 'bĕnh lăm thŭng, inh gô pơm kơ teh char glă jing dơnâu đak. Teh hrĕng kro gô jing đak mơlĕch.

¹⁹ Inh gô pơtăm tơ anih bri char glă, lu hơngo, 'long keo, 'long pơgang păng 'long ôliwơ. Inh gô pơtăm 'long hơngo hla iĕ, hơngo hmă, 'long krăk hơdai tơ lăm char glă.

²⁰ Wă kơ đĭ-đăng bơngai 'bôh păng băt, wă kơ tơchĕng hơdai hlôh khan, noh đơ̆ng ti Kră Yang pơm tơdrong 'nâu, păng Tơ'ngla 'Lơ̆ng Rơgoh Isơrael pơjing tơdrong noh.

²¹ Kră Yang khan: “Pơdah bĕ tơdrong lu iĕm, wă khan” Pơtao đe Jakôp khan: “Pơdah pơsĭt bĕ tơdrong lu iĕm khan trŏ.”

²² Lê̆ lu rup Yang roi dơ̆ng bĕ! Roi bĕ kơ lu nhôn tơdrong kiơ gô truh! Ră roi bĕ tơdrong blŭng-a sơ̆ sư đei lơliơ wă kơ nhôn lăng lăng păng hlôh kơ tơdrong tuch-luch sư thoi yơ, Athei roi kơ lu nhôn băt dôm tơdrong, kiơ gô truh ning-mônh.

²³ Roi bĕ kơ lu nhôn dôm tơdrong gô truh đơ̆ng rŏng kơnh, wă kơ lu nhôn băt kơ lu iĕm jơ̆ lu yang, pơm tơ'bôh bĕ tơdrong 'lơ̆ng dah tơdrong kơnê̆ wă kơ lu nhôn chhưu jơhngơ̆m păng lăng 'bôh hlĭch hlăch.

²⁴ Âu, lu iĕm ưh kơ rơ-a kiơ, tơdrong jang iĕm pơm kư̆m ưh kơ yua kiơ, bơngai mă rơih lu iĕm jơ̆ bơngai trŏ kơ areh krưp dêh tơpă.

²⁵ Inh tơiung minh 'nu bơngai đơ̆ng gah yă-nơ̆m păng sư năm bơih; Minh 'nu đơ̆ng gah 'năr lĕch sư krao apinh hăm Anăn Inh Sư pơjuă kơpal lu 'bok pơgơ̆r nhen pơjuă teh hlŭt, nhen thoi bơngai man gŏ pơjuă teh lơ̆n.

²⁶ Bu roi pơdah bơih tơdrong noh đơ̆ng blŭng-a wă kơ lu bơ̆n băt? Bu đei roi bơih đơ̆ng adrol sơ̆, wă kơ lu bơ̆n khan: “Sư trŏ bơih!” Ưh kơ đei bu ră roi ôh, ưh kơ đei bu năm khan ôh, ưh kơ đei bu kơtơ̆ng nơ̆r đơ̆ng lu iĕm ôh.

²⁷ Inh bơih mă adrol hloh roi kơ Siôn khan: “Lăng, lu sư âu!” Inh gô wơh minh 'nu rup Yang năm roi tơdrong 'nao 'lơ̆ng tơ plei Jêrusalem.

²⁸ Inh chă lăng, mă-lei ưh kơ đei bu, lăm lu rup Yang kư̆m ưh kơ đei Yang kiơ gơh chă đon, wă kơ mưh Inh jet sư gơh tơl tơwih kơ Inh minh nơ̆r.

²⁹ Tơpă đĭ-đăng lu sư jơ̆ tơdrong kơ đei, tơdrong jang lu sư jing pă yua, rup lu sư man, dang kial 'biao pă đei.