Êsai 37 - Sơ̆p Hlabơar Nơ̆r 'Bok Kei-Dei

Êsai khan lê̆ adrol tơdrong pơklaih Jêrusalem

¹ Kơtơ̆ng tơdrong noh, pơtao Hesekia hek hloi ao sư kơdih, hrŭk 'bi năm mơ̆t tơ lăm hnam akŭm kơkuh Kră Yang.

² Pơtao wơh Êliakim 'bok wei-lăng hnam pơtao, Sepna bơngai chih hla bơar păng lu kră lăm lu khŭl 'bok soi hơdai wang hrŭk asu 'bi, năm tơ Êsai 'bok khan lê̆ adrol kon drŏ-nglo Amôt.

³ Lu sư roi kơ Êsai khan: “Pơtao Hesekia pơma thoi âu: Năr âu jơ̆ năr sơ'ngon truh, 'năr đei chrih păng 'năr mơlâu, thoi drŏ-kăn anăp truh bơih năr tơpŭ kơ kon nge mă-lei ưh kơ kĕ đei jơhngơ̆m wă tơpŭ.

⁴ Rŏ lăng Kră Yang 'Bok Kei-Dei ih gô kơtơ̆ng dôm nơ̆r Rapsaka pơma, bơngai đơ̆ng pơtao Asiri wơh sư năm tơ âu wă pơma pơjăm Kră Yang 'Bok Kei-Dei arih ling-lang păng Kră Yang gô phak sư kiơ̆ thoi dôm nơ̆r mă Kră Yang 'Bok Kei-Dei kơtơ̆ng bơih, noh bơih ih krao khan bĕ kơ lu bơngai mă oei oei tơ âu!”

⁵ Lu đam kơiĕng Hesekia năm truh tơ Êsai:

⁶ Êsai khan: “Roi bĕ kơ yŏng lu iĕm, Kră Yang đei khan thoi âu: ‘'Nĕ kơ hli ôh kơ dôm nơ̆r mă lu iĕm đei kơtơ̆ng bơih nơ̆r đơ̆ng lu đam pơtao Asiri, pơma blông kơ Inh.

⁷ 'Nâu Inh gô ăn lăm đon sư, kơtơ̆ng tơdrong, đe roi na wih tơ dêh sư kơdih, tơ noh Inh gô pơm kơ sư lôch kơ đao gưm.

⁸ Kơplah Rapsaka kơtơ̆ng yŏng sư pơtao Asiri hlôi weh bơih đơ̆ng pơlei Lakis, na sư wơ̆t brŏk păng 'bôh pơtao Asiri oei blah pơlei Lipna.

⁹ Kơplah noh pơtao Asiri kơtơ̆ng roi tơdrong Tirhaka pơtao dêh char Kus khan: Sư chĕp ba linh wă tơblah hăm ih. Lăp kơtơ̆ng thoi noh, na sư wơh lu bơngai năm roi khan kơ pơtao Hesekia păng pơkă khan:

¹⁰ Lu iĕm roi bĕ kơ Hesekia pơtao Juđa khan: 'Nĕ ăn ôh Kră Yang 'Bok Kei-Dei mă ih gơnang hơlĕnh kơ ih, khan: Pơlei Jêrusalem gô ưh kơ đei jao lăm ti pơtao dêh Asiri.

¹¹ 'Nâu ih đei kơtơ̆ng bơih lu tơdrong pơtao dêh char Asiri pơm kơ lu dêh char, lu dêh char noh lôch răm đĭ bơih, na bĭ ih gơh klaih mơ̆n hă?

¹² Lu yang, lu teh đak mă 'bok yă inh đei pơrăm lê̆ đĭ bơih, lu yang char Gôsan, pơlei Haran, Rêsep păng lu kon pơlei Êđen oei tơ pơlei Têl Asar hăm gơh pơklaih lu sư ưh?

¹³ Pơtao pơlei Hamat, pơtao pơlei Arpat, pơtao pơlei Sepharwaim, pơtao pơlei Hêna păng pơtao pơlei Iwa tơ yơ?

Hesekia krao khan

¹⁴ Hesekia đei iŏk kơthơ đơ̆ng ti lu bơngai năm roi păng đŏk lăng, Na sư năm tơ hnam Kră Yang, pơih kơthơ noh 'bơ̆t anăp Kră Yang;

¹⁵ Pơtao Hesekia krao apinh Kră Yang khan:

¹⁶ Ơ Kră Yang Tih Hloh, 'Bok Kei-Dei đe Isơrael, Tơ'ngla hơ-oei tŏk-bŏk chêrubim, lăp minh Ih đĕch jơ̆ Kră Yang 'Bok Kei-Dei mă pơgơ̆r rim teh đak; Ih bơih pơjing plĕnh păng teh.

¹⁷ Ơ Kră Yang, apinh Ih pơgling đon mơ̆ng bĕ! Ơ Kră Yang apinh Ih pơih măt lăng bĕ! Apinh ih mơ̆ng bĕ dôm nơ̆r Senakêrip gơih wă pơma blông 'bơm Kră Yang 'Bok Kei-Dei arih ling-lang!

¹⁸ Ơ Kră Yang, tơpă, lu pơtao Asiri đei pơrăm bơih đĭ-đăng bơngai păng pơrăm teh lu sư,

¹⁹ Klơ̆m lê̆ rup yang lăm ŭnh. Noh ưh kơ yang tơpă ôh, noh đơ̆ng ti kon bơngai pơm păng 'long păng tơmo, na lu sư gơh pơrăm lu yang noh.

²⁰ Ơ Kră Yang, Kră Yang 'Bok Kei-Dei lu nhôn, dang ei apinh Ih dŏng pơklaih lu nhôn đơ̆ng ti Senakêrip, wă kơ rim teh đak băt kơ minh Ih đĕch Kră Yang!

²¹ Êsai kon drŏ-nglo Amôt wơh bơngai năm pơtruh nơ̆r kơ pơtao Hesekia: Kră Yang Kră Yang 'Bok Kei-Dei Isơrael khan thoi âu: Yua kơ ih đei krao khan apinh Inh wă pơm kơ Senakêrip, pơtao Asiri;

²² 'Nâu nơ̆r Kră Yang đei khan gah sư: Lu adruh hle pơlei Siôn Sư pơdê ih, pơjăm ih, kon drŏ-kăn pơlei Jêrusalem tơtreh kơ̆l gah rŏng ih!

²³ Ih pơjăm 'bơm bu? Ih đei pơma ôr wă blah bu păng ngơk lăng muh măt pơang? Pơ̆n blah Tơ'ngla 'Lơ̆ng Rơgoh Isơrael.

²⁴ Ih đei yua lu đam ih wă pơjăm Kră Yang, ih khan: Inh yua lu gre aseh lơ tŏk tơ kơpal kơ̆l kông, tơ anih kơjung ataih dêh lăm char Liban, inh kăl lu 'long hơngo mă kơjung dêh, 'long hơngo hla iĕ mă 'lơ̆ng hloh, inh năm truh bơih tơ kơ̆l kông kơjung hloh, lăm bri kơdrơ̆ng rơ̆m hloh.

²⁵ Inh đei sir bơih sơlŭng đak lăm dêh char tơmoi păng nhă đak noh; yua jơ̆ng inh pơm kơ lu glung dêh char Êyiptơ hrơ̆.’

²⁶ Ih ưh tam kơtơ̆ng ôh hă, Inh wă pơm tơdrong noh đơ̆ng sơ̆ đunh bơih? Inh đei pơkă bơih đơ̆ng chăl sơ̆ dang ei Inh ăn tơdrong noh truh jing, noh wă kơ ih pơrăm lu pơlei tih kơjăp pơm kơ lu pơlei tih jing anih pơchah hĕch hoch đĭ.

²⁷ Lu kon pơlei, lăm pơlei noh đĭ hơwơ̆l hơwang rơdu bơih, hli tơrơ mơlâu, jing thoi 'nhĕt bri păng thoi 'nhĕt 'lơ̆p. Thoi 'nhĕt chăt kơpal bơbŭng hnam, tam mă bluh tơmơ̆ng đĭ jô kro.

²⁸ Inh băt kơ ih, kơplah ih hơ-oei, kơplah ih năm kơplah ih truh, kơplah ih iung hil wă blah Inh.

²⁹ Yua kơ tơdrong ih hil iung wă blah Inh, nơ̆r ih pơma tơan kơnê̆ kơtơ̆ng truh tơ đon Inh bơih, na Inh iŏk gŏp tôt lăm muh ih păng iŏk dam pơhơ̆p 'bơ̆r ih, pơm kơ ih brŏk kiơ̆ đêl trong ih năm.

³⁰ Ơ Hesekia tơdrong âu jơ̆ tơdra wă kơ ih kơnăl: Sơnăm 'nâu ih gô đei sa plei chăt bluh kơdih đơ̆ng lăm mir chŭn, sơnăm đơ̆ng rŏng ih oei sŏng sa phe 'ba chăt kơdih mơ̆n, truh sơnăm mă pêng, ih athei rei păng yuă, ih pơtăm bĕ 'long hơmu păng sa plei sư.

³¹ Lăm adrĕch adrung Juđa bơngai oei arih gô Sôr rơh tơ ala păng gô đei plei tơ kơpal.

³² Lu kon pơlei mă oei arih gô lĕch đơ̆ng Jêrusalem păng đơ̆ng kông Siôn lu bơngai noh gô oei tơ jơ̆p kơ dêh char jơhngơ̆m Kră Yang Tih Hloh wă pơm ngei tơdrong noh.

³³ Thoi noh Kră Yang khan gah pơtao Asiri thoi âu: “Sư gô ưh kơ mơ̆t ôh lăm pơlei tih âu, ưh kơ đei prah minh găr 'brơ̆m hră, tơ noh ưh kơ đei chĕp khêl kư̆m ưh kơ pơm anih kơjăp tăp dăr kơ pơlei wă tơblah hăm sư.

³⁴ Sư gô wơ̆t brŏk kiơ̆ trong đêl sư năm, sư ưh kơ mơ̆t tơ pơlei âu ôh, Kră Yang khan.

³⁵ Inh gô dŏng tơgŭm pơlei tih âu păng dŏng pơklaih sư, yua kơ Inh khan boih păng yua kơ Inh pơkă boih hăm Đawit đĭch đam Inh.

³⁶ Kơplah noh, linh jang 'lơ̆ng đơ̆ng Kră Yang năm mơ̆t tơ lăm kơđông lu linh Asiri păng pơlôch minh-hrĕng tơhngam-jĭt pơđăm-rơbâu 'nu, pơgê hrôih năr đơ̆ng rŏng đe hơđơ̆r iung 'bôh bơngai lôch hnơ̆k hnăk.

³⁷ Thoi noh Senakêrip pơtao Asiri wih brŏk oei tơ pơlei Niniwe.

³⁸ Minh năr noh sư oei kơkuh lăm hnam yang sư Nisrŏk, na kon drŏ-nglo sư Adrammelek păng Sarêsar iŏk đao 'bet pơlôch sư, đang kơ noh bre sư kơdâu ôn tơ dêh Ararat, kon drŏ-nglo sư Êsarhađôn pơgơ̆r tơplih sư.