Êsai 33 - Sơ̆p Hlabơar Nơ̆r 'Bok Kei-Dei

Kră Yang gô dŏng pơklaih

¹ Răm-'băm dêh kơ ih, ơ bơngai pơrăm đe, đe ưh tam mă đei pơrăm ih, ơ bơngai blơ̆ blĕch đe, đe ưh tam đei blơ̆ ih! Kơplah mă ih pơdơh pơrăm đe, đe gô pơrăm ih dơ̆ng. Kơplah ih ưh pă blơ̆ blĕch đe gô blơ̆ ih.

² Ơ Kră Yang mơnat bĕ kơ lu nhôn! Lu nhôn oei chang gô Ih, Apinh ih ăn kơ nhôn đei jơhngơ̆m pran rim năr rim pơgê, apinh Ih dŏng pơklaih lu nhôn đơ̆ng lăm tơdrong pơmat-tat!

³ Kơtơ̆ng re jơwa nơ̆r Ih thoi grơ̆m, lu kon pơlei kơdâu ôn đĭ; mưh Ih iung blah lu teh đak tơklah tơklang.

⁴ Mŭk tơmam lu iĕm đe gô pơdŭ iŏk nhen thoi lep 'ba, pơdŭ sa, đe gô bruh iŏk tơmam iĕm thoi lu lep 'ba bruh sa.

⁵ Kră Yang đei pơyom hloh, yua kơ Sư oei tơ anih kơpal ti, Sư pơm ăn kơ Siôn 'bĕnh blai kơ tơdrong 'lơ̆ng tơpăt păng trŏ hơnơ̆ng.

⁶ Sư bơih gô pơm kơjăp lăm chăl lu iĕm, Sư boih tơdrong dŏng pơklaih, tơdrong hlôh wao, tơdrong gơh hơgei 'bĕnh blai, tơdrong hli yom kơ Kră Yang jơ̆ tơmam gĭt iĕm.

⁷ 'Nâu lu bơngai pran kơtang oei krao ôr tơ rok trong, lu bơngai đe wơh chă tơdrong hiôk-hian nhơ̆m ơh ol.

⁸ Trong glung kơkot rơhiăng, ưh pă đei bơngai bu brŏk năm dơ̆ng. Tơdrong pơgơ̆p đĭ pă đei, pơlei tih đe pơjăm pơjuă bơih, kon bơngai đe ưh pơyom kơ bu bơih.

⁹ Teh đak nhơ̆m hmoi ơh sơ'ngon đĭ jing juơ. Liban kơdơ̆ mơlâu păng jô hŏnh, dêh char Sarôn nhen thoi char glă Araba, dêh char Basan păng kông Karmel hla sư hơlŭng ruh đĭ.

¹⁰ Kră Yang khan: “Dang ei Inh gô iung, dang ei Inh gô pôk hơtŏk, dang ei Inh gô đei tơdrong ư-ang.

¹¹ Lu iĕm gô đei anăp hơkam 'ba, gô tơpŭ lĕch hơnong, hơyuh dui jơhngơ̆m lu iĕm jing ŭnh soh iĕm kơdih.

¹² Lu kon pơlei gô nhen thoi chŭr tơmo ŭnh sa, nhen jơla đe chong soh lăm ŭnh.”

¹³ Ơ lu bơngai oei tơ ataih mơ̆ng bĕ, tơdrong Inh pơm bơih; păng lu iĕm bơngai mă ei jê̆, hlôh băt bĕ kơ tơdrong mơsêh Inh.

¹⁴ Lu bơngai pơm yoch lăm pơlei Siôn hli tơrơ, bơngai ưh chu kiơ̆ kơ Kră Yang hli tơtơ̆ đĭ bơih. “Bu lăm lu bơ̆n gơh oei lăm ŭnh kơdơ̆r? Bu lăm lu bơ̆n gơh oei lăm pla ŭnh sa khơ̆ng ling-lang?”

¹⁵ Lu bơngai arih kiơ̆ trong 'lơ̆ng tơpăt, pơma tơpăt, areh kơ tơdrong pơjuă sa tơmam đe. Hơpuih ti sư ưh kơ chro iŏk tơmam kơnê̆ đe apah, đon sư ưh kơ wă mơ̆ng tơdrong pơlôch băl, măt sư ưh kơ wă lăng tơdrong kơnê̆.

¹⁶ Bơngai noh sư gô oei tơ lăm anih kơjung Sư gô kơ'nơp tơ lăm kông tơmo kơjăp tơmam sa sư rơkah rơkai, đak nhă sư mah ling-lang.

¹⁷ Măt ih gô 'bôh pơtao lăm tơdrong 'lơ̆ng rŏ sư păng ih gô lăng 'bôh teh đak pơih rai să.

¹⁸ Jơhngơ̆m ih gô tơchĕng kơ tơdrong hli krưp dêh: “Lu đe chă dăr oei tơ yơ bơih? Lu bơngai iŏk tơmam thuê̆ tơ yơ bơih? Lu bơngai chă jô̆ hnam gak tơ yơ bơih?”

¹⁹ Lu iĕm ưh pă 'bôh dơ̆ng lu kon pơlei pơang tơdrong kơnê̆, noh jơ̆ lu bơngai pơma nơ̆r sôm mơrôm anat kơ hlôh, lu kon pơlei pơma nơ̆r tơmoi ih mơ̆ng ưh kơ hlôh ôh.

²⁰ Lăng bĕ tơ Siôn jơ̆ pơlei tih lu bơ̆n pơm giĕng tih. Măt ih gô 'bôh pơlei Jêrusalem, jơ̆ anih hiôk hơđơ̆ng, jơ̆ anih oei ưh kơ đei layơ pôk tơplih tơ nai dơ̆ng, lu 'long pơ̆ng, ưh kơ đei layơ toh lê̆ ôh, kư̆m ưh kơ đei tơlei minh dăng ayơ kơtĕch mơ̆n!

²¹ Tơ noh Kră Yang mơsêh gô oei hơdai bơ̆n lăm tơdrong 'lơ̆ng rŏ Sư, đei Krong să tơ noh thŏng-nan ayăt ưh kơ gơh năm, kư̆m ưh kơ đei duk tih ayăt gơh chă năm brih găn mơ̆n.

²² Tơpă, Kră Yang bơih Tơ'ngla sek tơlang lu bơ̆n, Kră Yang Tơ'ngla pơjing ăn kơ lu bơ̆n khôi juăt, Sư bơih Kră Yang pơtao lu bơ̆n, sư bơih Tơ'ngla dŏng pơklaih lu bơ̆n!

²³ Tơlei lu ayăt chô̆ lu iĕm tơlang lê̆ bơih, ưh pă chô̆ tơ jrăng păng ưh pă dăng che duk noh dơ̆ng. Kơplah noh đe gô klah asong băl lơ lu tơmam đêl blah tơgar iŏk, mă lu bơngai jopo kư̆m gô đei iŏk tơmam đêl blah tơgar noh mơ̆n.

²⁴ Kon pơlei pơla gô ưh pă đei pơma bơih khan: “Inh jĭ bơlŏ” Lu kon pơlei oei tơ noh gô đei tơdrong mơnat ăn kơ tơdrong yoch lu sư.