Êsai 31 - Sơ̆p Hlabơar Nơ̆r 'Bok Kei-DeiRăm tơpă bu gơnang kơ Êyiptơ 1 Răm-'băm dêh kơ lu đe năm jur tơ Êyiptơ wă chă apinh tơdrong dŏng tơgŭm, gơnang kơ lu aseh, lu gre aseh, yua kơ lu sư lơ; gơnang kơ lu linh hao gre aseh yua kơ lu sư pran, Mă-lei ưh pă lăng gơnang kơ Tơ'ngla 'Lơ̆ng Rơgoh đe Isơrael, păng ưh kơ chă Kră Yang dŏng Tơgŭm. 2 Mă-lei Kră Yang gơh hơgei! Sư bơih Tơ'ngla ăn tơdrong pơrăm truh. Kră Yang nơ̆r Sư pơma ưh kơ tơplih. Sư gô iung blah lu adrĕch adrung bơngai pơm kơnê̆, păng blah lu bơngai tơgŭm lu bơngai pơm kơnê̆. 3 Lu bơngai Êyiptơ jơ̆ kon bơngai hmă đĕch, ưh kơ trŏ kơ Kră Yang 'Bok Kei-Dei ôh, lu aseh sư jơ̆ sĕch akar đĕch, ưh kơ trŏ kơ yang ôh, mưh Kră Yang yơ̆r ti Sư wă pơm, bơngai tơgŭm đe gô kơtơih, bơngai mă đe tơgŭm gô pơ̆k, 'bar 'nu măr sư gô lôch hiong hơdai. 4 Kră Yang đei khan bơih kơ inh thoi âu: “Nhen thoi dăm-brang grĕnh, dah nhen thoi dăm-brang mơlôh arum chă rôp tơmam sa, mă đơ̆ng lu bơngai wei triu minh khŭl lơ ră wă blah sư, sư ưh kơ tơrơ ôh kơ 'bơ̆r lu bơngai wei triu ôr tơkĕch, sư kư̆m ưh kơ hli kơ jơwa jreo lu đe noh, kư̆m thoi noh mơ̆n, Kră Yang Tih Hloh, gô jur wă tơblah tơ kơpal Kông Siôn păng tơ kơpal lu groi. 5 Nhen thoi sem păr tơ kơpal bơwei kon sư thoi yơ, kư̆m lei-lăi thoi noh mơ̆n Kră Yang Tih Hloh gô bơwei Jêrusalem, Sư gô wei-lăng păng dŏng pơklaih, Sư gô găn lê̆ păng pơklaih lu sư.” 6 Ơ kon pơlei pơla Isơrael, wơ̆t brŏk bĕ tơ Tơ'ngla mă đêl iĕm pơm kơnê̆ plơ̆ Sư lơ dêh. 7 Lăm năr ei kơnh, mă bu bu kư̆m klơ̆m tŭk lê̆ rup yang lu sư man hăm hu, hăm maih, jơ̆ tơmam đêl ti lu iĕm pơm kơdih noh boih mă lu iĕm băt iĕm pơm noh yoch. 8 “Asiri gô pơ̆k răm kơ đao gưm, ưh kơ trŏ kơ đao kon bơngai ôh kư̆m ưh kơ đao gưm đơ̆ng bơngai bu wă pơlôch sư. Lu sư gô kơdâu ôn đơ̆ng đao gưm noh păng lu kon tơdăm lu sư gô jing đĭch jang pơmat. 9 Tơmo mă sư gơnang gô hiong đĭ, yua kơ tơdrong hli tơrơ, lu yŏng linh gô hli tơrơ, kơdâu achăng tŭk lăp lu sư 'bôh.” Tơ'ngla Kră Yang thoi ŭnh tơ kông Siôn, ŭnh bơmur tơ Jêrusalem. Kră Yang khan thoi noh. |
©Bahnar Bible Association. All rights reserved.