Êsai 30 - Sơ̆p Hlabơar Nơ̆r 'Bok Kei-Dei

Răm-'băm kơ dêh char Juđa

¹ Kră Yang khan: “Răm-'băm dêh kơ lu kon hơ'lơ̆p arăng kơ̆l 'maih chă đon mă ưh kơ trŏ tơdrong Inh wă, pơm tơdrong pơgơ̆p mă ưh kơ đơ̆ng Yang bơhngol 'lơ̆ng Inh, thim tơdrong yoch rai dêh dơ̆ng.

² Lu sư ưh tam mă apinh Inh, mă đĭ jur năm bơih tơ dêh char Êyiptơ, wă gơnang kơ Pharaôn bơwei dŏng lu sư, păng kơ'nơp lăm yơ̆p Êyiptơ!

³ Thoi noh tơdrong Pharaôn dŏng bơwei gô pơm kơ lu iĕm mơlâu, anih ôn kơ'nơp lăm yơ̆p Êyiptơ gô jing tơdrong đe pơjăm lu iĕm.

⁴ Mă khan lu bơngai pơgơ̆r sư truh bơih tơ pơlei Sôan, lu bơngai tơplih măt char lu sư truh tơ pơlei Hanês.

⁵ Đĭ-đăng lu sư gô mơlâu yua kơ minh adrĕch adrung, ưh kơ đei yua kiơ kơ lu sư, ưh kơ đei tơgŭm kư̆m ưh kơ đei lơi yua mă-lei pơm kơ lu sư mơlâu păng đe pơjăm.

⁶ Nơ̆r khan lê̆ adrol gah lu sem bri brah tơ Negeu. Lăm dêh anat anot pơmat-tat, dêh char lu dăm-brang tơno, dăm-brang akăn, 'bih bôm, 'bih ŭnh păr. Lu sư chơ mŭk tơmam lu sư tơ kơpal aseh iĕ, chơ tơmam gĭt tơ kơdŭ aseh lăk-đa, wă ăn tơ minh adrĕch adrung mă ưh kơ đei yua kiơ kơ lu sư.

⁷ Tơdrong lu bơngai Êyiptơ tơgŭm jơ̆ tơdrong ưh kơ yua, na Inh anăn sư Rahap, wă khan bơngai oei minh 'bôt ưh kơ pơm kiơ.

⁸ Năm bĕ dang ei chih ăn kơ lu sư nơ̆r âu tơ gơ'bang, chih tơmơ̆t nơ̆r noh tơ lăm sơnôm hla bơar, wă roi tơbăt kơ chăl đơ̆ng rŏng ling-lang hlŏng hloi.

⁹ Adrĕch adrung âu jơ̆ adrĕch adrung blơ̆ blĕch, kon hơlĕnh, kon adrĕch ưh kơ wă mơ̆ng nơ̆r Kră Yang bơtho khan.

¹⁰ Lu sư khan kơ lu bơngai đei tơdrong tơ'bôh: “'Nĕ pă 'bôh;” khan kơ lu bơngai khan lê̆ adrol: “'Nĕ pă khan lê̆ adrol kơ lu nhôn gah tơdrong sĭt. Pơma roi bĕ kơ lu nhôn tơdrong nhôn lăp đon chơt, roi bĕ kơ lu nhôn tơdrong 'bôh ưh kơ đei tơpă.

¹¹ Weh bĕ trong nai, tơklah bĕ đơ̆ng trong noh lê̆ pă roi gah Tơ'ngla 'Lơ̆ng Rơgoh đe Isơrael, weh bĕ đơ̆ng muh măt lu nhôn.”

¹² Thoi noh na Tơ'ngla 'Lơ̆ng Rơgoh đe Isơrael pơma khan: “Yua kơ lu iĕm sơngah achăng lê̆ nơ̆r âu, gơnang kơ tơdrong pơjuă pơđep, gơnang kơ tơdrong đŏng đĕo.

¹³ Na tơdrong yoch lu iĕm nhen thoi dur kơjung đĭ hơđang pơchah wă jê̆ păk păng gô hơlih răm hĕch hoch, ưh kơ tam băt.

¹⁴ Sư gô pơchah hĕch nhen thoi bô̆i teh ưh pă 'mêm, lu kơcheh sư pơchah mah pă gơh dônh, yua wă tŏng ngar ŭnh đơ̆ng tơnuh, dah mă chhŏng iŏk đak đơ̆ng sơlŭng.”

¹⁵ 'Nâu Kră Yang, Tơ'ngla 'Lơ̆ng Rơgoh đe Isơrael khan: “Lu iĕm gơh klaih đơ̆ng lu iĕm wơ̆t brŏk dơ̆ng păng pơdơh lăm Inh. Lu iĕm gô đei jơhngơ̆m pran, yua kơ lu iĕm oei hơđơ̆ng păng gơnang kơ Inh. Mă-lei lu iĕm ưh kơ wă kơ thoi noh.

¹⁶ Lu iĕm khan: ‘Ưh, lu nhôn gô hao aseh chă kơdâu klĕnh’ trŏ bơih na lu iĕm gô kơdâu klĕnh. ‘Lu iĕm khan lu nhôn hao aseh kơdâu hrĕnh,’ na lu bơngai druh iĕm kư̆m gô kơdâu hrĕnh mơ̆n!

¹⁷ Minh-rơbâu 'nu bơngai kơdâu ôn Minh 'nu bơngai ayăt tơhli, pơđăm 'nu bơngai ayăt tơhli đĭ dang lu iĕm kơdâu ôn, Dĭng truh oei pă minh 'bar 'nu nhen thoi minh pôm jrăng kơ kơpal kơ̆l kông, nhen thoi hla-kơ hơtol kơpal groi.

¹⁸ Mă tơpă, Kră Yang oei gô wă pơm 'lơ̆ng kơ lu iĕm, Tơpă Sư gô 'mêm mơnat kơ lu iĕm. Kră Yang jơ̆ Kră Yang 'Bok Kei-Dei 'lơ̆ng tơpăt. Pŭn hiôk dêh kơ bơngai bu oei chang gô Sư!

¹⁹ Ơ kon pơlei pơla oei lăm Siôn, lu bơngai oei lăm pơlei Jêrusalem, lu iĕm huay pă nhơ̆m hmoi dơ̆ng bơih. Mưh iĕm krao, sĭt Sư gô mơnat. Mưh kơtơ̆ng lu iĕm krao, Sư gô tơl hloi.

²⁰ Mă đơ̆ng Kră Yang ăn kơ lu iĕm pơmat-tat păng ơh sơ'ngon thoi por sŏng đak nhă ră, mă-lei Tơ'ngla pơhrăm lu iĕm Sư ưh pă gơh ôn akâu sư hlơp bơih, măt lu iĕm gô 'bôh Tơ'ngla pơhrăm lu iĕm.

²¹ Mă lu iĕm weh gah 'ma dah gah 'ngiĕo, đon lu iĕm gô kơtơ̆ng nơ̆r pơma đơ̆ng rŏng lu iĕm khan: “Âu jơ̆ trong mă lu iĕm athei rok kiơ̆!”

²² Lu iĕm gô tŭk hŭt lê̆ rup iĕm traih lom hăm hu păng rup man bah hăm maih, na lu iĕm klơ̆m lê̆ sư tơ ataih thoi tơmam 'mê̆-'mach. Păng khan: “Lĕch bĕ đơ̆ng anih âu!”

²³ Kră Yang gô ăn 'mi jur tơ adrĕch iĕm rei tơ mir chŭn, tơmam sŏng sa 'lơ̆ng đei đơ̆ng mir chŭn păng mah rơkah rơkai, lăm năr noh sem dơrong iĕm gô sa 'nhĕt 'lơ̆p bluh đơ̆ng tơmăn glă.

²⁴ Rơmo păng aseh iĕ choh chŭn, gô sa hơnong 'ba 'lơ̆ng mă đơ̆ng đe sơ̆k tơraih hăm chơkrơ, gơ'bênh bơih.

²⁵ Truh kơ năr 'bet pơlôch băl tih, kơplah noh lu kơđông tih kơjăp pơchah, tơ rim kông kơjung rim groi gô đei lu glung đak ro.

²⁶ Măt khei gô hơdah rang nhen hơdah măt 'năr păng tơdrong hơdah măt 'năr gô hơdah hloh tơpơh wơ̆t, thoi tơdrong hơdah kơ tơpơh năr, lăm năr Kră Yang ming rơka jĭ kon pơlei Sư păng ming hơmet pơklaih đêl rơka Sư teh.

²⁷ To Anăn Kră Yang truh đơ̆ng ataih, tơdrong sư hil khơ̆ng thoi ŭnh 'nhui ŭnh bluh găm suek puăn pah, hơkŭng Sư 'bĕnh kơ tơdrong hil, hơpiĕt Sư thoi kơ ŭnh dơhlông sa.

²⁸ Hơyuh Sư dui jơhngơ̆m thoi glung lơ̆p blai truh tơ ako, Sư wă um pơliĕng rim teh đak hăm tơdrong pơrăm păng sư yua dam pơhơ̆p tơ kon pơlei păng ba lu sư năm trong jrok.

²⁹ Lu iĕm gô hơri thoi lăm măng iĕm pơm giĕng 'lơ̆ng rơgoh, jơhngơ̆m lu iĕm gô chơt hiôk thoi bơngai hlôm 'lal tŏk tơ kông Kră Yang, truh tơ Tơmo Tih đe Isơrael.

³⁰ Kră Yang gô pơm ăn kơ đe kơtơ̆ng jơwa nơ̆r rŏ krưp Sư, Sư gô tơ'bôh kơ đe kơkŏng ti Sư tơjur, lăm tơdrong Sư hil mĭl, thoi kơ ŭnh dơhlông sa, thoi kial hơbŭt, thoi 'mi prĕl.

³¹ Asiri gô kơtơ̆ng nơ̆r Kră Yang na hli tơtơ̆, Sư gô teh Asiri hăm sơnguĕt.

³² Rim wơ̆t mưh Kră Yang iŏk sơnguĕt wă teh lu sư, na đe gô kơtơ̆ng re hơgơ̆r iĕ, re brŏ. Kră Yang gô yơ̆r ti blah lu sư.

³³ Tôphêt đei hơmet lê̆ đơ̆ng sơ̆ bơih anih wă soh. Sĭt tơpă đei hơmet bơih ăn kơ pơtao, Hơlŭng ŭnh jrŭ păng să, đei ŭnh păng 'long ŭnh lơ, hơyuh dui jơhngơ̆m Kră Yang thoi glung tơmo ŭnh sa khơ̆ng.