Êsai 3 - Sơ̆p Hlabơar Nơ̆r 'Bok Kei-Dei

Sek tơlang kơ char Juđa păng pơlei Jêrusalem

¹ Âu, Kră Yang Kră Yang Tih Hloh, gô iŏk lê̆ tơdrong dŏng păng tơgŭm dôm tơmam kăl yua đơ̆ng pơlei Jêrusalem păng char Juđa, thoi kơ tơmam sa mă lu sư gơnang păng đak mă lu sư hơmĕng.

² Sư gô iŏk lê̆ lu bơngai pran kơtang, lu linh, lu kră sek tơlang, lu 'bok khan lê̆ adrol, lu pơjâu, lu bơngai kră.

³ Lu yŏng pơgơ̆r pơđăm-jĭt 'nu linh, păng lu 'bok pơgơ̆r, lu 'bok gơh chă đon, lu bơngai gơh bơ̆jang hơgei păng lu pơjâu.

⁴ Inh gô ăn kơ lu nge pơm yŏng lu sư, lu hơ'lơ̆p gô pơgơ̆r lu sư.

⁵ Kon pơlei pơjuă pơđep băl tơduă, rim 'nu tơblah băl, tơduă rông 'bôt tơblah băl, lu hơ'lơ̆p pơrăm lu kră. Lu bơngai răm-'băm pơm plơ̆ kơ lu bơngai mă đe ư-ang.

⁶ Minh 'nu bơngai gô rôp pơkơ̆ng minh 'nu 'nhŏng oh sư tơ lăm hnam 'bă sư na khan: “Ih đei ao tai, ih pơgơ̆r lu nhôn! Păng tơdrong răm rai 'nâu ih bơih pơgơ̆r.”

⁷ Mă-lei lăm năr noh, bơngai noh gô ôr khan, “inh ưh kơ trŏ bơngai gơh pơklaih ôh, lăm hnam inh ưh kơ đei tơmam sa, kư̆m ưh kơ đei ao tai, 'nĕ rôp inh pơm yŏng pơgơ̆r kon pơlei.”

⁸ Pơlei Jêrusalem đĭ grê păng char Juđa đĭ hơlih; yua kơ nơ̆r pơma păng tơdrong jang lu sư blah Kră Yang, che bơle pơjăm 'bơ̆t anăp Kră Yang trŏ kơ ư-ang.

⁹ Muh măt lu sư tơ'bôh pơdah blah plơ̆ kơdih akâu lu sư; lu sư pơdah tơdrong yoch lu sư kơdih thoi pơlei Sôđôm, ưh kơ gơh ôn hlơp ôh, Răm-'băm dêh kơ bơhngol lu sư, yua kơ lu sư ba tơdrong răm kơdih akâu.

¹⁰ Khan bĕ kơ lu bơngai 'lơ̆ng tơpăt. Pŭn hiôk kơ lu sư; yua kơ lu sư gô đei sa plei đơ̆ng lu sư jang kơdih.

¹¹ Răm-'băm dêh kơ lu bơngai pơm kơnê̆, sư gô đei tơdrong pơmat-tat! Lu sư gô pŭ iŏk đêl ti lu sư pơm!

¹² Kon pơlei pơla Inh, lu đe hơ'lơ̆p gô pơjuă pơđep lu sư. Drŏ-kăn gô pơgơ̆r lu sư. Ơ kon pơlei Inh! Lu bơngai pơgơ̆r chông iĕm jrok trong, pơm kơ iĕm wơ̆l kơ trong.

¹³ Kră Yang iung pơma, Sư iung dơ̆ng sek tơlang kon pơlei.

¹⁴ Kră Yang sek tơlang lu bơngai kră păng lu kră pơgơ̆r kon pơlei Sư khan: “Lu iĕm luăn sa bơih pơgar hơmu. Tơtông iŏk tơmam lu bơngai dơnuh oei tơ lăm hnam lu iĕm.

¹⁵ Lu iĕm tơchĕng liơ pơjuă pơđep kon pơlei Inh, juă gơhlơ̆r muh măt lu bơngai dơnuh hin?” Kră Yang Tih Hloh khan thoi noh.

¹⁶ Kră Yang khan: “Lu kon drŏ-kăn Siôn pơrŏ yak toh hơko, măt lu sư lăng cheng hơ'nhưp wă kơ đe hưch, lu sư yak nơnăm mơtuĭ mơtuă, mơgriu re kong jơ̆ng.

¹⁷ Na Kră Yang gô pơm kơ kon drŏ-kăn Siôn jĭ tơ'boch 'bĕnh kơpal kơ̆l lu sư, păng pơm kơ kơ̆l lu sư hok sŏk ưh kơ chăt.”

¹⁸ Lăm năr noh Kră Yang gô iŏk lê̆ lu tơmam lu sư pơguăng păng kong kiơng kong jơ̆ng, tơsi chơkep sŏk, che kơ̆t kơ̆l,

¹⁹ maih đoh, kong maih 'bot tơ ti che klơ̆p kơ̆l.

²⁰ Môk pơkao, rơbưn glang iĕ 'bot plei kĕnh, che trăk hơngiĕng, get đak pơgang 'bâu phu, pơgang rơhưch.

²¹ Tơkhiĕn 'bot, gŏp muh.

²² Hơbĕn ao năr giĕng sŏng sa tih, ao lăm, ao tai 'nguaih, kơdŭng iĕ.

²³ Kơmĭl lăng, ao, che klơ̆p kơ̆l păng che gom muh măt.

²⁴ Đak 'bâu ôm tơplih kơ đak pơgang 'bâu phu, tơlei kơnŭi pơm tơlei tơ̆n: Kơ̆l sŏk tơtuh tơplih kơ đei sŏk jing; bơnal 'bi pơ̆n akâu tơplih kơ ao tai brai se, tơdrong mơlâu tơplih tơdrong 'lơ̆ng.

²⁵ Lu bơngai tơdăm ih gô pơ̆k kơ đao gưm, lu bơngai nuih kơtang ih gô lôch lăm tơdrong tơblah.

²⁶ Lu 'măng jang pơlei gô nhơ̆m hmoi, ơh sơ'ngon; thoi bơngai hơ-oei kơpal teh răm rai.