Êsai 29 - Sơ̆p Hlabơar Nơ̆r 'Bok Kei-Dei

Wă pơm kơ pơlei Jêrusalem

¹ Răm-'băm dêh kơ pơlei Ariêl, pơlei Ariêl jơ̆ pơlei Đawit pơm anih sư oei, sơnăm âu truh kơ sơnăm nai thim dơ̆ng. Ăn kơ tơdrong iĕm akŭm tih đei dăr wơwĭr hơnơ̆ng.

² Inh gô pơm ăn kơ pơlei Ariêl pơmat-tat; gô đei nhơ̆m hmoi ơh sơ'ngon, hăm Inh pơlei Ariêl gô nhen thoi chơnang soi pơyơ̆r.

³ Inh gô pơm anih wang tăp dăr kơ ih, pơjing kơđông wang ih, pơm anih blah ih.

⁴ Inh gô tơjur lê̆ ih tơ ala, ih gô pơma đơ̆ng ala teh sŭng, nơ̆r ih pơma thơ-thâm lĕch đơ̆ng lăm 'mui teh, thoi nơ̆r hơtâu nơ̆r ih pơma klĕch đơ̆ng lăm teh re thoi nơ̆r pơma sôm mơrôm,

⁵ Mă-lei lu đe ayăt kơ ih lơlap nhen 'bruih 'mui teh rơpŭk, lu đe pơm kơnê̆ dêh gô nhen hơkam 'ba kial bơbơ̆t, tơdrong noh gô truh ngei ngei ưh kơ tam băt ôh.

⁶ Kră Yang Tih Hloh gô yua grơ̆m glaih, teh pơpơ̆, jơwa re, păng pla ŭnh soh phak lu sư.

⁷ Đĭ-đăng teh đak lơlap lơlang bơngai năm blah pơlei Ariêl, đĭ-đăng năm wang blah pơlei kơjăp sư pơm kơ sư ơh sơ'ngon nhen apo, nhen tơdrong tơ'bôh kơplah kơmăng.

⁸ Nhen thoi bơngai pơngot tep apo 'bôh sŏng sa, 'brĕng hơđơ̆r mă oei pơngot đĕch, nhen bơngai rơhing kơ đak tep apo nhă đak, 'brĕng iung mơn oei kro hơlŏng păng oei rơhing đĕch, đĭ-đăng adrĕch adrung kon bơngai rim kơ teh đak blah kông Siôn kư̆m thoi noh.

⁹ Kơdrăt bĕ, hli tơrơ bĕ, măt iĕm tol păng pă 'bôh! Suai bĕ, mă-lei ưh kơ suai đơ̆ng tơdrô hơmu, nơnăm we-wo 'ma 'ngiĕo ưh kơ sĭ đơ̆ng huch tơdrô 'lơ̆ng ôh.

¹⁰ Kră Yang đei pơm bơih kơ lu iĕm tep blêk, chĭt lê̆ măt lu iĕm, jơ̆ lu bơngai khan lê̆ adrol, Kră Yang gom kơ̆l lu iĕm bơngai mă đei tơdrong tơ'bôh.

¹¹ Noh jing tôm tơdrong tơ'bôh kơ iĕm 'nâu, nhen thoi nơ̆r pơma lăm sơ̆p hla bơar mă đe chĭt đơ̆p lê̆ bơih. Tơdah ăn kơ bơngai gơh đŏk na khan: “Apinh ih đŏk lăng hla bơar âu!” Na sư gô tơl tơwih: “Inh ưh kơ gơh kơ đŏk yua kơ sơ̆p hla bơar âu đe chĭt đơ̆p lê̆ bơih.”

¹² Dah mă ih ăn kơ bơngai ưh kơ gơh đŏk na khan: “Apinh ih đŏk sơ̆p hla bơar âu,” Na sư tơl khan: “Inh ưh kơ băt kơ đŏk.”

¹³ Kră Yang khan: Kon pơlei âu năm jê̆ Inh hăm 'bơ̆r lu sư đĕch; kơkuh kơ Inh hăm hơkŭng, mă-lei jơhngơ̆m lu sư ataih đơ̆ng Inh. Tơdrong lu sư hli yom kơ Inh jơ̆ kiơ̆ tơdrong tơtă kon bơngai đĕch păng đơ̆ng kon bơngai bơtho ăn.

¹⁴ Thoi noh Inh gô pơm tơdrong hlĭch chrơp kơ kon pơlei âu, đơ̆ng tơdrong hlĭch âu truh tơdrong hlĭch nai. Tơdrong hlôh băt lu bơngai hlôh băt ưh pă yua kiơ, tơdrong hơgei lu bơngai hơgei gô hiong tôch.

¹⁵ Răm dêh kơ lu bơngai ôn kơ Kră Yang tơdrong lu sư pơđâu, tơdrong jang lu sư pơm oei lăm măng mu păng lu sư khan: Bu 'bôh bơ̆n? Bu băt kơ bơ̆n?

¹⁶ Lu iĕm plơ̆ plĕch dêh, liơ iĕm lăng bơngai man, nhen thoi teh lơ̆n sư man? Tơmam sư man hăm gơh pơma kơ tơ'ngla man sư khan: Ih ưh kơ man inh ôh, dah khan kơ bơngai man. “Ih ưh kơ hlôh ôh.”

¹⁷ Hăm trŏ Pă 'biơ̆ kơ âu Liban gô jing chŭn mir teh mơ̆r 'lơ̆ng, păng chŭn teh mơ̆r 'lơ̆ng noh gô jing thoi bri brah?

¹⁸ Lăm năr noh lu bơngai klĭk gô kơtơ̆ng dôm nơ̆r đơ̆ng lăm sơ̆p hla bơar; măt lu bơngai tol đơ̆ng lăm măng mu gô lăng 'bôh.

¹⁹ Lu bơngai răm-'băm gô thim tơdrong chơt hiôk lăm Kră Yang, lu bơngai dơnuh hin gô 'nă hal lăm Tơ'ngla 'lơ̆ng rơgoh đe Isơrael.

²⁰ Lu bơngai pơm kơnê̆ gô lôch đĭ, lu bơngai che bơle pơjăm đe gô lôch hiong đĭ, lu bơngai răp pơm tơdrong kơnê̆ gô kăl tơpăk đĭ.

²¹ Lu bơngai chă yua 'bơ̆r pơma sơlam hơlĕnh pơm kơ đe yoch, chă pơma sơlam hơlĕnh kơ lu kră sek tơlang. Chă roi pơma sơlam hơlĕnh kơ lu bơngai 'lơ̆ng tơpăt mă ưh kơ đei yoch gô lôch đĭ.

²² Na Kră Yang, tơ'ngla huai iŏk Abraham đei pơma kơ adrĕch adrung Jakôp thoi âu: “Muh măt lu sư huay pă găm goi păng huay pă mơlâu dơ̆ng,

²³ Mưh lu sư 'bôh lu kon hơ'lơ̆p sư, jơ̆ tơdrong jang đơ̆ng ti Inh pơm kơ lu sư, lu sư gô pôk pơyom kơ anăn Inh 'lơ̆ng rơgoh băt pơyom kơ Tơ'ngla 'lơ̆ng tơpăt Jakôp, păng gô hli yom kơ Kră Yang 'Bok Kei-Dei đe Isơrael.

²⁴ Lu bơngai đei đon tơchĕng wơ̆l glăi gô jing gơh hlôh, păng lu bơngai juăt kơ tơtok sư gô pơhrăm iŏk tơdrong đe bơtho.”