Êsai 28 - Sơ̆p Hlabơar Nơ̆r 'Bok Kei-Dei

Khan lê̆ adrol wă pơm kơ Êphraim

¹ Răm-'băm dêh hơgăl pơkao lu bơngai suai tơdrô lăm dêh Êphraim pơang răm-'băm dêh kơ pơkao 'bônh kơ jô hŏnh; lu bơngai suai tơdrô ư-ang 'lơ̆ng rŏ pơlei noh oei tơ kơ̆l groi thŭng teh mơ̆r!

² 'Nâu, Kră Yang đei minh 'nu bơngai pran kơtang. Nhen thoi kial hơbŭt 'mi prĕl, nhen kial bah pơrăm, nhen đak tih blai kơ thong. Sư gô klơ̆m tơhuŏng lê̆ sư tơ teh.

³ Hơgăl pơkao pơang lu bơngai suai tơdrô lăm char Êphraim đe gô pơjuă tơ ala jơ̆ng.

⁴ Pơkao 'lơ̆ng 'bônh kơ jô hŏnh, Tơdrong ư-ang 'lơ̆ng rŏ sư oei tơ kơ̆l groi anih thŭng teh mơ̆r, kư̆m gô nhen thoi plei hơra đum adrol kơ bơyan phang, đe 'bôh plei sư, ti đe phĕ sa hloi.

⁵ Lăm năr noh kơnh Kră Yang Tih Hloh gô jing thoi hơgăl pơkao rang mơnhal, păng hơgăl pơkao 'lơ̆ng rŏ kơ lu kon pơlei Sư mă oei oei.

⁶ Sư bơih ăn kơ lu bơngai sek tơlang đei yŏng tơpăt păng ăn jơhngơ̆m nuih pran kơ lu bơngai wă blah tơweh lu ayăt đơ̆ng 'măng jang.

⁷ Mă-lei lu đe noh kư̆m wing măt yua kơ sik hơmu pơm. Nơnăm 'ma 'ngiĕo yua kơ suai kơ tơdrô 'lơ̆ng! 'Bok soi păng 'bok khan lê̆ adrol wing măt yua kơ suai kơ tơdrô 'lơ̆ng, tơdrô pơrăm đĭ đon tơchĕng lu sư, tơdrô pơm kơ lu sư yak năm we-wo 'ma 'ngiĕo oei mơngưt mơngat kơplah lu sư đei tơdrong tơ'bôh. Lu sư glăi lăm tơdrong sek tơlang.

⁸ Lu sư hăk 'bĕnh kơ gơ'bang sŏng sa, ưh kơ đei 'bơ̆t ayơ rơgoh!

⁹ “Na sư gô bơtho tơdrong gơh hơgei ăn kơ bu, sư gô tơblang kơ bu nơ̆r sư pơma? Hăm trŏ bơtho ăn kơ lu nge 'nao lê̆ mŏm, 'nao achăng đơ̆ng toh hă?

¹⁰ Lu sư khan: Pơm păng pơm bĕ, pơm păng pơm dơ̆ng, tơdrong juăt 'nâu tơdrong juăt noh. Tŏ sĕt tơ âu, tŏ sĕt tơ to!

¹¹ Tơpă Kră Yang gô yua 'bơ̆r lu bơngai 'nguaih pơma păng nơ̆r hlĭch pơma kơ lu kon pơlei pơla âu.

¹² Kră Yang pơma khan kơ lu sư: “'Nâu anih pơdơh, ăn bĕ kơ lu bơngai lap gleh pơdơh, 'nâu anih pơdơh hiôk-hian, mă-lei lu sư ưh kơ wă mơ̆ng.

¹³ Na nơ̆r Kră Yang pơma kơ lu sư: Pơm păng pơm bĕ, pơm păng pơm dơ̆ng, tơdrong juăt 'nâu tơdrong juăt noh Tŏ sĕt tơ âu, tŏ sĕt tơ to, wă lu sư yak truh pơ̆k hraih đang, păng jĭ rơka, 'leh hơđong păng đe rôp ba!

¹⁴ Na mơ̆ng bĕ nơ̆r Kră Yang khan. Ơ lu bơngai juăt kơ pơjăm đe, lu bơngai pơgơ̆r kon pơlei âu lăm pơlei Jêrusalem.

¹⁵ Lu iĕm pơma pơrŏ khan: “Lu nhôn pơgơ̆p bơih hăm tơdrong lôch, păng pơgơ̆p hăm dêh atâu, Tơdah tơdrong anat anot gô truh, ưh kơ 'bơm lu nhôn ôh. Lu nhôn yua tơdrong pơma hơlĕnh pơm anih nhôn kơ'nơp. Păng pơma bơkuĕch hơlĕnh wă kơdâu ôn.

¹⁶ Na Kră Yang khan thoi âu: “Inh dan tơ Siôn minh pôm tơmo tih, minh pôm tơmo đe pơlong lăng bơih, jơ̆ tơmo mum hnam gĭt kăl dêh, pơm hơnă jrăng kơjăp, bu lui gơnang jơhngơ̆m sư gô huay kơ hli ôh.

¹⁷ Inh gô iŏk tơdrong tơpăt hơnơ̆ng pơm tơlei pơtŏ, tơdrong 'lơ̆ng tơpăt pơm 'long hơgăt, 'mi prĕl gô pơrăm lê̆ anih pơma hơlĕnh lu iĕm ôn kơ'nơp, đak gô lơ̆p lê̆ iĕm lu sư wă kơdâu klĕnh.

¹⁸ Kơplah noh tơdrong pơgơ̆p lu iĕm hăm tơdrong lôch gô ưh pă đei, tơdrong lu iĕm pơgơ̆p hăm dêh atâu gô ưh pă đei, tơdah tơdrong anat anot truh 'bĕnh-'bang sư pơrăm lu iĕm, lu iĕm răm đĭ.

¹⁹ Rim wơ̆t tơdrong anat anot truh, sư gô rôp ba lu iĕm tơ nai, sư gô truh, rim pơgê hrôih, kơ'năr kư̆m thoi kơmăng. Lu iĕm gô hli tơrơ dêh dah hlôh băt kơ nơ̆r bơtho noh.

²⁰ Thoi giơng kơđeh dêh 'bĭch yon ưh kơmah, thoi khăn iĕ dêh su ưh kơtăp.

²¹ Kră Yang gô iung pơm thoi Sư pơm tơ kông Parêsim, Sư gô hil thoi tơ thŭng Gibeôn, wă pơm tơdrong jang Sư, jơ̆ tơdrong jang hơnat păng pơm tơdrong hlĭch chrơp.

²² Thoi noh, na iĕm 'nĕ pă pơjăm, kơnh hli kơ glang chô̆ iĕm gơhret rai kơjăp, inh kơtơ̆ng đơ̆ng Kră Yang Kră Yang Tih Hloh pơkă wă pơrăm đĭ dêh char 'nâu.

²³ Pơđêng đon, mơ̆ng nơ̆r inh bĕ, kơchăng, mơ̆ng nơ̆r inh bĕ!

²⁴ Bơngai choh chŭn, wă rei adrĕch 'ba hăm trŏ hrăn choh hơnơ̆ng hloi? Hăm trŏ choh pơjuă hĕch bơih na hrăn nŏng kơ 'bơ?

²⁵ Tơdah choh hơmet dơnă 'lơ̆ng bơih, hăm trŏ kơ sư săi adrĕch găr hla ngo tơ âu, na rei adrĕch ba rơngâu tơ to? Hăm trŏ kơ sư pơtăm 'ba mi kiơ̆ trong rơuơ păng pơtăm 'ba tơ'bâu tơ anih sư păng 'ba nai tơ lăm mir sư dah kiơ?

²⁶ Noh Kră Yang 'Bok Kei-Dei bơtho kơ sư păng pơhrăm ăn kơ sư pơm trŏ.

²⁷ Đe ưh kơ yua mut wă teh pơhĕch găr hla ngo, kư̆m ưh kơ yua tang-wang gre aseh pơjuă găr rơngâu noh. Mă-lei đe preh găr hla ngo noh hăm 'long, păng rơngâu hăm 'long mơ̆n.

²⁸ Đe peh 'ba mi pơm 'bĕng, 'ba mi noh đe rŏl mă-lei đe ưh kơ preh sư hơnơ̆ng ôh, mă đơ̆ng tang-wang gre aseh dah jơ̆ng aseh juă găr sư, mă-lei găr sư ưh kơ hĕch ôh.

²⁹ Tơdrong noh kư̆m lĕch đơ̆ng Kră Yang Tih Hloh, tơdrong tơchĕng Sư hlĭch chrơp dêh tơdrong gơh hơgei Sư 'lơ̆ng tih tơpă.