Êsai 23 - Sơ̆p Hlabơar Nơ̆r 'Bok Kei-Dei

Nơ̆r khan lê̆ adrol gah pơlei Tir

¹ Nơ̆r khan lê̆ adrol kơ pơlei Tir, ơ duk Tarsis nhơ̆m ơh bĕ, yua kơ pơlei Tir pơchah răm đĭ bơih, dĭng mah hnam oei, anih duk pơdơh kư̆m đĭ pă đei, Đơ̆ng dêh Kitim đe kơtơ̆ng nơ̆r roi 'nâu.

² Oei hreh bĕ kon pơlei oei tơter đak dơsĭ, ơ lu bơngai mơdro pơlei Siđôn anih mă lơ bơngai năm trong đak dơsĭ pơm kơ iĕm.

³ Mơdrŏng chơ phe 'ba đơ̆ng Sihôr, kĕch yuă đei đơ̆ng krong Nil, chơ rok trong đak dơsĭ tih, noh jơ̆ tơm đei lơi yua, sư noh bơih anih mơdro mơchan kơ rim teh đak.

⁴ Ơ Siđôn mơlâu bĕ! Yua kơ đak dơsĭ khan bơih anih kơjăp mă lu iĕm gơnang lăm đak dơsĭ đei pơma bơih: “Inh tam đei anăp kư̆m tam đei layơ tơpŭ; kư̆m tam đei rong kon tơdăm dah kon adruh.”

⁵ Kơplah tơdrong âu kơtơ̆ng truh tơ char Êyiptơ, đe gô ơh dêh yua kơ đei kơtơ̆ng tơdrong đe roi gah pơlei Tir.

⁶ Kơdâu năm tơ Tarsis bĕ, ơ kon pơlei oei jê̆ đak dơsĭ nhơ̆m hmoi bĕ!

⁷ Âu hăm trŏ kơ pơlei iĕm chơt hiôk ưh? Pơlei đei bơih đơ̆ng chăl Kră sơ̆, mă đêl jơ̆ng sư yak năm tơ anih ataih chă anih wă oei pơm pơlei jang sa.

⁸ Na bu pơkă tơdrong âu wă pơm kơ pơlei Tir, jơ̆ pơlei asong ăn bơih lu tơmam thoi môk pơtao, lu bơngai mơdro mơchan sư noh lu bơngai yŏng mơng thoi kon pơtao, lu tơ'ngla tĕch mơdro jơ̆ lu bơngai đe pơyom lăm teh đak.

⁹ Kră Yang Tih Hloh bơih pơkă pơm tơdrong âu, tơjur tơdrong pơang kơ đĭ-đăng tơdrong 'lơ̆ng rŏ păng pơm kơ lu bơngai đe pơyom lăm teh đak âu mơlâu.

¹⁰ Ơ kon pơlei Tarsis, năm bĕ jơ̆p kơ anih teh ih tih thoi kơ krong Nil! Ưh pă đei anih kơ duk ih bơih.

¹¹ Kră Yang yơ̆r ti sư kơpal đak dơsĭ, pơm kơ rim teh đak tơdrŏ, Sư pơm boih kơ Kanaan wă pơrăm lu kơđông kơjăp sư.

¹² Sư khan: “Ơ kon adruh 'nao iung pơlei Siđôn mă đe tơrôp bơih, ih ưh pă đei chơt hiôk dơ̆ng bơih, iung bĕ ih yak năm tơ dêh Kitim, tơ noh ih kư̆m ưh kơ đei pơdơh hiôk ôh!

¹³ Ih lăng dêh char lu bơngai Kalđê, ưh kơ đei kon pơlei noh dơ̆ng bơih, bơngai Asiri pơm kơ anih noh jing anih sem bri, sư pơm hnam thôt, wang tăp dăr, blah iŏk pơgoh, teng lê̆ anih hnam pơtao sư pơchah pơchek jing juơ.

¹⁴ Ơ lu duk Tarsis, nhơ̆m ơh bĕ! Kơđông lu iĕm pơchah răm đĭ bơih.

¹⁵ Kơplah noh kơnh pơlei Tir đe gô hiơt kơ sư lăm tơpơh-jĭt sơnăm, dang minh chăl arih pơtao. Klaih hlôi kơ tơpơh-jĭt sơnăm bơih, pơlei Tir gô nhen thoi 'bai bơngai drŏ-kăn đi hơri.

¹⁶ “Ơ drŏ-kăn đi mă đe hiơt bơih, chĕp bĕ brŏ ih, chă juang jơ̆p lăm pơlei reh mă hiôk, hơri bĕ mă lơ, wă kơ đe 'blŏk dơ̆ng kơ ih.”

¹⁷ Kơtĕch tơpơh-jĭt sơnăm bơih, Kră Yang gô năm tơmang pơlei Tir, pơlei sư gô pơm thoi đêl dơ̆ng, sư gô mơdro mơchan hăm rim dêh char lăm teh đak âu.

¹⁸ Mă-lei mŭk tơmam sư đei lơi yua noh gô klah 'măn kơ Kră Yang, sư ưh kơ đei mong dah tah 'măn ôn lê̆ ôh, yua kơ tơmam đei lơi noh gô yua lăm tơmam sa, ao hrŭk 'lơ̆ng kơ lu bơngai oei 'bơ̆t anăp Kră Yang.