Êsai 20 - Sơ̆p Hlabơar Nơ̆r 'Bok Kei-Dei

Nơ̆r Khan lê̆ adrol wă pơm kơ dêh char Êyiptơ păng Kus

¹ Lăm sơnăm Sargôn pơtao dêh Asiri wơh Tartan năm tơ pơlei Asdôt, blah păng iŏk pơlei noh.

² Kơplah noh Kră Yang, khan kơ Êsai kon drŏ-nglo Amôt: “Năm bĕ, plôh lê̆ ao 'bi ih păng plôh lê̆ chơkhŏ đơ̆ng jơ̆ng ih.” Êsai pơm kiơ̆ nơ̆r noh, năm akâu hoh păng yak jơ̆ng hoh.

³ Kră Yang khan: “Thoi đĭch đam Inh Êsai năm akâu hoh păng yak jơ̆ng hoh lăm pêng sơnăm wă pơm tơdra tơ'bôh wă blah teh đak Êyiptơ păng Kus.

⁴ Kŭm thoi noh mơ̆n pơtao Asiri gô chông ba kon pơlei Êyiptơ păng Kus pơm bơnă đơ̆ng hơ'lơ̆p truh tơ kră năm akâu hoh păng yak jơ̆ng hoh pơdah pơtâu hoh thoi noh wă kơ teh đak Êyiptơ mơlâu.

⁵ Kơplah noh lu bơngai gơnang kơ teh đak Kus păng hơmĕng kơ teh đak Êyiptơ gô hli păng mơlâu.

⁶ Lăm năr noh lu bơngai oei jê̆ đak dơsĭ gô khan to, lu adrĕch adrung mă bơ̆n gơnang păng kơdâu tơkan wă kơ gơh dŏng pơklaih đơ̆ng pơtao dêh Asiri, na lu sư đĭ jing thoi noh bơih! Lei liơ bơ̆n gơh klaih?