Êsai 2 - Sơ̆p Hlabơar Nơ̆r 'Bok Kei-Dei

Kông Kră Yang

¹ 'Nâu Êsai kon 'bok Amôt, đei 'bôh gah dêh char Juđa păng Pơlei Jêrusalem.

² Gô đei tơdrong truh lăm lu năr hơtuch kơnh: Kông hnam Kră Yang gô oei kơjăp tơ kơpal lu kơ̆l kông, kơjung hloh kơ đĭ-đăng lu groi. Păng rim kơ teh đak gô luh leng năm tơ noh.

³ Đei lơ khŭl bơngai gô truh tơ noh na khan: “Năm, bĕ lu bơ̆n tŏk tơ kông Kră Yang, tơ hnam Kră Yang 'Bok Kei-Dei Jakôp. Sư gô bơtho bơ̆n trong Sư wă kơ lu bơ̆n yak kiơ̆ trong sư.” Khôi juăt gô đei đơ̆ng pơlei Siôn, nơ̆r Kră Yang gô đei đơ̆ng pơlei Jêrusalem.

⁴ Kră Yang gô sek tơlang sơlam tŏk-bŏk kơ đĭ-đăng teh đak păng sek ăn kơ lơ adrĕch adrung bơngai, lu sư gô iŏk đao hơjơ̆m pơm pla 'nhik iŏk tơju hơlă lu sư pơm săng kô. Teh đak âu ưh pă đei tơblah păng teh đak to dơ̆ng bơih, ưh pă đei pơhrăm wă tơblah dơ̆ng.

⁵ Ơ adrĕch Jakôp, bĕ lu bơ̆n yak kiơ̆ lăm tơdrong hơdah Kră Yang.

⁶ Tơpă, Kră Yang đĭ achăng tŭk kon pơlei Kră Yang noh adrĕch Jakôp, yua kơ lu sư kiơ̆ tơdrong juăt teh đak gah hơlĕch, păng pơm pơjâu thoi lu bơngai Philistin, lu sư pơgơ̆p hăm lu bơngai tơmoi.

⁷ Dêh char lu sư đei hu maih, păng mŭk tơmam gĭt ưh pă băt dôm yơ, dêh noh đei aseh lơ păng đei gre aseh lơ pă gơh jô̆.

⁸ Dêh noh 'bĕnh-'bang kơ rup yang; lu sư kơkuh kơ rup yang đêl tơpang ti lu sư pơm kơdih. Đơ̆ng hơnglâu ti lu sư pơm.

⁹ Bơngai hmă gô mơlâu, bơngai mơng đe gô tơjur apinh Kră Yang 'nĕ kơ mơnat!

¹⁰ Iĕm mơ̆t bĕ lăm hơgơp tơmo, ôn bĕ akâu iĕm lăm teh, wă weh đơ̆ng anăp tơdrong đei krưp Kră Yang păng tơdrong ư-ang mơsêh mơyang Sư.

¹¹ Măt kon bơngai 'maih lăng pơrŏ gô mơlâu, tơdrong pơang kon bơngai gô tơhuŏng lê̆ tơ ala, lăm năr 'noh lăp minh 'nu Kră Yang đĕch bơ̆n ư-ang.

¹² Đei minh năr Kră Yang Tih Hloh pơkă bơih, đei minh năr Sư gô pơm kơ bơngai pơang, păng lu bơngai pơrŏ akâu sư kơdih, đĭ-đăng lu sư Kră Yang gô tơhuŏng lê̆.

¹³ Kŭm gô pơm kơ lu tơm 'long hơngo Liban pơrŏ pơang păng 'long kôih Basan.

¹⁴ Kŭm gô pơm kơ lu kông kơjung kơ lu groi kơjung.

¹⁵ Gô pơm kơ lu hnam thôt kơjung păng dur pơlei kơjăp.

¹⁶ Gô pơm kơ lu duk đe Tarsis păng dôm lu duk 'lơ̆ng rŏ.

¹⁷ Lu bơngai pơang gô tơjur lê̆ tơ ala păng tơdrong kon bơngai pơrŏ kơdih akâu gô mơlâu, lăm năr 'noh kơnh pôm Kră Yang đĕch trŏ kơ bơ̆n ư-ang.

¹⁸ Lu rup yang gô hiong đĭ.

¹⁹ Đe gô kơdâu ôn tơ lăm hơgơp tơmo, lăm trôm teh wă kơ weh đơ̆ng anăp tơdrong hli krưp Kră Yang păng tơdrong mơsêh mơyang Sư, kơplah năr Kră Yang wă iung pơm kơ teh âu tơdrŏ pơpơ̆.

²⁰ Lăm 'năr 'nei kơnh đe gô klơ̆m ăn kơ kơne, klơ̆m ăn kơ hơmiĕt, lu rup yang păng maih, hu, mă đêl lu sư pơm wă kơkuh.

²¹ Sư gô mơ̆t ôn tơ lăm trôm tơmo păng hơgơp tơmo, wă kơ weh đơ̆ng anăp tơdrong hli krưp păng tơdrong mơsêh mơyang Kră Yang. Kơplah Sư iung pơm kơ teh tơdrŏ pơpơ̆.

²² 'Nĕ gơnang kơ kon bơngai; mă dui jơhngơ̆m hăm trôm muh, lu sư ưh kơ yua kiơ?