Êsai 19 - Sơ̆p Hlabơar Nơ̆r 'Bok Kei-Dei

Nơ̆r Khan lê̆ adrol gah dêh char Êyiptơ

¹ Nơ̆r khan lê̆ adrol gah dêh đe Êyiptơ. Kră Yang jur hăm hơmơ̆l tĕnh truh tơ dêh Êyiptơ, lu rup yang dêh char đe Êyiptơ tơtơ̆ đĭ 'bơ̆t anăp Sư, jơhngơ̆m đe Êyiptơ hiong hach đĭ.

² “Inh gô pơm kơ bơngai Êyiptơ tơblah băl tơduă bơngai Êyiptơ, 'nhŏng oh tơblah băl tơduă 'nhŏng oh, rông 'bôt tơblah băl tơduă rông 'bôt, pơlei tih tơblah băl tơduă pơlei tih, teh đak âu tơblah hăm teh đak noh.

³ Lu đe Êyiptơ gô rơdu, inh gô pơrăm lê̆ tơdrong tơdă lu sư hơmet wă pơm, lu sư gô krao chă lu rup yang, lu pơjâu, lu pơjâu pơma dơnuh hăm bơhngol bơngai lôch, lu pơjâu tơwir.

⁴ Inh gô jao kon pơlei Êyiptơ lăm ti lu yŏng pơgơ̆r kơnê̆ dêh păng ăn kơ minh 'nu pơtao chư̆ kơnê̆ gô pơgơ̆r lu sư. Kră Yang Tih Hloh khan thoi noh.

⁵ Đak dơsĭ gô hrơ̆, đak krong gô hrĕng kro.

⁶ Lu glung iĕ jing 'bâu ôm thong đak lăm char Êyiptơ gô hrơ̆ hrĕng kro. 'Nhĕt trang cheng krong lôch ôm đĭ.

⁷ 'Nhĕt chăt jih đak krong Nil, tơ tu krong păng chŭn ba lu sư cheng krong jô kro đĭ, kial bơbơ̆t pă đei kiơ dơ̆ng.

⁸ Lu bơngai chă ka gô tơtok, lu bơngai chă wah tơ krong Nil nhơ̆m ôr păng lu bơngai traih jal dăng hơnhuăl gô ơh klai đĭ.

⁹ Lu đe dui brai se păng lu đe tanh che kok gô ưh pă hơmĕng.

¹⁰ Lu pơm yŏng thoi jrăng tơm lăm dêh Êyiptơ đe gô pơrăm păng lu bơngai jang mưng gô jĭ lăm jơhngơ̆m.

¹¹ Lu kră pơlei Sôan ngăl kơtul, lu bơngai hơgei oei jang hăm Pharaôn lu sư chă đon kơhlôh kơwao, liơ iĕm gơh khan kơ Pharaôn khan: “Inh jơ̆ minh lăm lu bơngai hơgei, kon sâu lu đe pơtao adrol sơ̆?”

¹² Lu bơngai hơgei iĕm tơ yơ? Athei lu sư roi kơ ih băt Kră Yang Tih Hloh hơmet lê̆ bơih wă pơm kiơ kơ dêh Êyiptơ.

¹³ Lu kră pơlei Sôan kơtul ngăl, lu kră pơlei Nôp huŏng lăm tơdrong đe hơlĕnh, lu bơngai pơm kră lăm tơring đơ̆ng adrĕch pha pơm kơ đe Êyiptơ jrok trong.

¹⁴ Kră Yang tuh ăn tơdrong tơchĕng hơwơ̆l kơ bơngai Êyiptơ, lu sư gô wơ̆l jrok lăm tôm tơdrong jang, thoi bơngai suai hăk rah năm rah tơ 'ma tơ 'ngiĕo kơ hăk sư.

¹⁵ Đe pă đei gơh pơm kiơ lăm dêh Êyiptơ, mă khan kơ̆l dah kiĕng. Dơng gao dah gơlar.

¹⁶ Lăm năr noh kơnh, bơngai Êyiptơ gô nhen thoi bơngai drŏ-kăn, hli tơrơ kơ ti Kră Yang Tih Hloh wă pơrăm lu sư.

¹⁷ 'Bơ̆t ei kơnh teh đak Juđa jing minh tơdrong pơm ăn kơ Êyiptơ hli krưp mưh đe roi kơ Juđa rim 'nu hli ngăl, yua gah tơdrong tơdă Kră Yang Tih Hloh pơkă bơih wă pơm kơ char lu sư.

¹⁸ Lăm năr noh, tơ dêh Êyiptơ, đei pơđăm tŏ pơlei pơma nơ̆r Kanaan păng pơkăm pơkă hăm anăn Kră Yang Tih Hloh, lăm lu pơlei noh đei minh pôm pơlei đe krao pơlei pơlôch pơrăm.

¹⁹ Lăm năr noh gô đei minh pôm chơnang soi kơ Kră Yang tơ lăm dêh Êyiptơ. Păng đei minh pôm jrăng man 'blŏk kơ Kră Yang tơ jih hơdral teh đak noh.

²⁰ Noh jơ̆ tơdra kơnăl păng tơbăt kơ Kră Yang Tih Hloh tơ lăm dêh Êyiptơ, lu Sư gô krao chă Kră Yang, kơplah lu bơngai pơm kơnê̆ kơ lu sư, Kră Yang gô wơh minh 'nu 'bok dŏng pơklaih wă dŏng tơgŭm păng pơklaih lu sư.

²¹ Kră Yang gô ăn kơ bơngai Êyiptơ băt kơ Sư, lăm năr noh lu bơngai Êyiptơ gô băt kơkuh kơ Kră Yang, lu sư gô pơyơ̆r tơmam soi 'buh kơ Kră Yang, lu sư pơkă pơkăm hăm Kră Yang păng pơm keh tơdrong lu sư pơkă noh.

²² Kră Yang gô teh bơtho dêh char Êyiptơ đơ̆ng noh hơmet pơklaih lu sư dơ̆ng, lu sư gô wih tơ Kră Yang, Kră Yang gô mơ̆ng nơ̆r lu sư krao khan păng ming pơklaih ăn.

²³ Lăm năr noh kơnh gô đei minh pôm trong glung tih đơ̆ng dêh Êyiptơ truh tơ dêh Asiri, lu bơngai Asiri gô năm tơ dêh Êyiptơ, lu bơngai Êyiptơ gô năm tơ dêh Asiri, lu bơngai Êyiptơ păng bơngai Asiri wang hơdai kơkuh kơ Kră Yang.

²⁴ Lăm năr noh kơnh, dêh Isơrael gô pơgơ̆p hơdai hăm bơngai dêh Êyiptơ păng Asiri jing teh đak mă pêng. Pêng tŏ teh đak 'nâu pơm tơm tơdrong pŭn hiôk lăm teh đak.

²⁵ Pêng tŏ teh đak Kră Yang Tih Hloh sơkat ăn pŭn hiôk kơ lu sư, khan: “Pŭn hiôk kơ Êyiptơ kon pơlei Inh, Asiri tơdrong jang đơ̆ng ti Inh, Isơrael jơ̆ mŭk tơmam Inh.”