Êsai 17 - Sơ̆p Hlabơar Nơ̆r 'Bok Kei-Dei

Nơ̆r khan lê̆ adrol wă pơrăm pơlei Đamas

¹ Nơ̆r Khan lê̆ adrol kơ pơlei Đamas: “Mơ̆ng bĕ Pơlei Đamas, ưh pă jô̆ jing pơlei tih dơ̆ng, mă-lei gô jing tơmam pơchah rơ̆m rĕk.

² Lu pơlei Arôe đĭ jing juơ rơhiăng jing anih ăn kơ lu triu drum pơdơh, ưh pă đei hli kơ kiơ dơ̆ng.

³ Kơđông kơjăp Êphraim ưh pă đei dơ̆ng bơih, pơlei tih Đamas ưh pă đei tơdrong pơgơ̆r dơ̆ng, lu kon plei mă oei đei đơ̆ng dêh char Siri kư̆m gô lei-lăi nhen thoi tơdrong ư-ang lu đe Isơrael.” Kră Yang Tih Hloh khan thoi noh.

⁴ Lăm năr noh tơdrong ư-ang đe Jakôp hach hiong bơih, akâu akar bek gô jing hơkĕ hơkong.

⁵ Sư thoi bơngai yuă 'ba, akŭm pơpôi đêl sư yuă yua ti sư yuă iŏk hơie 'ba kư̆m thoi đe chă dônh 'ba hơlŭng lăm thŭng Rêphaim.

⁶ Mă-lei kư̆m oei đei 'ba hiơt tơ noh. Thoi kơ đe gơgŭ tơm plei 'long ôliwơ, plei sư kư̆m oei đei 'bar pêng tŏ tơ kơnhŏng wĕch ti, dah mă kư̆m oei puăn pơđăm tŏ plei tơ dơng sư. Kră Yang đe Isơrael khan.

⁷ Lăm năr noh, kon bơngai gô tơchĕng 'blŏk gơnang kơ Tơ'ngla mă Pơjing sư, păng măt lu sư wơ̆t lăng tơ Kră Yang 'Lơ̆ng Rơgoh đe Isơrael.

⁸ Lu sư gô ưh pă lăng tơ chơnang soi mă đêl ti lu sư pơm, păng kư̆m ưh pă lăng dơ̆ng ti lu sư pơjing kơdih, mă rup yang Arsêrim, păng chơnang soi lu sư soh 'long 'bâu phu.

⁹ Lăm năr noh lu pơlei tih kơjăp Isơrael gô jing anih đe lê̆ juơ tơ lăm bri roh dah tơ kơpal kông, kư̆m thoi lu anih đĭ jing juơ 'bơ̆t anăp lu đe Isơrael. Đĭ-đăng jing anih juơ rơhiăng.

¹⁰ Ih hiơt bơih kơ Kră Yang 'Bok Kei-Dei Tơ'ngla dŏng pơklaih ih; ih ưh kơ 'blŏk bơih hơgơp tơmo Tih mă ih kơ'nơp. Mă đơ̆ng ih pơtăm 'long arih 'lơ̆ng, ih pơtăm adrĕch 'long hơmu plơ̆ng đơ̆ng nai.

¹¹ Mă khan ih pơtăm, ih wei jing 'lơ̆ng ră, kiơ̆ pơgê pơm kơ sư arih đei pơkao kiơ̆ pơgê. Mă-lei lăm năr pơmat-tat jĭ jăn ưh kơ gơh klaih mă đei phĕ plei ưh kơđei yua kiơ ôh!

¹² Ô lu kon pơlei dêh char lơlap, ôr krao thoi jơwa đak dơsĭ poh-yă, ô lu adrĕch adrung kon bơngai ôr krao thoi jơwa đak poh-yă tih!

¹³ Lu adrĕch adrung kon bơngai ôr krao jơwa sư năm tơblah dang đak poh-yă, mă-lei Kră Yang gô chrih hil kơ lu sư na lu sư gô kơdâu ataih, puh tơweh lê̆ lu sư thoi kial tơthu hơkam 'ba kơpal kông, thoi 'mui teh năr kial hơbŭt.

¹⁴ Kiơ̆ kơsơ̆ đei tơdrong hli tơrơ; adrol kơ pơgê hrôih truh ưh pă 'bôh lu sư dơ̆ng, 'nâu minh tơdrong tuh ăn kơ lu bơngai blah tơgar iŏk mŭk tơmam dêh char bơ̆n, noh jơ̆ tơdrong truh kơ lu bơngai tơtông tơgar tơmam đơ̆ng lu bơ̆n.