Êsai 16 - Sơ̆p Hlabơar Nơ̆r 'Bok Kei-Dei

¹ Ba ăn bĕ triu kon thuê̆ kơ bơngai pơgơ̆r teh đak 'nâu, đơ̆ng pơlei Sêla rok char glă, truh tơ kông kon pơlei Siôn.

² Lu drŏ-kăn Môap tơ tơnŏk đak krong Arnôn gô đông nhen thoi sem păr tơklah tơklang, păng nhen thoi hơnar sem đe yuih lê̆ tơpu.

³ “Ih chă đon bĕ, pơm bĕ tơdrong 'lơ̆ng tơpăt, kơplah 'năr dơ̆ng, pơm kơ yơ̆p ngôi ih nhen thoi kơmăng. Ôn bĕ lu bơngai oei klaih, 'nĕ pơdrâu lu bơngai chă kơdâu ôn!

⁴ Lê̆ lu bơngai Môap mă đe puh tơweh oei hơdai ih. Ăn kơ lu sư chă ôn kơ'nơp đơ̆ng đe wă pơrăm lu sư. Lu bơngai pơjuă pơđep gô pă đei, tơdrong pơrăm gô tôch đĭ. Lu bơngai chă plah tơgar iŏk gô hiong đĭ đơ̆ng teh âu.”

⁵ Na gô đei pơtao pơgơ̆r hăm tơdrong 'mêm mơnat, đơ̆ng adrĕch Đawit gô đei minh 'nu 'bok tŏk pơgơ̆r tơpăt, sư gô sek tơlang, chă tơdrong tơpăt hơnơ̆ng păng pơm hloi tơdrong 'lơ̆ng tơpăt.

⁶ Lu bơ̆n đei kơtơ̆ng bơih gah tơdrong lu bơngai Môap pơang, sư pơrŏ pơang dêh, pơma pôk kơdih mă-lei, tơdrong pơang sư jing tơdrong kơ đei.

⁷ Yua kơ noh bơih lu bơngai Môap gô nhơ̆m hmoi; đĭ-đăng lu sư nhơ̆m hmoi kơ Môap, nhơ̆m bĕ, tơtok ơh sơ'ngon bĕ, kơ 'bĕng plei hơmu pơlei Kir Harêsat!

⁸ Chŭn Hesbôn păng 'long hơmu pơlei Sipma đĭ jô kro. Đơ̆ng hơdrol sơ̆ sư chă kơjung mah truh tơ pơlei Jaser, păng truh tơ char glă; tơ'biĕng sư chăt sôr tơ 'nguaih, lĕch truh tơ đak dơsĭ. Na dang ei pơtao lu teh đak choh chre lê̆ boih lu dơng 'lơ̆ng.

⁹ Na inh nhơ̆m ơh kư̆m thoi pơlei Jaser nhơ̆m ơh kơ 'long hơmu pơlei Sipma. Ơ pơlei Hesbôn păng plei Êlêaleh, inh gô ruh kơpal iĕm hăm đak măt, yua kơ bơyan iĕm phĕ plei đei nơ̆r jreo hiôk, păng bơyan yuă iĕm pă đei bơih.

¹⁰ Tơdrong chơt hơiă 'nă hal tơ lăm mir hlă hla chŭn bluh 'lơ̆ng noh pă đei bơih, tơ lăm pơgar hơmu ưh pă đei bu hơri dah jreo chơt hiôk boih lu bơngai pơjuă plei hơmu wă pơm sik kư̆m ưh pă đei dơ̆ng, Inh pơm kơ tơdrong jreo chơt hiôk noh pơdơh hreh.

¹¹ Jơhngơ̆m inh hmoi kơ Môap thoi brŏ reh sơ'ngon, jơhngơ̆m inh ơh kơ pơlei Kirhêres kư̆m lei-lăi mơ̆n.

¹² Kơplah noh mă khan lu đe Môap năm tŏk tơ anih kơjung kơkuh kơ yang pih pang lap đĕch, mă đơ̆ng lu sư mơ̆t tơ anih chơnang soi wă krao khan kư̆m tơdrong kơ đei.

¹³ 'Nâu nơ̆r Kră Yang khan boih kơ lu Môap sơ̆.

¹⁴ Mă-lei dang ei Kră Yang khan: “Lăm pêng sơnăm, thoi lĕ kơ sơnăm đe jang apah đĕch na tơdrong ư-ang lu đe Môap mă hăm lơ khŭl kon pơlei lu sư ră đe gô pơjăm pơjuă păng lu bơngai oei đei pă tŏ sĕt đĕch, ưh kơ jing kiơ bơih.”