Êphêsô 6 - Sơ̆p Hlabơar Nơ̆r 'Bok Kei-Dei

¹ Ơ lu bơngai 'lơ̆p 'lŏ drŏ-nglo drŏ-kăn, iĕm athei băt chu yom kơ lu mĕ 'bă iĕm, yua kơ iĕm bơngai lui boih kơ Yêsu Krist, tơ̆ng iĕm pơm thoi noh trŏ tơpă.

² Tơdrong juăt đơ̆ng 'Bok Kei-Dei pơkă sơ̆ đe đei chih thoi âu: “Iĕm athei chu yom kơ lu mĕ 'bă iĕm.” Tơdrong juăt Sư pơkă noh kăl tơpă na 'Bok Kei-Dei pơkă khan wă tơgŭm bơ̆n dah bơ̆n chu kiơ̆ kơ tơdrong juăt Sư pơkă noh.

³ Sư pơkă khan dah bơ̆n chu kiơ̆ tơdrong juăt chu yom mĕ 'bă, Sư gô ăn kơ bơ̆n arih hiôk păng arih sot tơ ala teh âu.

⁴ Ơ lu bơngai đei kon hơ'lơ̆p, iĕm 'nĕ hil kơ kon iĕm dêh, hli kơ lu sư hil plơ̆ kơ iĕm dơ̆ng, iĕm athei bơtho akhan kơ lu sư kiơ̆ tơdrong Kră Yang pơkă.

⁵ Ơ lu bơngai đĭch đe, iĕm athei chu yom kơ yŏng tơ'ngla iĕm, iĕm athei jang kiơ̆ kơ nơ̆r sư pơkă 'nĕ kơ pơjah dôm nơ̆r sư khan. Iĕm athei jang kơ sư mă tơpăt dang iĕm jang kơ Yŏng bơ̆n Yêsu Krist mơ̆n.

⁶ Iĕm athei jang mă tơpă ngê̆ kiơ kơ yŏng iĕm gŏk gô na jang, iĕm kư̆ kơ jang mă 'lơ'lŏ jang mă tơpăt đĕch na 'Bok Kei-Dei bơnê. Mă khan iĕm jang kơ sư kư̆m dang jang kơ Yŏng bơ̆n Yêsu mơ̆n.

⁷ Thoi noh na iĕm athei jang kơ yŏng iĕm jang mă tơpăt đĕch, yua kơ iĕm ưh kơ sĭ khan jang wă pơhiôk kon bơngai ôh, iĕm jang wă pơhiôk Yŏng bơ̆n Yêsu Krist.

⁸ Yua kơ Yŏng bơ̆n Yêsu Krist wă apah bơngai bu mă jang 'lơ̆ng jang tơpăt, mă khan sư bơngai đĭch đe, mă bơngai rơngei.

⁹ Ơ lu bơngai yŏng tơ'ngla wei lu bơngai đĭch, iĕm kư̆m pơm mă 'lơ̆ng kơ lu đĭch iĕm; mă sư ưh kơ chu 'nĕ kơ hil kơ sư dêh păng 'nĕ kơ tôn teh sư mơnat kơ sư mơ̆n. Mă iĕm bơngai yŏng tơ'ngla sư, mă sư bơngai đĭch iĕm, đĭ-đăng kơ bơ̆n đei minh 'nu Yŏng tih hloh kơ đĭ-đăng, Sư oei tơ kơpal plĕnh ti. Sư lăng đĭ-đăng bơngai lei-lăi đĕch ưh kơ đei phara kiơ ôh.

Khêl đao wă tơblah hăm yang kơnê̆

¹⁰ Tơdrong inh chih hơpong kơ iĕm wă jê̆ tôch boih, mă-lei oei đei pă minh tơdrong âu kăl tơpă, na inh wă roi tơbăt ăn kơ iĕm: Bơ̆n athei gơnang kơ Yêsu hăm đĭ jơhngơ̆m, yua kơ Sư Kră Yang mơsêh tăp pang mơyang tăp dăr gơh pơm tôm tơdrong, na wă kơ Sư tơgŭm bơ̆n gơh đei jơhngơ̆m pran.

¹¹ Thoi kơ lu linh wă năm tơblah, lu sư chĕp tôm kơ tơmam tơblah, wă kơ tơblah jei sư, na bơ̆n kư̆m lei-lăi athei gơnang kơ 'Bok Kei-Dei tơgŭm bơ̆n tôm tơdrong wă kơ bơ̆n đei jơhngơ̆m pran huay kơ lui kơ yang Satan pơhlŭ.

¹² Tơdrong noh ưh kơ sĭ tơblah tơduă bơ̆n kon bơngai ôh, bơ̆n tơblah hăm lu yŏng yang kơnê̆, sư kư̆m pran mơ̆n, sư kư̆m oei tơ kơpal plĕnh ti mă tơ anih nai; sư pơgơ̆r lu bơngai oei tơ ala teh âu, lu bơngai mă oei lăm măng mu.

¹³ Thoi noh na bơ̆n athei gơnang kơ 'Bok Kei-Dei tơgŭm bơ̆n lăm tôm tơdrong, wă kơ bơ̆n đei jơhngơ̆m pran huay kơ hiong răm kơplah bơ̆n đei tơdrong tơblah hăm yang kơnê̆. Bơ̆n athei adrin pơjăng pơjăr dĭng truh năr tôch.

¹⁴ Kơplah bơ̆n oei tơblah, bơ̆n athei dơ̆ng kơtă anih hloi, gơhret tơlei tơ̆n bơ̆n mă kơjăp; noh wă pơtih gia kơ bơ̆n đei đon tơpăt boih. Bơ̆n athei hrŭk ao mam wă pĕng akâu bơ̆n; noh wă khan bơ̆n athei pơm 'lơ̆ng kơ đe.

¹⁵ Jơ̆ng bơ̆n trô̆ chơkhŏ; noh wă pơtih gia kơ jơ̆ng bơ̆n pơnam kơ nơnăm chă ră roi kơ đe tơdrong 'lơ̆ng, tơdrong hiôk.

¹⁶ Athei chĕp khêl ling-lang wă tang akâu bơ̆n hli kơ 'brơ̆m ŭnh yang kơnê̆ prah 'bơm bơ̆n; 'noh wă pơtih gia kơ bơ̆n athei kơchăng hli kơ bơ̆n đei tơdrong pơhlŭ wă kơ bơ̆n oei kơjăp lăm tơdrong lui.

¹⁷ Bơ̆n athei yơ̆l môk kơlăm; 'noh wă pơtih gia kơ bơ̆n gơnang kơ 'Bok Kei-Dei pơklaih bơ̆n đơ̆ng tơdrong yoch. Athei iŏk chĕp đao han đơ̆ng Yang Bơhngol 'Lơ̆ng ăn; 'noh wă pơtih gia kơ bơ̆n, athei bơ̆n iŏk nơ̆r 'Bok Kei-Dei tơbăt ăn kơ đe.

¹⁸ Păng bơ̆n 'nĕ hiơt krao khan kơ 'Bok Kei-Dei, wă kơ bơ̆n hưch hanh kơ tơdrong krao khan ling-lang, gô mơ̆ng kơ Yang Bơhngol 'Lơ̆ng wă kơ bơ̆n krao khan tơdrong kiơ, krao khan tơgŭm băl tơduă lu kon 'Bok Kei-Dei dah krao khan kơ tơdrong kiơ nai.

¹⁹ Păng inh wă kơ iĕm krao khan tơgŭm inh hai mơ̆n, wă kơ inh hlôh băt dôm tơdrong Sư wă kơ inh bơtho păng wă kơ inh nuih kơ bơtho tơdrong 'nao 'lơ̆ng Sư.

²⁰ Sư wơh inh năm bơtho kơ đĭ-đăng bơngai. Yua kơ thoi noh na đe areh kơ inh oei chô̆ inh dang ei. Mă-lei inh wă kơ iĕm krao khan tơgŭm inh, wă kơ inh nuih oei bơtho khŏm khŏm kiơ̆ thoi Sư lăp đon.

Tisĭk năm ba hla kơthơ

²¹ 'Bok mă chĕp ăn kơ iĕm hla kơthơ âu anăn sư Tisĭk, sư 'nhŏng oh bơngai lui bơ̆n. Bơ̆n 'mêm kơ sư mơ̆n yua kơ bơ̆n 'bôh sư adrin jang tơdrong Kră Yang Yêsu Krist tơpă. Na sư gô tơbăt ăn kơ iĕm tôm tơdrong inh oei 'lơ̆ng akâu hăm inh jang tơdrong 'Bok Kei-Dei thoi yơ dang ei na iĕm gô băt.

²² Thoi noh na inh wơh sư năm tơ iĕm wă kơ iĕm băt kơ nhôn oei 'lơ̆ng akâu păng wă kơ sư pơlung iĕm hiôk kơ jơhngơ̆m kơtơ̆ng tơdrong nhôn thoi yơ.

²³ Inh krao khan kơ 'Bă tơm bơ̆n 'Bok Kei-Dei hăm Kră Yang bơ̆n Yêsu Krist, apinh Sư tơgŭm đĭ-đăng kơ iĕm hiôk-hian, hăm ăn kơ iĕm băt 'mêm mơnat kơ đe, hăm lui rai kơjăp.

²⁴ Inh apinh sư wei-lăng lu bơngai mă băt 'mêm kơ Kră Yang bơ̆n Yêsu Krist ling-lang.