Da 8 - Sơ̆p Hlabơar Nơ̆r 'Bok Kei-Dei

Đaniel 'bôh triu tơno păng bơbe bram lăm tơdrong tơ'bôh wă pơtih gia kơ 'bar tŏ dêh char

¹ Sơnăm mă pêng lăm chăl pơtao Belsatsar, đei tơdrong tơ'bôh kơ inh, Đaniel, đơ̆ng rŏng kơ inh đei tơdrong tơ'bôh ki.

² Thoi âu, lăm tơdrong đei 'bôh tơ'bôh kơ inh noh; inh 'bôh akâu inh oei lăm hnam pơtao Susơ, tơring Êlam; păng inh oei cheng glung Ulai.

³ Inh ngơk lăng 'bôh, đei minh pôm triu tơno đơ̆ng cheng glung, đei 'bar tŏ hơke, 'bar tŏ hơke sư kơjung, mă-lei đei minh pôm hơke kơjung hloh kơ hơke pah to păng hơke mă kơjung noh chăt đơ̆ng rŏng.

⁴ Kơplah noh inh 'bôh triu tơno năm tơ̆m hơnhaih tơ gah bơmơ̆t, gah yă-nơ̆m păng gah gơal. Ưh kơ đei kon sem brem kiơ gơh kĕ tơblah hăm sư păng ưh kơ đei bu kĕ pơklaih đơ̆ng ti sư. Sư wă pơm kiơ mơ̆ng kơ sư wă păng sư jing rai tih.

⁵ Kơplah inh oei tơchĕng lăng tơdrong noh, 'nâu đei dơ̆ng minh pôm bơbe bram truh đơ̆ng gah bơmơ̆t, yak năm tơ jơ̆p-jang kơ teh đak mă-lei jơ̆ng sư yak ưh kơ 'bơm teh; bơbe noh sư đei hơke chăt tih sơlam 'bar pah măt sư.

⁶ Sư năm truh tơ triu đei 'bar tŏ hơke, mă inh đei 'bôh sư dơ̆ng cheng glung; sư hơnganh hil dêh na kơdâu hloi tơ triu tơno noh na tơtơ̆m băl hloi hăm triu tơno noh.

⁷ Inh 'bôh sư năm truh jê̆ tơ triu tơno noh, hil hơnganh na tơ̆m hloi triu noh, na hơke triu noh tơgơ̆ hloi 'bar pah; triu tơno noh ưh kơ kĕ kơ pơjăng, bơbe bram noh tơ̆m hơtơ̆k hloi triu tơno noh pơ̆k hloi tơ teh, bơbe bram noh hao pơjuă hloi păng ưh kơ bu kĕ pơ̆n kĕ dŏng pơklaih triu noh đơ̆ng tơdrong pran kơtang sư.

⁸ Bơbe bram pơm kơ akâu sư rai tih; mă-lei lăp sư pran dêh boih, hơke sư mă tih noh tơgơ̆ păng tơ đêl anih hơke tơgơ̆ noh chăt dơ̆ng puăn tŏ hơke plơ̆ng, puăn tŏ hơke noh chăt pơdơ̆ng tơklă tơ puăn trong kial tơ plĕnh.

⁹ Yua kơ đei minh lăm lu hơke noh, chăt dơ̆ng minh pôm hơke iĕ, rai tih, rai tih jing kơjăp, gah gơal gah hơlĕch, tơklă tơ gah teh đak ư-ang.

¹⁰ Sư rai tih kơjung truh tơ khŭl linh tơ plĕnh; sư tơhuŏng linh tơ teh mơ'nah khŭl linh đơ̆ng sơnglŏng đơ̆ng noh sư pơjuă lê̆.

¹¹ Sư pơm akâu sư rai tih dĭng truh tơ yŏng pơgơ̆r linh; sư iŏk lê̆ tơmam pơyơ̆r đơ̆ng 'bok noh păng anih rơgoh sư tơhuŏng lê̆ tơ teh.

¹² Yua kơ đei tơdrong yoch na lu linh jao pơđĭ kơ sư păng lu tơmam pơyơ̆r pơm tơmam 'buh păng tơjruh lê̆ tơdrong tơpăt tơ teh sư pơm kiơ̆ kơ sư kơdih wă na păng kĕ jei tih.

¹³ Đơ̆ng noh inh kơtơ̆ng đei minh 'nu Yang rơgoh oei pơma păng minh 'nu Yang rơgoh nai dơ̆ng pơma dơnuh hăm Yang rơgoh mă oei pơma noh, thoi âu: Tơdrong tơ'bôh âu gah tơmam soi juăt kơ pơyơ̆r âu dang yơ gơh pơyơ̆r dơ̆ng păng gah tơdrong yoch mă đei tơdrong pơrăm, wă jao lu linh păng anih rơgoh wă pơjuă gơhlơ̆r hăm jơ̆ng, dĭng dang yơ đĭ?

¹⁴ Inh kơtơ̆ng bơngai noh tơl inh thoi âu: Dĭng truh tơ 'bar-rơbâu pêng-hrĕng kơsơ̆ păng pơgê; đơ̆ng rŏng kơ noh anih rơgoh gô rơgoh đĭ.

¹⁵ Kơplah mă inh, Đaniel, lăng tơdrong tơ'bôh noh păng inh chơchă wă kơ băt nhen wă khan kiơ, 'nâu thoi đei minh 'nu drŏ-nglo dơ̆ng 'bơ̆t anăp inh.

¹⁶ Inh kơtơ̆ng nơ̆r đơ̆ng bơngai drŏ-nglo noh dơ̆ng tŏk-bŏk glung Ulai, krao păng khan: Gabrel, roi tơbăt kơ bơngai âu mă đêl tơ'bôh kơ sư noh.

¹⁷ Sư năm jê̆ inh oei dơ̆ng, kơplah sư truh tơ inh, inh hli păng lăng krưp, na inh pơ̆k kơmŭ brum tơ teh. Bơngai noh khan thoi âu: Ơ kon bơngai, ih athei hlôh bĕ; yua kơ tơdrong tơ'bôh noh sư trŏ kơ năr tôch kơnh.

¹⁸ Kơplah Sư oei pơma hăm inh, inh tep hơlơ̆m hloi oei kơmŭ brum; mă-lei Sư hơtŭt kơ inh pơm kơ inh hơđơ̆r na iung.

¹⁹ Bơngai noh khan kơ inh thoi âu: 'Nâu Inh gô roi ăn kơ ih băt tơdrong wă truh kơ năr tôch kơnh, tơdrong hil yua kơ tơdrong âu wă truh pơsĭt kơ năr tôch.

²⁰ Triu tơno mă ih đei 'bôh, đei 'bar tŏ hơke, noh bre pơtao Mêdi păng pơtao Pherơsơ.

²¹ Bơbe bram, noh pơtao dêh char Grĕk păng đei hơke chăt tŏk-bŏk sơlam măt wă khan pơtao blŭng-a.

²² Gah hơke mă tơgơ̆ boih, đei dơ̆ng puăn tŏ ake tơplih 'bơ̆t doh, wă khan đơ̆ng minh pôm dêh char kla asong jing puăn tŏ dêh char, mă-lei ưh pran thoi pơtao adrol noh.

²³ Truh kơ năr tôch kơ dêh char lu sư, tơdah lu bơngai kơnê̆ pơm tôm boih, na đei minh 'nu iung pơm pơtao, noh jơ̆ bơngai đei muh măt khĕnh nuih păng băt đĭ dôm tơdrong hlơp.

²⁴ Tơdrong pơgơ̆r sư rai tih, mă-lei ưh kơ trŏ kơ đơ̆ng jơhngơ̆m pran sư kơdih. Sư pơm dôm tơdrong pơrăm pơrai hlĭch tơpă; păng đei jing jei thoi sư wă; pơlôch pơrăm dôm lu bơngai pơgơ̆r păng kon pơlei 'lơ̆ng rơgoh.

²⁵ Sư đei tơdrong gơh pơm hơlĕnh pơdăr sư đei jơnei tih. Lăm jơhngơ̆m sư kơdih pơm kơ sư jing tih păng kơplah lu kon pơlei oei hiôk-hian, sư gô pơlôch lơ bơngai; sư iung blah lu pơtao kơ lu pơtao, mă-lei đe gô pơrăm lê̆ sư ưh kơ trŏ đơ̆ng ti kon bơngai pơrăm.

²⁶ Tơdrong tơ'bôh kơ inh gah kơsơ̆ păng gah pơgê hrôih mă đei roi tơbăt boih noh sĭt tơpă. Mă-lei ih athei wei mă hlơp tơdrong tơ'bôh noh, yua kơ sư 'bơm trŏ kơ lơ năr đơ̆ng rŏng kơnh.

²⁷ Đơ̆ng noh, inh, Đaniel lap dêh na jĭ jăn lăm akâu jing bơlŏ lăm dôm năr hloi; đơ̆ng noh inh iung bơ̆jang kơ pơtao. Inh 'bôh thoi noh hlĭch tơpă gah tơdrong mă đei tơ'bôh kơ inh noh, mă-lei ưh kơ đei bu băt tơdrong noh wă khan kiơ.